ភ្នំពេញៈ អ្នកស្ម័គ្រចិត្តមកពីអង្គការសង្គមស៊ីវិល និងវិស័យឯកជន រួមគ្នាធ្វើយុទ្ធនាការ «ជំរុញការអាននៅកម្ពុជា ២៥ រាជធានី-ខេត្ត រួមគ្នាលើកកម្ពស់ការអាននៅតាមសហគមន៍» ដើម្បីប្រមូលការគាំទ្រសម្រាប់ឈានទៅអនុវត្តគម្រោង សៀវភៅ ១ សហគមន៍ ១ នៅដើមឆ្នាំ ២០២៣ ខាងមុខ។
តាមការប្រកាសរបស់គម្រោងសៀវភៅ ១ សហគមន៍ ១ នៅលើទំព័រហ្វេសប៊ុកបានឱ្យដឹងថា «យុទ្ធនាការ ជំរុញការអាននៅកម្ពុជា ២៥ រាជធានី ខេត្ត រួមគ្នាលើកកម្ពស់ការអាននៅតាមសហគមន៍» គឺជាផ្នែកមួយដើម្បីស្វែងរកការចូលរួមបរិច្ចាគជាថវិកា និងការគាំទ្រតាមសកម្មភាពផ្សេងៗទៅតាមលទ្ធភាព ដើម្បីរួមគ្នាលើកកម្ពស់ការអាននៅតាមសហគមន៍នៅទូទាំង ២៥ រាជធានី ខេត្ត។
កញ្ញា ហ៊ាង វត្ថី ម្ចាស់អាជីវកម្ម Riel Tiger Solutions Co.,LTD ដែលជាសហស្ថាប័នម្នាក់ក្នុងគម្រោងសៀវភៅ ១ សហគមន៍ ១ បានប្រាប់ ភ្នំពេញ ប៉ុស្តិ៍ នៅថ្ងៃទី ១៩ កញ្ញាថា ដើម្បីឈានទៅអនុវត្តគម្រោង សៀវភៅ ១ សហគមន៍ ១ ក្នុងពេលខាងមុខ ក្រុមការងារ ក៏ដូចជាសហស្ថាបនិក បានរួមគ្នាបង្កើតជាព្រឹត្តិការណ៍ និងយុទ្ធនាការមួយចំនួន ដើម្បីប្រមែប្រមូលថវិកា ក៏ដូចជាការគាំទ្រនានា ពីបណ្តាសាធារណជន ដៃគូអភិវឌ្ឍន៍និងស្ថាប័នរដ្ឋនានា។
កញ្ញាបានបន្តថា គម្រោងសៀវភៅ ១ សហគមន៍ ១ គ្រោងនឹងប្រកាសអនុវត្តនៅដើមឆ្នាំ ២០២៣ ចាប់ពីថ្ងៃទី ១ ខែមករា ឆ្នាំ ២០២៣ រហូតដល់បញ្ចប់ឆ្នាំ ២០២៤ ខាងមុខ។
ដោយសារតែគម្រោងនេះ គឺបង្កើតឡើងដោយក្រុមអ្នកស្ម័គ្រចិត្ត នៅក្នុងវិស័យឯកជន និងសង្គមស៊ីវិល ជាពិសេស គឺអ្នកដែលស្រឡាញ់ការអាន កញ្ញបានបន្តថា នៅចំពោះមុខ គឺចាំបាច់ណាស់ ត្រូវការការគាំទ្របន្ថែមពីសាធារណជន ជាពិសេសស្ថាប័នពាក់ព័ន្ធ។
កញ្ញាបានបញ្ជាក់ថា៖ «មកដល់ពេលនេះ យើងបានទទួលការគាំទ្រ ពីស្ថាប័ននានា គឺជាង ៣០ ហើយ។ ស្ថាប័នទាំងនោះ គឺមកពីវិស័យឯកជន បណ្ណាល័យ ពីសាធារណជន ក៏ដូចជាមកពីផ្នែកអ្នកនិពន្ធ។ ម្នាក់ៗ គឺអាចចូលរួមគាំទ្រជាការបរិច្ចាគសៀវភៅ ជាការចូលរួម ជាការមករៀបចំកម្មវិធី ឬក៏ការចែករំលែកនូវថវិកាតិចតួច ដើម្បីឱ្យគម្រោងនេះ អាចដំណើរការទៅបាន»។
យោងតាមការស្ទង់មតិសេដ្ឋកិច្ចសង្គមកម្ពុជាឆ្នាំ ២០១៤ ប្រទេសកម្ពុជា មានអត្រាអក្ខរកម្មទាបបំផុតទី២នៅក្នុងបណ្តាប្រទេសអាស៊ាន បន្ទាប់ពីប្រទេសឡាវ និងប្រហែល ២៩ ភាគរយ នៃប្រជាជនសរុប គឺខ្វះជំនាញអាន និងសរសេរជាមូលដ្ឋាន។
ចំណែកការរកឃើញរបស់ក្រុមប្រឹក្សាអភិវឌ្ឍន៍យុវជនជាតិ (NYDC 2021) នៅកម្ពុជា បានបង្ហាញថា កម្ពុជា ជាប្រទេសដែលមានយុវជន ៣២ ភាគរយដែលមានអាយុពី ១០ ដល់ ២៤ ឆ្នាំ និង ៧១ ភាគរយ នៃយុវជនមិនបានសិក្សាជាផ្លូវការ។
កញ្ញា ហ៊ាង វត្ថី បានអះអាងថា កត្តានេះហើយ ដែលធ្វើឱ្យក្រុមការងារ និងអ្នកស្ម័គ្រចិត្ត រួមគ្នាបង្កើតគម្រោងនេះឡើង ដើម្បីជំរុញការអាន និងលើកកម្ពស់ការអាននៅតាមសហគមន៍ តាមរយៈការបង្កើតការប្រកួតប្រជែងការអាន ការចែកសៀវភៅ ការបង្កើតបណ្ណាល័យចល័ត ការអភិវឌ្ឍបណ្ណាល័យ និងផ្សារណាត់ឱ្យបាន ២៥ រាជធានី ខេត្ត។
កញ្ញាបានបញ្ជាក់បន្ថែមថា៖ «ការបង្កើនបច្ចេកវិទ្យា និងឧបករណ៍ឆ្លាតវៃ បានជះឥទ្ធិពលយ៉ាងខ្លាំងទៅលើកុមារ និងយុវជន។ ការចំណាយពេលវេលាច្រើនពេក លើឧបករណ៍ឆ្លាតវៃ និងអ៊ីនធឺណិតដែលពួកគេចូលប្រើ គឺបង្កបញ្ហាជាពិសេសការអភិវឌ្ឍរបស់កុមារ រួមទាំងបញ្ហាដំណេក ឬការគេងមិនលក់ សុខភាពរាងកាយជាដើម។ គម្រោងនេះ គឺជាសកម្មភាពមួយជួយដល់សង្គម និងចូលរួមចំណែកកាត់បន្ថយបញ្ហាទាំងនេះ នៅក្នុងសង្គមកម្ពុជា»។
តាមឯកសារគម្រោងសៀវភៅ ១ សហគមន៍ ១ ដែល ភ្នំពេញ ប៉ុស្តិ៍ ទទួលបាន កាលពីថ្ងៃទី ១៩ កញ្ញា បានអះអាងថា គម្រោងនេះ នឹងចូលរួមជំរុញឱ្យស្ថាប័នមួយចំនួន ទទួលយកវប្បធម៌អាន និងចំណេះដឹងក្នុងប្រតិបត្តិការរបស់ពួកគេ ខណៈសៀវភៅ ២៥ ០០០ ក្បាល និងបណ្ណាល័យចំនួន ២៥ ត្រូវបានរំពឹងទុកថា នឹងផ្តល់ទៅដល់អ្នកអានចន្លោះពី ៥ ម៉ឺន ទៅ ៧ ម៉ឺននាក់នៅទូទាំង ២៥ រាជធានី ខេត្ត។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានលើកឡើងថា ក្រសួងអប់រំ ស្វាគមន៍ និងលើកទឹកចិត្តចំពោះកិច្ចសហការវិជ្ជមានរបស់ស្ថាប័នពាក់ព័ន្ធក្នុងការលើកកម្ពស់ការអនុវត្តគោលនយោបាយអភិវឌ្ឍន៍យុវជន និងកម្មវិធីសិក្សាផ្សេងទៀត ក្នុងន័យចូលរួមលើកកម្ពស់គុណភាពយុវជនសម្រាប់ការចូលរួមការអភិវឌ្ឍសេដ្ឋកិច្ចកម្ពុជា។
លោកបានបញ្ជាក់ថា៖ «យុវជនសតវត្សរ៍ទី២១ ជាយុវជនបន្តវេន និងជាសសរទ្រូងសម្រាប់ការអភិវឌ្ឍសង្គម និងសេដ្ឋកិច្ចកម្ពុជា ឆ្ពោះទៅសម្រេចចក្ខុវិស័យកម្ពុជានៅឆ្នាំ ២០៣០ និង ២០៥០។ ដូចនេះ យុវជន ត្រូវបន្តទទួលបាននូវការអភិវឌ្ឍលើគ្រប់ទិដ្ឋភាព និងតាមគ្រប់រូបភាព»។
បើតាមលោក រស់ សុវាចា ស្ថិតក្នុងគោលបំណងបណ្តុះទម្លាប់អាន ជំរុញវប្បធម៌អាន លើកកម្ពស់សមត្ថភាពអាន និងតែងនិពន្ធ រាជរដ្ឋាភិបាល បានកំណត់យកថ្ងៃទី ១១ មីនា ជាថ្ងៃប្រារព្ធទិវាជាតិអំណានជារៀងរាល់ឆ្នាំ។
បន្ថែមពីនេះ លោកថា ក្រសួងក៏បានរៀបចំការប្រារព្ធទិវាជាតិអំណានជារៀងរាល់ឆ្នាំតាំងពីឆ្នាំ ២០១៦ រហូតមកដល់បច្ចុប្បន្ន ដែលមានការរៀបចំការអានជាសកល និងការប្រកួតប្រជែងលើ៣វិញ្ញាសា គឺការអានអត្ថបទ ការស្មូតកំណាព្យ និងការតែងនិពន្ធ ដើម្បីទទួលពានរង្វាន់«សម្តេចតេជោហ៊ុន សែន» រួមទាំងកម្មវិធីសិក្សានៅតាមសាលា និងតាមបណ្ណាល័យជាច្រើន៕