ភ្នំពេញៈ លោកនាយករដ្ឋមន្ត្រី ហ៊ុន សែន នឹងចូលរួមមហាសន្និបាតអង្គការសហប្រជាជាតិ នៅទីក្រុងញូវយ៉ក សហរដ្ឋអាមេរិក បំពេញទស្សនកិច្ចនៅគុយបា និងចូលរួមពិធីបុណ្យសព លោក ស៊ីនហ្សូ អាបេ អតីតនាយករដ្ឋមន្ត្រីជប៉ុន នៅប្រទេសជប៉ុន ក្នុងរយៈពេល ៩ ថ្ងៃ ចាប់ពីថ្ងៃទី ២១-២៨ ខែកញ្ញា។
គណៈប្រតិភូដែលនឹងអមដំណើរលោក ហ៊ុន សែន រួមមាន លោកប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ព្រមទាំងថ្នាក់ដឹកនាំជាន់ខ្ពស់ របស់រដ្ឋាភិបាលផ្សេងទៀត។
លោក ហ៊ុន សែន នឹងចូលរួមសម័យប្រជុំលើកទី៧៧ នៃកិច្ចពិភាក្សាទូទៅរបស់មហាសន្និបាតអង្គការសហប្រជាជាតិ ក្រោមប្រធានបទ «ចំណុចរបត់សំខាន់នៃការផ្លាស់ប្តូរមិនអាចត្រឡប់ក្រោយបាន៖ ដំណោះស្រាយបរិវត្តកម្មចំពោះបញ្ហាប្រឈមប្រទាក់ក្រឡាគ្នា» ចាប់ពីថ្ងៃទី ២១-២៣ ខែកញ្ញា។
សេចក្តីប្រកាសព័ត៌មានក្រសួងការបរទេស បញ្ជាក់ពីថ្ងៃទី ១៩ ខែកញ្ញាថា លោកនឹងធ្វើសេចក្តីថ្លែងការណ៍ជាតិរបស់កម្ពុជា នៅក្នុងកិច្ចពិភាក្សាទូទៅរបស់មហាសន្និបាតនេះ។
បទអន្តរាគមន៍នេះ នឹងផ្តោតលើតួនាទីស្ថាបនារបស់កម្ពុជា ក្នុងការគាំទ្រពហុភាគីនិយមផ្អែកលើគោលការណ៍ច្បាប់ ការរួមសហការគ្នាប្រយុទ្ធប្រឆាំងនឹងការគំរាមកំហែងផ្នែកសុខភាពជាសកលដែលកំពុងបន្តកើតមាន ការប្រែប្រួលអាកាសធាតុ ការពង្រឹងប្រព័ន្ធពាណិជ្ជកម្ម ពហុភាគី គោលនយោបាយឌីជីថល និងសេដ្ឋកិច្ចបៃតង ព្រមទាំងការធ្វើជាប្រធានអាស៊ានរបស់កម្ពុជា និងកិច្ចខិតខំប្រឹងប្រែងរបស់កម្ពុជាក្នុងការកាត់បន្ថយផលប៉ះពាល់នៃជំងឺរាតត្បាតកូវីដ ១៩ និងការរក្សាបាននូវនិរន្តរភាពនៃកំណើនសេដ្ឋកិច្ច-សង្គមយូរអង្វែង។
ប្រភពដដែលបញ្ជាក់ថា ក្នុងអំឡុងពេលស្នាក់នៅទីក្រុងញូវយ៉ក លោក ហ៊ុន សែន ក៏នឹងមានជំនួបបន្តបន្ទាប់គ្នាជាមួយ លោក អាន់តូនីញ៉ូ ហ្គូតឺរ៉េស អគ្គលេខាធិការអង្គការសហប្រជាជាតិ លោក ឆាលស៍ មីឆែល ប្រធានក្រុមប្រឹក្សាអឺរ៉ុប លោកស្រី សេក្ខ ហាស៊ីណា នាយករដ្ឋមន្ត្រីបង់ក្លាដែស លោក ចូហ្សេ ម៉ានូអែល រ៉ាមូស អរតា ប្រធានាធិបតីទីម័រខាងកើត ហើយនិងថ្នាក់ដឹកនាំផ្សេងទៀត។
ខណៈពេលអមដំណើរលោក ហ៊ុន សែន ចូលរួមក្នុងមហាសន្និបាតនេះលោក ប្រាក់ សុខុន នឹងចូលរួមក្នុងកិច្ចប្រជុំក្រៅផ្លូវការរបស់រដ្ឋមន្រ្តីការបរទេសអាស៊ាន ដែលនឹងរៀបចំឡើងនៅក្នុងឱកាសនៃមហាសន្និបាតនេះ ហើយលោកនឹងមានជំនួបជាមួយរដ្ឋមន្រ្តីការបរទេសរបស់ប្រទេសមួយចំនួន និងតំណាងស្ថាប័នអភិវឌ្ឍន៍ផងដែរ។
សេចក្តីប្រកាសព័ត៌មានបានឱ្យដឹងថា លោក ហ៊ុន សែន នឹងបំពេញទស្សនកិច្ចនៅប្រទេសគុយបាពីថ្ងៃទី ២៣-២៥ ខែកញ្ញា តបតាមការអញ្ជើញរបស់លោក មីហ្គេល ឌីយ៉ាស-កាណែល បឺមូដេស។
សេចក្តីប្រកាសព័ត៌មានបញ្ជាក់ថា៖ «សម្តេចតេជោនាយករដ្ឋមន្ត្រី នឹងមានជំនួបទ្វេភាគីជាមួយឯកឧត្តម ប្រធានាធិបតី មីហ្គេល ឌីយ៉ាស-កាណែល បឺមូដេស ពិភាក្សាអំពីមធ្យោបាយ ដើម្បីបន្តពង្រឹងចំណងមិត្តភាពដ៏រឹងមាំរវាងកម្ពុជានិងគុយបា និងពង្រីកកិច្ចសហប្រតិបត្តិការក្នុងវិស័យផ្សេងៗ»។
បន្ទាប់ពីជំនួបនេះ មេដឹកនាំទាំង ២ នឹងធ្វើជាអធិបតីក្នុងពិធីចុះហត្ថលេខាលើឯកសារចំនួន ៥ រួមមាន ១. កម្មវិធីនៃកិច្ចសហប្រតិបត្តិការ និងការផ្លាស់ប្តូរវប្បធម៌ ២. អនុស្សរណៈយោគយល់ គ្នា ស្តីពីកិច្ចសហប្រតិបត្តិការរវាងវិទ្យាស្ថានការទូតនៃប្រទេសទាំង ២, ៣. អនុស្សរណៈយោគយល់គ្នា ស្តីពីកិច្ចសហប្រតិបត្តិការលើការអភិវឌ្ឍកីឡា ៤. គម្រោងកិច្ចសហប្រតិបត្តិការរវាងក្រសួងការបរទេសនៃប្រទេសទាំង ២ និង ៥. អនុស្សរណៈយោគយល់គ្នារវាងក្រសួងសុខាភិបាលកម្ពុជា-គុយបា។
លោក ហ៊ុន សែន នឹងមានជំនួបជាមួយលោក អេស្តេបាន ឡាហ្សូ ហឺណាន់ដេស ប្រធានរដ្ឋសភានៃអំណាចប្រជាជនគុយបា។
លោកក៏រំពឹងថា នឹងមានជំនួបជាមួយលោក រ៉ាអ៊ូល កាសស្រ្តូ អតីតប្រធានាធិបតីគុយបាផងដែរ។
ប្រភពដដែលបន្តថា នៅរដ្ឋធានីហាវ៉ាណា លោកនឹងទៅទស្សនាមជ្ឈមណ្ឌល ហ្វីដែល កាស្ត្រូ (Fidel Castro) និងមជ្ឈមណ្ឌលវិស្វកម្មហ្ស៊េន និងបច្ចេកវិទ្យាជីវៈ និងដាក់កម្រងផ្កាគោរពវិញ្ញាណក្ខន្ធនៅវិមានអនុស្សាវរីយ៍ ចូហ្សេ ម៉ាទី (José Martí)។
លោកក៏នឹងជួបសំណេះសំណាលជាមួយនិស្សិតកម្ពុជា ដែលកំពុងសិក្សានិងរស់នៅក្នុងប្រទេសគុយបា ផងដែរ។
លោក ហ៊ុន សែន នឹងចាកចេញពីទីក្រុងហាវ៉ាណា ឆ្ពោះទៅកាន់ទីក្រុងតូក្យូ ប្រទេសជប៉ុនដើម្បីចូលរួមក្នុងពិធីបុណ្យសពថ្នាក់ជាតិរបស់លោក ស៊ីនហ្សូ អាបេ ដែលនឹងប្រព្រឹត្តនៅថ្ងៃទី ២៧ ខែកញ្ញា។
សេចក្តីប្រកាសព័ត៌មានបញ្ជាក់ថា៖ «អតីតនាយករដ្ឋមន្ត្រី ឯកឧត្តម អាបេ ស៊ីនហ្សូ គឺជាមិត្តដ៏ល្អយូរអង្វែងរបស់សម្តេចតេជោនាយករដ្ឋមន្ត្រីនិងកម្ពុជា។ នៅក្នុងអាណត្តិជានាយករដ្ឋមន្ត្រីរបស់ឯកឧត្ដម បានធ្វើការយ៉ាងជិតស្និទ្ធជាមួយរដ្ឋាភិបាលកម្ពុជាក្នុងការពង្រឹងទំនាក់ទំនងទ្វេភាគីរវាងកម្ពុជា និងជប៉ុន ក្នុងនោះរួមទាំង ការលើកកម្រិតកិច្ចសហប្រតិបត្តិការទ្វេភាគីឱ្យក្លាយទៅជាភាពជាដៃគូយុទ្ធសាស្ត្រ នៅឆ្នាំ ២០១៣»។
សេចក្តីប្រកាសព័ត៌មានលើកឡើងថា លោក អាបេ ត្រូវបានគេទទួលស្គាល់ និងកោតសរសើរយ៉ាងទូលំទូលាយចំពោះភាពជាអ្នកដឹកនាំប្រកបដោយសមត្ថភាព ក្នុងការជំរុញវឌ្ឍនភាពរបស់ជប៉ុន និងការចូលរួមចំណែកយ៉ាងសកម្មដល់សន្តិភាព ស្ថិរភាព និងវិបុលភាពនៅក្នុងតំបន់ និងពិភពលោកទាំងមូល។
ក្នុងអំឡុងពេលស្នាក់នៅទីក្រុងតូក្យូ លោក ហ៊ុន សែន ក៏រំពឹងនឹងជួបជាមួយសមភាគីបរទេសរបស់លោក និងឥស្សរជនជប៉ុនផ្សេងទៀតផងដែរ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា ប្រាប់ ភ្នំពេញ ប៉ុស្តិ៍ថា បេសសកម្មទាំង៣នេះគឺជាកិច្ចខិតខំប្រឹងប្រែងរបស់លោក ហ៊ុន សែន នៅក្នុងការធ្វើពិពិធកម្មការទូតរបស់ប្រទេសកម្ពុជា គឺមានន័យថា ជាសកម្មភាពនៃការពង្រីកទំនាក់ទំនង និងកិច្ចសហការរបស់កម្ពុជាក្នុងទម្រង់ជាទ្វេភាគីផង និងជាពហុភាគីផង។
លោកថ្លែងថា៖ «ដំណើរទស្សនកិច្ចនេះ គឺមានអត្ថន័យសំខាន់ណាស់សម្រាប់ប្រទេសកម្ពុជាក្នុងការធ្វើពិពិធកម្មការទូតរបស់ខ្លួន ពង្រឹងតួនាទីរបស់កម្ពុជាទាំងក្នុងក្របខ័ណ្ឌតំបន់និងពិភពលោកក៏ដូចជាការលើកកម្ពស់នូវគោលការណ៍ពហុភាគីនិយម»៕