អ្នកចូលរួមក្នុងពិធីដាក់ឱ្យដំណើរការកាតាឡុករបស់សារមន្ទីរខេត្តចំនួន ៦ តាមប្រព័ន្ធអ៊ីនធើណិត កាលពីថ្ងៃទី១៩កញ្ញា។ រូបថត ស្ថានទូតសហរដ្ឋអាមេរិក
ភ្នំពេញៈ នាយកដ្ឋានសារមន្ទីរនៃក្រសួងវប្បធម៌ និងវិចិត្រសីល្បៈ និងស្ថានទូតសហរដ្ឋអាមេរិកប្រចាំនៅកម្ពុជា នៅថ្ងៃទី ១៩ ខែកញ្ញា ឆ្នាំ ២០២២ បានដាក់ឱ្យដំណើរការកាតាឡុករបស់សារមន្ទីរខេត្តចំនួន ៦ តាមប្រព័ន្ធអ៊ីនធើណិត ដើម្បី ចូលរួមថែរក្សាលើកតម្លៃ និងផ្សព្វផ្សាយអំពីសម្បត្តិបេតិកភណ្ឌខ្មែរទៅដល់មហាជន ជាពិសេសគឺសម្រួលដល់អ្នកស្រាវជ្រាវ ដែលមានបំណងស្វែងយល់បន្ថែមពីសម្បត្តិវប្បធម៌ខ្មែរនៅតាមបណ្ដាខេត្តទាំងនេះ ។
តាមសេចក្តីប្រកាសព័ត៌មាននៃស្ថាប័នទាំង ២ បានបញ្ជាក់ថា កាតាឡុករបស់សារមន្ទីរខេត្ត ចំនួន ៦ សារមន្ទីរ ដែលបានដាក់ឱ្យដំណើរការជាផ្លូវការ នៅលើប្រព័ន្ធអ៊ីនធើណិតនេះ ជាលទ្ធផលនៃគម្រោងរយៈពេល ១ ឆ្នាំ (កញ្ញា ២០២១-សីហា ២០២២) របស់នាយកដ្ឋានសារមន្ទីរក្រោមកិច្ចគាំទ្ររបស់ក្រសួងវប្បធម៌ និងវិចិត្រសិល្បៈ ស្តីពី «ប្រព័ន្ធទិន្នន័យសមុច្ច័យនៃសារមន្ទីរខេត្ត-ក្រុង» ដែលឧបត្ថម្ភថវិកាដោយស្ថានទូតអាមេរិក។
សេចក្តីប្រកាសព័ត៌មាននេះបន្តថា សារមន្ទីរទាំង ៦ ដែលបានចូលរួមអនុវត្តគម្រោងនេះមាន សារមន្ទីរ ខេត្តតាកែវ សារមន្ទីរស្រុកអង្គរបុរី សារមន្ទីរខេត្តព្រៃវែង សារមន្ទីរខេត្តពោធិ៍សាត់ សារមន្ទីរខេត្តកំពង់ធំ និងសារមន្ទីរខេត្តកំពង់ឆ្នាំង។
គម្រោងនេះ ធ្វើឡើងក្នុងគោលបំណងសំខាន់ ២ គឺ ទី១. ដើម្បីកែសម្រួល និងពង្រីកប្រព័ន្ធ ទិន្នន័យសមុច្ច័យដែលសារមនី្ទរជាតិកម្ពុជាមានតាំងពីច្រើនឆ្នាំកន្លងមក ដើម្បីបំពាក់ប្រព័ន្ធនោះ ទៅដល់សារមន្ទីរខេត្ត និងទី២. ដើម្បីដាក់បញ្ចូលទិន្នន័យសមុច្ច័យរបស់សារមន្ទីរខេត្តទាំង ៦ សារមន្ទីរ ទៅក្នុងកាតាឡុកដែលនឹងបង្ហោះ លើប្រព័ន្ធអ៊ីនធើណិត ដូចសារមនី្ទរជាតិបានធ្វើរួចមកហើយតាំងពីឆ្នាំ ២០១៤។
សេចក្តីប្រកាសព័ត៌មានដដែលបញ្ជាក់ថា បន្ទាប់ពីពិធីសម្ពោធជាផ្លូវការនេះ សាធារណជន អាចស្វែងរកទិន្នន័យសមុច្ច័យរបស់សារមន្ទីរទាំង ៦នៅលើប្រព័ន្ធអ៊ីនធើណិត ដោយចូលតាមគេហទំព័ររបស់សារមនី្ទរជាតិ www.cambodiamuseum.info។
ការដាក់បង្ហោះទិន្នន័យសមុច្ច័យទាំង ៦ នេះ ជាការចូលរួមថែរក្សា លើកតម្លៃ និងផ្សព្វផ្សាយអំពីសម្បត្តិបេតិកភណ្ឌ ខ្មែរទៅដល់មហាជន ជាពិសេសគឺសម្រួលដល់អ្នកស្រាវជ្រាវដែលមានបំណងស្វែងយល់បន្ថែមពីសម្បត្តិវប្បធម៌ ខ្មែរនៅតាមបណ្តាខេត្ត។
សេចក្តីប្រកាសព័ត៌មានដដែលសរសេរថា៖ «គម្រោងខាងលើជាគម្រោងសាកល្បងដំណាក់កាលទី១។ នាយកដ្ឋានសារមន្ទីរក៏ មានបំណងនឹងពង្រីកគម្រោងដូចគ្នានេះ ទៅដល់សារមន្ទីរខេត្តដទៃផ្សេងទៀត នៅថ្ងៃអនាគតក្នុងគោលបំណងឱ្យ សារមន្ទីរទាំងអស់ដែលស្ថិតនៅក្រោមការគ្រប់គ្រងរបស់ក្រសួងវប្បធម៌ និងវិចិត្រសិល្បៈ មានប្រព័ន្ធទិន្នន័យវត្ថុក្នុងឃ្លាំងថ្នាក់ជាតិរួមគ្នាមួយ»។
លោក ប្រាក់ សុវណ្ណារ៉ា រដ្ឋលេខាធិការក្រសួងវប្បធម៌ និងវិចិត្រសិល្បៈ ថ្លែងនៅក្នុងពិធីដាក់ឱ្យដំណើការនេះថា ការផ្ដល់ប្រព័ន្ធទិន្នន័យសម្រាប់សារមន្ទីរខេត្ត និងការរៀបចំឱ្យមានប្រព័ន្ធថែរក្សាទិន្នន័យរួមមួយនៅសារមន្ទីរជាតិនេះ ប្រាកដជាទទួលបាននូវការធានាសុវត្ថិភាពរយៈពេលវែង ក្នុងការថែរក្សាទិន្នន័យសមុច្ច័យសារមន្ទីរទាំងអស់។
សមិទ្ធផលនេះ គឺជាផ្នែកមួយនៃកិច្ចការចងក្រងឯកសារ និងថែរក្សាទិន្នន័យសម្បត្តិបេតិកភណ្ឌរបស់ខ្មែរ។
លោកក៏បានថ្លែងអំណរគុណយ៉ាងជ្រាលជ្រៅ ដល់រដ្ឋាភិបាលសហរដ្ឋអាមេរិក ជាពិសេសស្ថានទូតអាមេរិកប្រចាំនៅកម្ពុជា ដែលតែងតែចូលរួមចំណែកយ៉ាងសកម្ម ក្នុងកិច្ចការការពារសម្បត្តិបេតិកភណ្ឌកម្ពុជា តាំងពីដើមរៀងរហូតមក ជាពិសេសសការឧបត្ថម្ភថវិកាដល់នាយកដ្ឋានសារមន្ទីរ ដើម្បីអនុវត្តគម្រោងជាមួយសារមន្ទីរទាំង ៦ នេះ។
ជាមួយគ្នានេះ លោកបានណែនាំដល់នាយកដ្ឋានសារមន្ទីរនឹងបន្តកិច្ចការបែបនេះ ជាមួយនឹងសារមន្ទីរខេត្តដទៃទៀត ដើម្បីឱ្យសារមន្ទីរទាំងអស់ នៅតាមបណ្ដាខេត្តក្រុង មានប្រព័ន្ធទិន្នន័យស្តង់ដារបៀបនេះ និងមានការផ្សព្វផ្សាយតាមប្រព័ន្ធ អ៊ីនធឺណិត នៅថ្ងៃ អនាគត។
លោកថ្លែងថា៖ «កិច្ចការនេះ ពិតណាស់ ជាការចូលរួមផ្សព្វផ្សាយឱ្យបានទូលំទូលាយអំពីសមុច្ច័យរបស់សារមន្ទីរខេត្តនីមួយៗ និងជាការផ្ដល់លទ្ធភាពដល់សាធារណជនអាចសិក្សាស្រាវជ្រាវឱ្យបានកាន់តែងាយស្រួល អំពីសម្បត្តិបេតិកភណ្ឌខ្មែរ ដែលស្ថិតនៅតាមបណ្ដាសារមន្ទីរខេត្តនានាទូទាំងប្រទេសកម្ពុជា»។
ស្ថានទូតអាមេរិកប្រចាំកម្ពុជាបញ្ជាក់ថា កាតាឡុកតាមអ៊ីនធឺណិត នៃវត្ថុសិល្បៈ សម្រាប់សារមន្ទីរថ្នាក់ខេត្តចំនួន ៦ខាងលើនេះ ជាគម្រោងដែលទទួលបានជំនួយថវិកាពីសហរដ្ឋអាមេរិក ដោយបានកែលម្អ និងធ្វើបច្ចុប្បន្នភាពនៃប្រព័ន្ធមូលដ្ឋានទិន្នន័យ ដែលរួមមានវត្ថុបូរាណ។
សហរដ្ឋអាមេរិកមានការប្តេជ្ញាចិត្តក្នុងការជួយដល់ការអភិរក្ស និងជួសជុលបេតិកភណ្ឌវប្បធម៌ដ៏សម្បូរបែបរបស់កម្ពុជា៕
.jpg)
