មណ្ឌលគិរីៈ ក្រសួងបរិស្ថានបានដាំកូនឈើ និងដើមអាកាស្សាចំនួន ១ ម៉ឺនដើមនៅលើផ្ទៃដីទំហំ ៦, ៥ហិកតាក្នុងដែនជម្រកសត្វព្រៃភ្នំព្រេច ដែលស្ថិតនៅក្នុងភូមិសាស្ត្រ ខេត្តមណ្ឌលគិរី ដើម្បីបង្កើនគម្របដីព្រៃឱ្យបានប្រសើរឡើង។
លោក សាយ សំអាល់ រដ្ឋមន្ត្រីក្រសួងបរិស្ថានបានថ្លែងថា ការដាំកូនរុក្ខជាតិអាកាស្សានាពេលនេះគឺជាការរួមចំណែកឆ្លើយតបទៅនឹងគោលនយោបាយគ្រប់គ្រង និងអភិរក្សធនធានធម្មជាតិប្រកបដោយនិរន្តរភាព ដើម្បីបំពេញនូវសេចក្តីត្រូវការចំពោះមុខ បន្ថយសម្ពាធលើការប្រើប្រាស់សម្ភារសំណង់ និងគ្រឿងសង្ហារិមដែលធ្វើអំពីឈើធម្មជាតិ ព្រមទាំងបំពេញសេចក្តីត្រូវការនៅក្នុងវិស័យឧស្សាហកម្មផងដែរ។
នៅក្នុងពិធីដាំស្ដារព្រៃឈើនិងក្លូនរុក្ខជាតិ រៀបចំថ្នាលបណ្ដុះកូនឈើ និងពិនិត្យការចិញ្ចឹមពូជសត្វក្របីនៅក្នុងដែនជម្រកសត្វព្រៃភ្នំព្រេចកាលពីថ្ងៃទី ១៩ ខែកញ្ញា លោកបានថ្លែងថា៖ «សហគមន៍យើងនីមួយៗគួរមានស្បៀងអាហារហូបគ្រប់គ្រាន់ ជីវភាពកាន់តែល្អប្រសើរ នេះជាកត្តាសំខាន់ក្នុងការការពារធនធានធម្មជាតិ»។
រដ្ឋមន្ត្រីរូបនេះបានសរសើរដល់មន្ត្រីឧទ្យានុរក្ស និងប្រជាសហគមន៍ដោយលោកចាត់ទុកថា ជាទ័ពស្រួច ដែលបានលះបង់កម្លាំងកាយ ចិត្ត និងពេលវេលា ដើម្បីការពារធនធានធម្មជាតិ និងអភិរក្សជីវចម្រុះជូនប្រទេសកម្ពុជា និងប្រជាជនកម្ពុជាគ្រប់ជំនាន់។
ក្រសួងបរិស្ថានបានរៀបចំផែនការដាំស្ដារព្រៃឈើចាប់ពីឆ្នាំ ២០២២ ដល់ឆ្នាំ ២០២៥ ក្នុងគោលបំណងបង្កើនគម្របដីព្រៃឱ្យបានប្រសើរឡើង និងផ្តល់ជូនមន្ត្រីឧទ្យានុរក្សនូវចំណេះដឹង បទពិសោធក្នុងការធ្វើក្លូនរុក្ខជាតិ ក៏ដូចជាបច្ចេកទេសដាំដុះ និងថែទាំចម្ការឈើដាំ ព្រមទាំងការផ្សព្វផ្សាយឱ្យបានទូលំទូលាយចំណេះដឹងបច្ចេកទេស និងឱកាសការងារជូនប្រជាពលរដ្ឋ និងអ្នកពាក់ព័ន្ធ។
ក្រសួងបរិស្ថានបានបញ្ជាក់នៅលើទំព័រហ្វេសប៊ុកនាថ្ងៃទី ១៩ ខែកញ្ញាថា៖ « ប្រភេទក្លូនឈើដែលដាំដុះពេលនេះជាប្រភេទឈើអាកាស្យា ចំនួន ១ ម៉ឺនដើម ដាំនៅលើផ្ទៃដីទំហំ ៦,៥ ហិកតា»។
ក្រសួងបរិស្ថានបានឱ្យដឹងដែរថា កូនអាកាស្យាចំនួន ៧ ០០០ ដើម ត្រូវបានបណ្តុះទុកសម្រាប់ធ្វើពូជ និងកូនអាកាស្យាចំនួន ១៧ ០០០ ដើម ត្រូវបានដាំរួចរាល់លើផ្ទៃដី ៨ ហិកតា។ពូជស្មៅចំណីសត្វត្រូវបានព្រោះលើផ្ទៃដីទំហំ ៦ ហិកតា សម្រាប់ជាចំណីរបស់សត្វក្របីចំនួន ៦០ ក្បាល ដែលទទួលបានពីក្រសួងបរិស្ថាន។
ក្នុងចំណោមសត្វក្របីចំនួន ៦០ ក្បាលនោះ មាន ១០ ក្បាល ត្រូវបានយកទៅចិញ្ចឹមនៅស្នាក់ការកែររពៅ និង ៥០ ក្បាលត្រូវបានយកទៅចិញ្ចឹមនៅស្នាក់ការខ្ទង់ ដោយបច្ចុប្បន្នកើនបានចំនួន ២ ក្បាលបន្ថែម។
ដោយឡែក ការសិក្សាពីក្រុមជំនាញជីវចម្រុះនៃក្រសួងបរិស្ថាន នាពេលថ្មីៗនេះបានបង្ហាញថា តំបន់បេតិភណ្ឌធម្មជាតិ ភ្នំព្រះគុហារហ្លួង និងតំបន់បេតិភណ្ឌធម្មជាតិ ភ្នំទទុង-ភ្នំតូច ស្ថិតក្នុងខេត្តកំពត មានថនិកសត្វចំនួន១២ប្រភេទ ល្មូនចំនួន ១៨ប្រភេទ និងថលជលិក (ក្រុមកង្កែប) ៨ ប្រភេទ។ ក្នុងនោះ ៣ ប្រភេទស្ថិតក្នុងក្រុមជិតផុតពូជបំផុត (CR) ២ ប្រភេទស្ថិតក្នុងក្រុមប្រភេទជិតផុតពូជ (EN) និង២ប្រភេទទៀតស្ថិតក្នុងក្រុមងាយទទួលរងគ្រោះ (VU)។
ក្រសួងបរិស្ថានបានឱ្យដឹងថា ប្រភេទជាច្រើនទៀតកំពុងស្ថិតក្នុងការកំណត់អត្តសញ្ញាណតាមបែបវិទ្យាសាស្ត្រ និងកំពុងស្ថិតក្នុងការសង្ស័យខ្ពស់ថា អាចជាប្រភេទថ្មី។ ក្រុមការងាររបស់ក្រសួងបរិស្ថានក៏បានប្រមូលសំណាកមួយចំនួនសម្រាប់រក្សាទុក និងសិក្សាបន្តផងដែរ។
កាលពីខែមករា ឆ្នាំ ២០២១ រាជរដ្ឋាភិបាលកម្ពុជាបានសម្រេចចេញអនុក្រឹត្យចំនួន ២ គឺអនុក្រឹត្យស្តីពីការបង្កើតតំបន់បេតិភណ្ឌធម្មជាតិ ភ្នំព្រះគុហារហ្លួងទំហំ ២៥ ហិកតា ស្ថិតក្នុងឃុំទូកមាសខាងលិច ស្រុកបន្ទាយមាស ខេត្តកំពត និងអនុក្រឹត្យស្តីពីការបង្កើតតំបន់បេតិភណ្ឌធម្មជាតិភ្នំទទុង-ភ្នំតូច ទំហំ៨៣ហិកតា ស្ថិតក្នុងស្រុកដងទង់ និងស្រុកបន្ទាយមាស ខេត្តកំពត។
តាមការសិក្សាស្រាវជ្រាវ ភ្នំនេះជាទីជម្រករបស់សត្វប្រចៀវស៊ីសត្វល្អិតរាប់សិបម៉ឺនក្បាលដែលអាចផលិតលាមកប្រចៀវសម្រាប់ប្រជាពលរដ្ឋយកទៅធ្វើជាជីធម្មជាតិគិតជាទឹកប្រាក់ប្រមាណជាង១០ម៉ឺនដុល្លារក្នុង ១ ឆ្នាំៗ៕