ភ្នំពេញៈ រាជរដ្ឋាភិបាលនឹងចេញផ្សាយរបាយការណ៍អង្កេតកសិកម្ម ឆ្នាំ ២០២០ នៅថ្ងៃទី ២២ ខែកញ្ញា ដើម្បីផ្សព្វផ្សាយរបាយការណ៍អង្កេតកសិកម្ម ស្ថិតក្រោមគំនិតផ្តួចផ្តើម ៥០x២០៣០ ដើម្បីលុបបំបាត់គម្លាតទិន្នន័យកសិកម្មនៅក្នុងប្រទេសដែលមានចំណូលទាប និងមធ្យមកម្រិតទាប។
អង្កេតកសិកម្ម ឆ្នាំ ២០២០ នេះ ត្រូវបានធ្វើឡើងរួមគ្នាដោយវិទ្យាស្ថានជាតិស្ថិតិ (NIS) នៃក្រសួងផែនការ (MoP) សហការជាមួយក្រសួងកសិកម្ម រុក្ខាប្រមាញ់ និងនេសាទ (MAFF) ដោយមានការគាំទ្របច្ចេកទេសពីអង្គការស្បៀង និងកសិកម្មនៃសហប្រជាជាតិ (FAO)។
យោងតាមលិខិតអញ្ជើញឱ្យចូលរួមការផ្សព្វផ្សាយនេះ ដែល ភ្នំពេញ ប៉ុស្តិ៍ ទទួលបាន នៅថ្ងៃទី ២០ ខែកញ្ញា បានឱ្យដឹងថា ការចេញផ្សាយរបាយការណ៍នេះ នឹងធ្វើឡើងចាប់ពីម៉ោង ៨:០០ ព្រឹក ដល់ម៉ោង ៤:០០ ល្ងាច នៅសណ្ឋាគារភ្នំពេញ ហើយនឹងមានអ្នកចូលរួមប្រមាណ ២០០ នាក់ មកពីមន្ទីរកសិកម្ម រុក្ខាប្រមាញ់ និងនេសាទ និងមន្ទីរផែនការ រួមជាមួយដៃគូអភិវឌ្ឍន៍ និងស្ថាប័នស្រាវជ្រាវមួយចំនួន។
លិខិតនេះបញ្ជាក់ថា៖ «កម្មវិធីនេះ នឹងប្រព្រឹត្តទៅដោយមានការធ្វើបទបង្ហាញលម្អិតអំពី វិធីសាស្ត្រប្រើប្រាស់ក្នុងការធ្វើអង្កេតកសិកម្ម ការរកឃើញសំខាន់ៗ និងឧទាហរណ៍នៃការប្រើប្រាស់ទិន្នន័យផងដែរ។ អ្នកចូលរួមនឹងបានស្វែងយល់ពីរបៀបចូលប្រើទិន្នន័យនៃរបាយការណ៍អង្កេតកសិកម្ម ២០២០ (តារាងសរុប និងតារាងទិន្នន័យលម្អិត) ពីវេទិកាអនឡាញរបស់វិទ្យាស្ថានជាតិស្ថិតិ»។
លិខិតនេះ ក៏បានអះអាងទៀតថា អ្នកចូលរួម នឹងទទួលបាន ព័ត៌មានបន្ថែមអំពីសកម្មភាពដែលកំពុងអនុវត្ត និងអនុវត្តបន្តនៅពេលអនាគត ក្រោមកម្មវិធីអង្កេតកសិកម្មកម្ពុជា និងជំរឿនកសិកម្មកម្ពុជា។
តាមការអះអាង អង្កេតកសិកម្មឆ្នាំ ២០២០ បានប្រមូលព័ត៌មានស្តីពីការដាំដុះដំណាំ ការចិញ្ចឹមបសុសត្វ និងបសុបក្សី ការធ្វើវារីវប្បកម្ម និងការនេសាទ ព្រមទាំងកម្រិតអសន្តិសុខស្បៀងដែលគ្រួសារកសិកម្ម បានជួបប្រទះ ផលប៉ះពាល់នៃជំងឺកូវីដ ១៩ លើវិស័យកសិកម្ម និងព័ត៌មានជាច្រើនទៀត។
ការអង្កេតនេះ ក៏បានប្រមូលទិន្នន័យពីការកាន់កាប់កសិកម្ម ជាលក្ខណៈគ្រួសារ និងការកាន់កាប់សហគ្រាសកសិកម្មខ្នាតធំប្រមាណ ១៥ ០០០ ការកាន់កាប់កសិកម្មនៅចន្លោះខែធ្នូ ឆ្នាំ ២០២០ ដល់ខែមករា ឆ្នាំ ២០២១ ដោយមានមន្ត្រីចូលរួមសរុបចំនួន ៤២៩ នាក់ មកពីមន្ទីរផែនការ និងមន្ទីរកសិកម្ម រុក្ខាប្រមាញ់ និងនេសាទខេត្ត។
អង្គការស្បៀង និងកសិកម្មនៃសហប្រជាជាតិ បានឱ្យដឹងនៅក្នុងលិខិតដដែលថា គំនិតផ្តួចផ្តើម ៥០x២០៣០ មានគោលបំណងលុបបំបាត់គម្លាតទិន្នន័យកសិកម្មនៅក្នុងប្រទេសដែលមានចំណូលទាប និងមធ្យមកម្រិតទាបចំនួន ៥០ នៅត្រឹមឆ្នាំ ២០៣០។ អង្គការនេះ បានបន្តថា គំនិតផ្តួចផ្តើម ៥០x២០៣០ នេះនឹងប្រើប្រាស់សម្រាប់គាំទ្រដល់គោលដៅអភិវឌ្ឍន៍ប្រកបដោយចីរភាព (SDGs) ទាក់ទងនឹងកសិកម្មរបស់ប្រទេសទាំងនេះ។
អង្គការនេះបានបញ្ជាក់ថា៖ «កម្ពុជាជាប្រទេសដំបូងគេដែលបានចូលរួមក្នុងគំនិតផ្តួចផ្តើមនេះនៅអាស៊ី។ ចំណុចស្នូលមួយនៃគំនិតផ្តួចផ្តើម ៥០x២០៣០ គឺការផ្តល់ទិន្នន័យដោយឥតគិតថ្លៃ ដើម្បីឱ្យស្ថាប័នស្រាវជ្រាវ អ្នករៀបចំគោលនយោបាយ និងដៃគូអភិវឌ្ឍន៍នានាអាចប្រើប្រាស់ទិន្នន័យដែលថ្មី និងមានគុណភាពខ្ពស់ជំនួយដល់ការធ្វើការ សម្រេចចិត្តបានត្រឹមត្រូវ និងច្បាស់លាស់»។
តាមអង្កេតកសិកម្មឆ្នាំ ២០២០ បានប៉ាន់ប្រមាណថា ការកាន់កាប់កសិកម្មលក្ខណៈគ្រួសារមានប្រមាណជាង ២ លាន គ្រួសារក្នុងប្រទេសកម្ពុជា ឬប្រហែល ៥៧ ភាគរយនៃគ្រួសារទាំងអស់នៅក្នុងប្រទេស។ ក្នុងចំណោមគ្រួសារកសិកម្មទាំងអស់នៅក្នុងប្រទេសកម្ពុជាមានប្រមាណ ៩៤ ភាគរយ បានរាយកាណ៍ពីសកម្មភាពដាំដំណាំ ខណៈដែល ៨២ ភាគរយ នៃគ្រួសារកសិកម្មទាំងអស់បានរាយការណ៍ពីការចិញ្ចឹម បសុសត្វ បសុបក្សី ឬសត្វល្អិត និងមានប្រហែល ៩៧ ភាគរយ នៃគ្រួសារកសិកម្មបានចូលរួមក្នុងសកម្មភាពនេសាទ និង ៦ ភាគរយ មានសកម្មភាពពាក់ព័ន្ធនឹងវារីវប្បកម្ម៕