ស្ទឹងត្រែងៈ ក្រសួងបរិស្ថាន និងអាជ្ញាធរខេត្តស្ទឹងត្រែងបានដុតបំផ្លាញអាវុធកែច្នៃ និងអន្ទាក់សត្វ ចំនួនប្រមាណ ៣ ៧០០ ដើម រួមទាំងអន្ទាក់ នៅខេត្តស្ទឹងត្រែង ដើម្បីជានិមិត្តសញ្ញានៃការបញ្ចប់ការគំរាមកំហែងសត្វព្រៃនៅក្នុងតំបន់ការពារធម្មជាតិ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ប្រាប់ ភ្នំពេញ ប៉ុស្តិ៍ នាថ្ងៃទី ២០ ខែកញ្ញាថា វត្ថុតាងដែលត្រូវកម្ទេចចោលទាំងនេះ រូមមានកាំភ្លើងកែច្នៃប្រភេទខ្យល់ ៣១ ដើម កាំភ្លើងកែច្នៃប្រភេទកាប៊ិន ៦៤ ដើម ស្នាតេះ ៦១ ដើម ក្បាលឆក់ ៧១ គ្រឿង ខ្សែអន្ទាក់ ៣ ៣២៧ ខ្សែ មងដាក់ស្វាចំនួន ២៦ ត្បូង ដាយ ៦០ ម៉ែត្រ និងអង្គប់ ៥៨ អង្គប់។
លោកថ្លែងថា៖ «ការដុតបំផ្លាញនូវអន្ទាក់នេះគឺជានិមិត្តសញ្ញានៃការបញ្ចប់ កុំឱ្យវាមានការគំរាមកំហែងដោយអន្ទាក់នៅក្នុងតំបន់ការពារធម្មជាតិទៀត ដើម្បីធ្វើម៉េចផ្តល់នូវជម្រកសុវត្ថិភាពជូនដល់ជីវចម្រុះ ដល់សត្វព្រៃ ដល់ប្រជាពលរដ្ឋដែលចូលទៅប្រមូលនូវអនុផលព្រៃឈើ ជូនទៅដល់ប្រជាពលរដ្ឋដែលជាភ្ញៀវទេសចរដែលដើរទស្សនានៅក្នុងព្រៃ»។
លោក សាយ សំអាល់ រដ្ឋមន្ត្រីក្រសួងបរិស្ថានថ្លែងថា ការការពារធនធានធម្មជាតិ គឺជាការរក្សាលំនឹងបរិស្ថាន ធ្វើយ៉ាងណាឱ្យប្រជាសហគមន៍ និងឧទ្យានុរក្សទទួលបាននូវជីវភាព និងសុខុមាលភាពកាន់តែប្រសើរជាងមុន។ ជម្រើសថ្មីសម្រាប់ឧទ្យានុរក្ស និងប្រជាសហគមន៍ គឺការដាំចម្ការឈើដាំដូចជា ប្រភេទដើមអាកាស្យា ការដាំដំណាំហូបផ្លែ ដំណាំបន្ទាប់បន្សំ ការចិញ្ចឹមសត្វជុំវិញផ្ទះ និងក្នុងសហគមន៍ ដើម្បីធានាសន្តិសុខស្បៀង និងកាត់បន្ថយសម្ពាធទៅលើការពឹងអាស្រ័យលើធនធានធម្មជាតិទាំងស្រុង។
លោកថ្លែងដូច្នេះក្នុងពិធីដុតបំផ្លាញអាវុធកែច្នៃ និងអន្ទាក់សត្វ ស្ថិតក្នុងសាលាឃុំសៀមបូក ស្រុកសៀមបូក នាថ្ងៃទី ២០ ខែកញ្ញា ដោយមានការចូលរួមពីមន្ត្រីក្រសួងបរិស្ថាន អាជ្ញាធរក្នុងខេត្តស្ទឹងត្រែង មន្ត្រីឧទ្យានុរក្ស និងប្រជាសហគមន៍។
លោក សាយ សំអាល់ បន្តថា គោលដៅដ៏សំខាន់ក្នុងវិស័យបរិស្ថានគឺការប្រែក្លាយពីទំនៀមទម្លាប់នៃការពឹងអាស្រ័យអនុផលព្រៃឈើលើជីវភាពរស់នៅរបស់ប្រជាពលរដ្ឋក្នុងមូលដ្ឋានឱ្យទៅជាការចូលរួមអភិរក្សធនធានធម្មជាតិ និងជីវចម្រុះគ្រប់ប្រភេទ នៅក្នុងតំបន់ការពារធម្មជាតិ និងការរស់នៅដោយចីរភាព។
លោកថ្លែងថា៖ «ក្រសួងបរិស្ថាន រួមជាមួយអាជ្ញាធរមូលដ្ឋាន បានផ្តល់ជម្រើសថ្មីជូនប្រជាសហគមន៍ តាមរយៈការរក្សាព្រៃឈរ បង្កើនចំណូល ដើម្បីលើកកម្ពស់ជីវភាពសហគមន៍មូលដ្ឋាន»។
លោករដ្ឋមន្ត្រីក៏បានពិនិត្យការដាំស្មៅចំណីសត្វ និងការចិញ្ចឹមគោពូជចំនួន ៥០ ក្បាល ដែលបានប្រគល់ជូនមន្ត្រីឧទ្យានុរក្សនៅស្នាក់ការរងដែនជម្រកសត្វព្រៃ-ព្រៃឡង់ សៀមបូកផងដែរ៕