ភ្នំពេញៈ រាជរដ្ឋាភិបាល ប្រកាសតួលេខ ២០០ ដុល្លារ ជាប្រាក់ឈ្នួលអប្បបរមា ផ្នែកវាយនភណ្ឌកាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូបសម្រាប់អនុវត្តក្នុងឆ្នាំ ២០២៣ ដោយបន្ថែមចំនួន ២ ដុល្លារ ពីលើតួលេខ ១៩៨ ដុល្លារ ដែលជាតួលេខឈ្នះក្នុងការបោះឆ្នោតដោយសំឡេងច្រើនលើសលប់។ នេះបើតាមសេចក្តីថ្លែងការណ៍របស់ក្រុមប្រឹក្សាជាតិប្រាក់ឈ្នួលអប្បបរមា។
នៅថ្ងៃទី ២១ ខែកញ្ញា ក្រុមប្រឹក្សាជាតិប្រាក់ឈ្នួលអប្បបរមាបានសម្រេចបោះឆ្នោតលើតួលេខចំនួន ៤ បន្ទាប់ពីការចរចា របស់សមាជិកទាំង៣ មិនមានចំណុចរួម។ ការបោះឆ្នោតនេះ ទទួលបានលទ្ធផលលើតួលេខ ១៩៨ មានសំឡេងគាំទ្រ ៤៦ សំឡេង និងតួលេខ ២១៣ មានសំឡេងគាំទ្រ ៥ សំឡេង ឯតួលេខ ២១០ និងតួលេខ ២០៦ មានសំឡេងគាំទ្រ ០ សំឡេង។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជា បានប្រាប់ ភ្នំពេញ ប៉ុស្តិ៍ នៅព្រឹកនេះថា៖ «ប្រាក់ឈ្នួលសម្រេចហើយ ២០០ ដុល្លារ សម្រាប់ ២០២៣។ អង្គប្រជុំ សម្រេច ១៩៨ បូក សម្តេច[នាយករដ្ឋមន្ត្រីហ៊ុន សែន] បន្ថែម ២ ដុល្លារ ដូច្នេះ សរុប ២០០ ដុល្លារ»។
កាលពីឆ្នាំ ២០២១ ក្រោយក្រុមប្រឹក្សាជាតិប្រាក់ឈ្នួលអប្បបរមាសម្រេចស្នើតួលេខ ១៩២ ដុល្លារ យកមកអនុវត្តក្នុងឆ្នាំ ២០២២ លោកនាយករដ្ឋមន្ត្រី ហ៊ុន សែន ប្រកាសបន្ថែមទឹកប្រាក់ ២ ដុល្លារទៀត ពីលើការស្នើនេះ នាំឱ្យប្រាក់ឈ្នួលសម្រាប់អនុវត្តក្នុងឆ្នាំ ២០២២ ឡើងដល់ ១៩៤ ដុល្លារ ក្នុង ១ ខែ។
វីដេអូ៖