ភ្នំពេញៈនៅកម្ពុជាអ្នកដែលបានដឹងពីស្ថានភាពផ្ទុកមេរោគអេដស៍របស់ខ្លួនទើបសម្រេចបានចំនួន ៨៤ ភាគរយក្នុងចំណោមអ្នក ដែលបានធ្វើរោគវិនិច្ឆ័យ និងទទួលការព្យាបាល ៩៩ ភាគរយ និង ៩៧ ភាគរយនៃអ្នកផ្ទុកមេរោគអេដស៍បានទទួលការព្យាបាល ខណៈរាជរដ្ឋាភិបាលកម្ពុជាបានប្តេជ្ញាចិត្ត ដើម្បីសម្រេចបាននូវគោលដៅ ៩៥-៩៥-៩៥ ។
លោក អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បានថ្លែងនៅក្នុងសិក្ខាសាលាជាន់ខ្ពស់ឆ្លុះបញ្ចាំងអំពីការឆ្លើយតបនឹងមេរោគអេដស៍ និងជំងឺអេដស៍បែបពហុវិស័យនៅកម្ពុជាកាលពីថ្ងៃទី ២០ ខែកញ្ញាថា នេះមានន័យថា ការរាលដាលមេរោគអេដស៍បាននិងកំពុងបន្តពីចំណោមប្រជាជនចំនួន ១១ ០០០ នាក់ (ក្នុងនោះមានប្រជាជនគន្លឹះ និងដៃគូរបស់គាត់) ដែលមិនទាន់បានធ្វើតេស្ត និងព្យាបាលនៅក្នុងប្រព័ន្ធថែទាំសុខភាព។
លោកបន្តថាសិក្ខាសាលានៅពេលនេះផ្តោតលើការពង្រឹងយន្តការសម្របសម្រួលសម្រាប់អនុវត្តអាទិភាពសំខាន់ៗនៃអនុសាសន៍ការត្រួតពិនិត្យពាក់កណ្តាលអាណត្តិពីផែនការយុទ្ធសាស្ត្រជាតិលើកទី ៥ សម្រាប់ការឆ្លើយតបទូលំទូលាយ និងពហុវិស័យចំពោះមេរោគអេដស៍ និងជំងឺអេដស៍ (NSPV MTR)។
លោកថ្លែងថា៖ «ទាំងនេះគឺបានន័យថាយើងរំពឹងស្វែងយល់ពីសិក្ខាសាលា និងរកឱ្យឃើញនូវរបៀបពង្រឹងប្រព័ន្ធប្រទេស ដើម្បីឆ្លើយតបទៅនឹងមេរោគអេដស៍និងជំងឺអេដស៍ប្រកបដោយប្រសិទ្ធភាពប្រសិទ្ធផល និងនិរន្តរភាពតាមរយៈយន្តការដែលមានអាយុ ៣១ ឆ្នាំហើយ »។
បើតាម លោក អៀង មូលី រាជរដ្ឋាភិបាលកម្ពុជាបានប្តេជ្ញាចិត្ត ដើម្បីសម្រេចបាននូវគោលដៅ ៩៥-៩៥-៩៥ និងធានាថា ការឆ្លងថ្មីនៃមេរោគអេដស៍មានចំនួនតិចជាង ៣០០ ករណីក្នុង ១ ឆ្នាំៗនៅឆ្នាំ ២០២៥។ ការឆ្លើយតបរបស់ប្រទេសកម្ពុជាចំពោះការរាលដាលនៃមេរោគអេដស៍ត្រូវបានចាត់ទុកថា ជារឿងជោគជ័យមួយនៅក្នុងតំបន់ និងក្នុងពិភពលោក។
លោក ជួប សុខចំរើន នាយកប្រតិបត្តិអង្គការ KHANA ប្រាប់ភ្នំពេញប៉ុស្តិ៍នៅថ្ងៃទី ២១ ខែកញ្ញាថា ជាទិសដៅរបស់កម្ពុជានៅឆ្នាំ ២០២៥ គឺប្រាថ្នាសម្រេចឱ្យបានឱ្យបានចំនួន ៩៥ ភាគរយទាំង ៣ ទិសដៅពោលគឺទី ១- ក្នុងចំណោមអ្នកដែលផ្ទុកមេរោគអេដស៍ចំនួន ៩៥ ភាគរយបានដឹងពីស្ថានភាពរបស់ខ្លួនទី ២- ចំនួន ៩៥ ភាគរយបានធ្វើរោគវិនិច្ឆ័យ និងទទួលការព្យាបាល និងទី ៣- មានចំនួន ៩៥ ភាគរយមានមេរោគអេដស៍ទាបបំផុត ។
លោកបន្តថា ទោះជាយ៉ាងណា មកទល់ឆ្នាំ ២០២២ នេះ គោលដៅទី ១- ចំនួន ៩៥ ភាគរយនៃអ្នកផ្ទុកមេរោគអេដស៍នៅកម្ពុជា អ្នកដឹងខ្លួនសម្រេចបានតែ ៨៤ ភាគរយទេ។ដោយឡែកគោលដៅទី ២ និងគោលដៅទី ៣ កម្ពុជាបានសម្រេចជាស្ថាពរ ។ ប៉ុន្តែសម្រាប់គោលដៅទី ១ នៅតែជាឧបសគ្គ ដោយសារតែខ្វះខាតធនធាន និងសហការពីគ្រប់ភាគីពាក់ព័ន្ធ និងពហុវិស័យ ។
លោកថ្លែងថា៖ «យើងសម្រេចបាន ៨៤ ភាគរយនៃគោលដៅនេះគឺ ដោយសារការដឹកនាំរបស់រដ្ឋាភិបាលដែលបានជំរុញឱ្យកម្ពុជាមានភាពជោគជ័យនៅក្នុងការឆ្លើយតបនឹងមេរោគអេដស៍ និងជំងឺអេដស៍នៅក្នុងប្រទេស។ មួយទៀតគឺការធ្វើពហុវិស័យមានន័យថា គ្រប់ភាគីពាក់ព័ន្ធទាំងអស់បានចូលរួមឆ្លើយតបមេរោគអេដស៍ និងជំងឺអេដស៍តាំងពីចាប់ផ្តើម »។
បើតាមឯកសារដែលចេញផ្សាយដោយអង្គការ UNAIDS - Factsheet 2022 - Cambodia HIV Statistic នៅកម្ពុជាមានអ្នករស់នៅដោយផ្ទុកមេរោគអេដស៍មានចំនួន ៧៤ ០០០ នាក់ក្នុងឆ្នាំ ២០២១ ហើយករណីឆ្លងថ្មីនៃមេរោគអេដស៍គឺ មានចំនួន ១១០០ នាក់ក្នុងឆ្នាំ ២០២១ ហើយគិតត្រឹមឆ្នាំ ២០២១ អ្នកផ្ទុកមេរោគអេដស៍ ដែលកំពុងទទួលបានការព្យាបាលដោយថ្នាំប្រឆាំងនឹងមេរោគអេដស៍គឺមានចំនួន ៦២ ៥៦១ នាក់។
ជារៀងរាល់ថ្ងៃមានមនុស្សចំនួន ៣ នាក់បានឆ្លងមេរោគអេដស៍។ ក្នុងចំណោមអ្នកឆ្លងថ្មី ១ ១០០ នាក់ក្នុងឆ្នាំ ២០២១ គឺបុរស និងក្មេងប្រុសមានរហូតដល់ ៧១ ភាគរយ ហើយអ្នកឆ្លងច្រើនជាងគេមានអាយុចន្លោះពី ១៥ ទៅ ២៤ ឆ្នាំ ដែលមានប្រមាណ ៤២ ភាគរយ ។
ទិន្នន័យនៃការជំរឿនសុខភាព និងប្រជាសាស្ត្រ (DHS) 2021-2022 បានបង្ហាញថា មានតែក្រុមយុវវ័យ អាយុ ១៥ ទៅ ២៤ ឆ្នាំ ប្រមាណ ២៣ ភាគរយ ប៉ុណ្ណោះដែលមានចំណេះដឹងទូលំទូលាយអំពីមេរោគអេដស៍ និងជំងឺអេដស៍ដែលតួលេខនេះមានការធ្លាក់ចុះពី ៣៨ ភាគរយក្នុងឆ្នាំ ២០១៤ និង ធ្លាក់ចុះ ពី ៤៤ ភាគរយក្នុងឆ្នាំ ២០១០។
នៅត្រឹមឆ្នាំ ២០២៥ កម្ពុជាប្រាថ្នាចង់ឃើញការឆ្លងថ្មីស្ថិតក្នុងចំនួន ឬតិចជាង ២៥០ ករណីក្នុង ១ ឆ្នាំ។ ដូច្នេះការខិតខំពីពេលនេះ ដល់ឆ្នាំ ២០២៥ នៅតិចណាស់ហើយគប្បីត្រូវបន្ថែមល្បឿន ដើម្បីផ្សព្វផ្សាយឱ្យមានការយល់ដឹងកាន់តែទូលំទូលាយអំពីការឆ្លងមេរោគអេដស៍ និងជំងឺអេដស៍ក្នុងចំណោមក្រុមមនុស្សដែលមានវ័យពី ១៥ ដល់ ២៤ ឆ្នាំ៕