ភ្នំពេញៈក្រសួងទេសចរណ៍ ប្រកាសជ្រើសរើសសិស្សនិស្សិត ឱ្យចូលរួមការប្រកួតសរសេរគម្រោង «ផែនការអភិវឌ្ឍន៍គោលដៅទេសចរណ៍គំរូ» ដើម្បីរៀបចំផែនការអភិវឌ្ឍន៍ទេសចរណ៍គំរូ នៅក្នុងខេត្តសៀមរាប បំណងផ្តល់ឱកាសឱ្យយុវជនបានបញ្ចេញស្នាដៃ និងគំនិត។
តាមសេចក្តីប្រកាសរបស់ក្រសួងទេសចរណ៍ បានឱ្យដឹងថា ការប្រកួតសរសេរគម្រោង «ផែនការអភិវឌ្ឍន៍គោលដៅទេសចរណ៍គំរូ» នឹងផ្តល់អត្ថប្រយោជន៍ដល់បេក្ខជនជយលាភីចំនួន ៣ ចាប់ពីលេខ ១ ដល់លេខ ៣ នូវទឹកប្រាក់លើក ទឹកចិត្តចាប់ពី ២ លានរៀល ដល់ ៥ លានរៀល និងទទួលបានលិខិតសរសើរ ចេញដោយក្រសួងទេសចរណ៍ ព្រមទាំងទទួលបានបណ្ណដំណើរកម្សាន្តទៅតំបន់ទេសចរណ៍មួយចំនួនផងដែរ។
សេចក្តីប្រកាសដដែល បានបញ្ជាក់ថា៖ «លក្ខខណ្ឌនៃការជ្រើសរើស គឺសំដៅទៅលើនិស្សិតស្ថិតក្នុងជំនាញទេសចរណ៍ឆ្នាំទី ៤ ត្រូវមានកាយសម្បទារឹងមាំ និងសុខភាពផ្លូវចិត្តប្រក្រតី។ បេក្ខជនត្រូវគោរពតាមបទបញ្ជា និងគោលការណ៍នៃកម្មវិធី និងត្រូវឆ្លងកាត់វគ្គសម្ភាសន៍ដោយជោគជ័យ។ បេក្ខជនត្រូវមានឆន្ទៈក្នុងការធ្វើការជាក្រុម និងចុះកម្មសិក្សាទៅ កាន់គោលដៅទេសចរណ៍ដែលបានកំណត់» ។
លោក គន្ធា ភិរម្យ ប្រធានការិយាល័យផ្សព្វផ្សាយទេសចរណ៍ក្នុងស្រុក ព័ត៌មានវិទ្យា និងគ្រប់គ្រងព័ត៌មានទេសចរណ៍ នៃក្រសួងទេសចរណ៍ បានប្រាប់ ភ្នំពេញ ប៉ុស្តិ៍ នៅថ្ងៃទី ២១ ខែកញ្ញា ថា កន្លងទៅ ក្រសួងទេសចរណ៍ មានយុទ្ធសាស្ត្រផែនការរយៈពេលវែង និងរយៈពេលមធ្យមជាច្រើន ដើម្បីអភិវឌ្ឍគោលដៅទេសចរណ៍នៅកម្ពុជា។ បន្ថែមពីនេះ លោក ថា ដោយសារតែ ២ ឆ្នាំកន្លះមកនេះ កម្ពុជា ទទួលរងផលប៉ះពាល់ពីជំងឺកូវីដ ១៩ ក្រសួង ក៏បានបង្កើតផែនការជាបន្តបន្ទាប់ ដើម្បីជួយស្ដារវិស័យទេសចរណ៍ឡើងវិញ។
លោក អះអាងថា៖ «ចំពោះការរៀបចំជាការប្រកួតប្រជែង រៀបចំផែនការគោលដៅអភិវឌ្ឍន៍ទេសចរណ៍គំរូ នៅក្នុងខេត្តសៀមរាបនេះ គឺជាផ្នែកមួយ។ គោលបំណងរបស់យើងនេះ គឺចង់ឱ្យសិស្សនិស្សិតតាមសាកលវិទ្យាល័យដែលរៀនជំនាញទេសចរណ៍ ចូលរួមបញ្ចេញយោបល់មតិ និងទទួលបានបន្ថែមពីការរៀនទ្រឹស្តីនៅសាកលវិទ្យាល័យរបស់ពួកគាត់» ។
លោក គន្ធា ភិរម្យ ថ្លែងថា៖ «យើងរៀបចំគម្រោងនេះ ដើម្បីឱ្យគាត់មានឱកាសបញ្ចេញស្នាដៃ គំនិត ហើយក្រសួង នឹងទទួលយកគំនិតល្អៗ ដើម្បីជាចក្ខុវិស័យរបស់និស្សិតទេសចរណ៍ដែលក្រសួងមានផែនការជាហូរហែមកហើយ» ។
លោក គន្ធា ភិរម្យ ថ្លែងថា តាមផែនការដែលក្រសួងរៀបចំក្នុងគម្រោងនេះ នឹងយកលទ្ធផលនៃផែនការអភិវឌ្ឍន៍គោលដៅទេសចរណ៍គំរូរបស់និស្សិតឈ្នះជយលាភី ៣ ក្រុម យកទៅអភិវឌ្ឍក្នុងខេត្តសៀមរាប ហើយនិស្សិត ដែលត្រូវបានជ្រើសរើស នឹងមានឱកាសចុះទៅទស្សនានៅស្រុកបន្ទាយស្រី ខេត្តសៀមរាប។
លោក បានបញ្ជាក់ថា៖ «មកដល់បច្ចុប្បន្ន ក្រសួងបានទទួលក្រុមស្ម័គ្រចិត្តបានប៉ុន្មានក្រុមនៅឡើយទេ បន្ទាប់ពីបានប្រកាសជ្រើសរើសជាផ្លូវការ ហើយការកំណត់ឈប់ទទួលពាក្យ នឹងធ្វើឡើងអំឡុងពេលភ្ជុំបិណ្ឌមកដល់។ នៅឆ្នាំនេះ យើងរៀបចំជាគម្រោងនេះផង ហើយវាក៏ជាវិធីសាស្ត្រក្នុងការផ្សព្វផ្សាយទេសចរណ៍ក្នុងខេត្តសៀមរាបផងដែរ» ។
បើតាមក្រសួងទេសចរណ៍ បានអះអាងថា គម្រោងដឹកនាំក្រុមនិស្សិតជាប់ជយលាភីទាំង ៣ ក្រុម អាចនឹងធ្វើឡើងនៅពាក់កណ្តាលខែតុលា ឆ្នាំ ២០២២ បន្ទាប់ពីក្រុមការងារ បានជ្រើសរើសស្នាដៃដែលលេចធ្លោក្នុងចំណោមបេក្ខជន ដែលចូលរួមទាំងអស់៕