The Phnom Penh Post Search

Search form




Logo of Phnom Penh Post newspaper Phnom Penh Post - លោក ហេង សំរិន​ ព្រមាន​កុំឱ្យ​ចង់​សាក​រសជាតិ​សង្គ្រាម​ ខណៈ​លោក ​កឹម​ សុខា​ រំឭក​ពី​លម្ហសេរីភាព​របស់ខ្លួន​

លោក ហេង សំរិន​ ព្រមាន​កុំឱ្យ​ចង់​សាក​រសជាតិ​សង្គ្រាម​ ខណៈ​លោក ​កឹម​ សុខា​ រំឭក​ពី​លម្ហសេរីភាព​របស់ខ្លួន​

Content image - Phnom Penh Post
លោក ហេង សំរិន ប្រធានរដ្ឋសភា ក្នុងពិធីកាន់បិណ្ឌទី១២ នៅវត្តត្រពាំងព្រីង ខេត្តត្បូងឃ្មុំ។ រូបថត រដ្ឋសភា

លោក ហេង សំរិន​ ព្រមាន​កុំឱ្យ​ចង់​សាក​រសជាតិ​សង្គ្រាម​ ខណៈ​លោក ​កឹម​ សុខា​ រំឭក​ពី​លម្ហសេរីភាព​របស់ខ្លួន​

ត្បូងឃ្មុំៈ ​ប្រធានរដ្ឋសភា​និង​ជា​ប្រធាន​កិ​ត្ត​យស​គណបក្ស​ប្រជាជន​កម្ពុជា​លោក ហេង សំរិន បញ្ជាក់​ជាថ្មី​ប្រាប់​ពលរដ្ឋ​ថា​សូមកុំ​ចង់​សាកល្បង​ជាថ្មី​ម្តងទៀត​ចំពោះ​សង្គ្រាម ចម្បាំង រាំងជល ដែលនាំឱ្យ​ជាតិ​វិនាស​អន្តរាយ​ ខណៈដែល​អ​តី​អនុ​ប្រធានសភា​លោក ​កឹម​ សុខា​ រំឭក​ពី​សេរីភាព​រួម​តូច​របស់ខ្លួន​នៅ​ថ្ងៃ​វេន​បិណ្ឌ​ទី​១២​។​

លោក​​ ហេង សំរិន ​បានធ្វើ​បុណ្យ​ដាក់​បិណ្ឌ​នៅ​ វត្ត​ត្រពាំង​ព្រីង ឃុំ​ត្រពាំង​ផ្លុ​ង ស្រុក​ពញាក្រែក​ ខេត្ត​ត្បូងឃ្មុំ​ នាថ្ងៃទី ​២២ ​ខែកញ្ញា​ ដែលជា​ស្រុកកំណើត​របស់លោក​។​ ចំពោះ​អតីត​អនុប្រធាន​សភា​លោក ​កឹម សុខា បានធ្វើ​បុណ្យ​ដាក់​បិណ្ឌ​នៅ​ខេត្តដែល​ជាទី​កំណើត​របស់ខ្លួន​ដែរ​។

លោក ហេង សំរិន ថ្លែងទៅកាន់​ពលរដ្ឋ​ដោយ​លើកឡើង​ពី​តម្លៃ​នៃ​សុខសន្តិភាព ដែលរកម​កបាន​ដោយ​លំបាកលំបិន​បំផុត​។ លោក​គូសបញ្ជាក់ថា​៖ «​សូមកុំ​ចង់​សាកល្បង​ជាថ្មី​ម្តងទៀត​ចំពោះ​សង្គ្រាម ចម្បាំង រាំងជល ដែល​ប្រជាជាតិ​កម្ពុជា​ធ្លាប់បាន​ហែល​ឆ្លងកាត់​អស់​ជាច្រើន​ឆ្នាំ​នាពេល​កន្លងទៅ​»​។​

លោក ហេង សីរិន បានរំឭកពី​ការកាន់កាប់​ប្រទេសជាតិ​ដោយ​របប​ខ្មែរក្រហម​មានការ​កាប់​សម្លាប់​ប្រជាជន​ស្លូតត្រង់​អស់​រាប់លាន​នាក់ និង​បាន​បំបាត់​សាសនា​ជាដើម​។ លោក ហេង សំរិន ថ្លែងថា​៖ «យើងទាំងអស់គ្នា​ត្រូវតែ​ចងចាំ​ពី​ផលវិបាក​នៃ​សង្គ្រាម ដោយ​ត្រូវ​រួបរួមគ្នា​ក្នុងការ​ថែរក្សា​សុខ សន្តិភាព​ដែល​យើង​កំពុងមាន​ដូច​សព្វថ្ងៃ ហើយ​ត្រូវ​បន្ត​ខិតខំ​ក្នុងការ​អភិវឌ្ឍ​ប្រទេសជាតិ​ឱ្យមាន​ការរីកចម្រើន​បន្ថែមទៀត​»​។​

ចំពោះ​លោក កឹម សុខា ​វិញ​មិនបាន​កាន់​ក្បាល​មេក្រូ​ថ្លែងការណ៍​ទៅកាន់​ពុទ្ធបរិស័ទ​ទេ​តែ​លោក​ជួប​សំណេះសំណាល​ដោយផ្ទាល់​មាត់​ប៉ុណ្ណោះ​។ លោក ​កឹម សុខា សរ​សេរ​ក្នុង​ហ្វេ​ស​ប៊ុ​ក​របស់ខ្លួន​ថា៖ «​ក្នុងនាម​ជា​ខ្មែរ និង​ជា​ពុទ្ធសាសនិក ទោះបី​មានការ​រំខាន​ផ្លូវកាយ ផ្លូវចិត្ត និង​សិទ្ធិ សេរីភាព​យ៉ាងណា ក៏​ខ្ញុំ​នៅតែ​ស្មោះត្រង់​ចំពោះ​ប្រជាជាតិ​ខ្មែរ មិន​នាំ​បរទេស​ណា​មក​ឈ្លានពាន​ទឹកដី​ខ្មែរ មិន​បំផ្លិចបំផ្លាញ​ធនធាន​ទ្រព្យសម្បត្តិ​ជាតិខ្មែរ មិន​ប្រទូសរ៉ាយ និង​មិន​កាប់សម្លាប់​ប្រជាពលរដ្ឋ​ខ្មែរ​ជាដាច់ខាត​។ ​កតញ្ញូ​ចំពោះ​មាតុភូមិ​កម្ពុជា ចំពោះ​អ្នកមានគុណ ទាំង​ព្រះ​រស់ ទាំង​បុព្វការី​ជន​ដែល​បាន​ចែក​ឋាន​ទៅ គឺជា​គុណធម៌​របស់​មនុស្ស​ដែលមាន​សីល​»​។​

លោក កឹម សុខា បាន​រំឭកទស្សនៈ​ព្រះពុទ្ធសាសនា​នៃ​ដំណើរ​ជីវិត​សត្វលោក ដែលមាន​ទុក្ខំ ​អនិច្ចំ និង​អនត្តា​។​

លោក ​កឹម សុខា​កំពុង​ជាប់​បម្រាម​ពី​តុលាការ​ដែល​ហាម​មិនឱ្យ​លោក​ធ្វើ​នយោបាយ​។ ​លោក​ក៏​ធ្លាប់​ត្រូវបាន​តុលាការ​ព្រមាន​ម្ដង​ដែរ​នៅក្នុង​ឆ្នាំនេះ នៅពេលដែល​លោក​ចុះ​ជួប​ប្រជាពលរដ្ឋ​នៅតាម​មូលដ្ឋាន​និយាយ​ពាក្យ​សារ​មួយចំនួន​ទៅកាន់​អ្នកគាំទ្រ​។​

មនុស្ស​ជំនិត​របស់លោក កឹម សុខា គឺ​លោក យឹម ស៊ី​ណន បដិសេធ​មិន​ឆ្លើយ​សំណួរ​ពាក់ព័ន្ធ​នឹង​ដំណើរ​ធ្វើ​បុ​ណ្យដាក់​បិណ្ឌ​របស់​អតីត​មេបក្ស​ប្រឆាំង​នោះឡើយ​។​

​លោក ហេង សំរិន​ និង​លោក កឹម សុខា ធ្លាប់​ធ្វើការ​ក្នុង​ដំបូល​រដ្ឋសភា​ក្នុងនាម​ជា​ថ្នាក់ដឹកនាំ​រដ្ឋសភា​ដែល​លោក ហេង សំរិន ​ជា​ប្រធាន លោក​ កឹម សុខា ​ជា​អនុប្រធាន​ទី​១៕

អត្ថបទគួរចាប់អារម្មណ៍