ភ្នំពេញៈ លោកនាយករដ្ឋមន្ត្រី ហ៊ុន សែន អញ្ជើញក្រុមហ៊ុនបង់ក្លាដែសមកកាន់កម្ពុជា ដើម្បីវិនិយោគធ្វើឃ្លាំងកែច្នៃអង្ករ ធ្វើរោងម៉ាស៊ីនកិនស្រូវ ហើយនាំចេញទៅកាន់ប្រទេសបង់ក្លាដែស ហើយលោកក៏បានជំរុញបង់ក្លាដែសឱ្យមានការនាំអង្ករពីប្រទេសកម្ពុជាទៅកាន់បង់ក្លាដែសឱ្យមានស្ថិរភាព។
ការអញ្ជើញ និងជំរុញបែបនេះធ្វើឡើងក្នុងជំនួបរវាងលោក និងលោកស្រី Sheikh Hasina នាយករដ្ឋមន្ត្រីបង់ក្លាដែសនាថ្ងៃទី ២៣ ខែកញ្ញា នៅទីក្រុងញូវយ៉ក សហរដ្ឋអាមេរិក ក្នុងឱកាសលោកទៅចូលរួមមហាសន្និបាតអង្គការសហប្រជាជាតិលើកទី ៧៧។
លោក ហ៊ុន សែន ក៏បានលើកឡើងពីការនាំអង្ករចេញពីប្រទេសកម្ពុជាទៅកាន់ប្រទេសបង់ក្លាដែស ដែលកន្លងទៅក៏មានការចរចាក្នុងការទិញប្រមាណជា ២០ ម៉ឺនតោនពីប្រទេសកម្ពុជា។
ហ្វេសប៊ុកលោក ហ៊ុន សែន បញ្ជាក់ក្រោយជំនួបនេះថា៖ «ប៉ុន្តែអ្វីដែលសម្ដេចចង់បានក្នុងកិច្ចពិភាក្សានេះ គឺធ្វើយ៉ាងណា ដើម្បីឱ្យមានការនាំអង្ករពីប្រទេសកម្ពុជាទៅកាន់បង់ក្លាដែសឱ្យមានស្ថិរភាព ជាពិសេសសម្ដេចក៏បានអញ្ជើញក្រុមហ៊ុនរបស់បង់ក្លាដែសមកកាន់កម្ពុជា ដើម្បីវិនិយោគធ្វើឃ្លាំង កែច្នៃអង្ករ ជារោងម៉ាស៊ីនកិនស្រូវ ហើយនាំចេញទៅកាន់ប្រទេសបង់ក្លាដែស»។
បើតាមហ្វេសប៊ុកដដែល លោកស្រី Sheikh Hasina បានស្នើឱ្យវិស័យឯកជននៃប្រទេសបង់ក្លាដែសទៅវិនិយោគនៅប្រទេសកម្ពុជាលើវិស័យកសិកម្ម ជាពិសេសក្នុងការនាំអង្ករចេញពីកម្ពុជា។
លោកស្រីប្រាប់លោក ហ៊ុន សែន ថា បង់ក្លាដែសមានប្រជាពលរដ្ឋច្រើន តែមានដីតូចដែលមិនអំណោយផលក្នុងការធ្វើកសិកម្ម ដោយសារងាយរងគ្រោះ ដោយសារទឹកជំនន់។ ដូច្នេះ ប្រទេសនេះត្រូវការទិញអង្ករពីប្រទេសដទៃ។
ហ្វេសប៊ុកដដែលបានដកស្រង់សម្ដីលោកស្រី Sheikh Hasina ថា៖ «យើងអាចមានកិច្ចព្រមព្រៀងជាមួយគ្នា ហើយកន្លងមកប្រទេសទាំង ២ ក៏ធ្លាប់បានធ្វើកិច្ចការងារជាមួយគ្នាដែលអាចពង្រីក និងពង្រឹងធ្វើធុរកិច្ចជាមួយគ្នាឱ្យកាន់តែច្រើន»។
លោកស្រីក៏មានបំណងចង់ជំរុញឱ្យកិច្ចព្រមព្រៀងទីផ្សារសេរីនៃប្រទេសទាំង ២ ដើម្បីបង្កើនការនាំចេញ និងដើម្បីបង្កើនឱកាសបន្ថែមទៀត។
លោក ហ៊ុន សែន បញ្ជាក់ថា៖ «នេះគឺជាការចាំបាច់ដែលយើងអាចចាប់ផ្ដើមការចរចា ដើម្បីឱ្យមានកិច្ចព្រមព្រៀងទីផ្សារសេរីជាមួយគ្នា ដើម្បីជំរុញកំណើនពាណិជ្ជកម្មរវាងប្រទេសទាំង ២ ខណៈដែលកម្ពុជាក៏មានកិច្ចព្រមព្រៀងទីផ្សារសេរីជាមួយចិនជាមួយនឹងកូរ៉េផងដែរ។ តាមរយៈកិច្ចព្រមព្រៀងទីផ្សារសេរីនេះ គឺយើងអាចបង្កើនទំហំពាណិជ្ជកម្មនៃប្រទេសទាំង ២ របស់យើង ដែលជាឱកាសសម្រាប់បង់ក្លាដែស សម្រាប់ពង្រីក និងពង្រឹងទំនាក់ទំនងជាមួយអាស៊ានផងដែរ»៕