.jpg)
រូបភាព Samdech Hun Sen
ភ្នំពេញៈ លោកនាយករដ្ឋមន្ត្រី ហ៊ុន សែន ប្រកាសប្រាប់អង្គការសហប្រជាជាតិ (UN) ថាកម្ពុជាត្រៀមខ្លួនចូលរួមបន្ថែមទៀតនៃកងទ័ពរបស់ខ្លួនក្នុងបេសកកម្មរក្សាសន្តិភាពនៃ UN ហើយលោកអរគុណ UN ដែលបានចូលរួមយ៉ាងសកម្មក្នុងការថែរក្សាសន្តិភាពទូទាំងពិភពលោក រួមទាំងប្រទេសកម្ពុជាផងដែរ។
ការប្រកាសរបស់លោកនាយករដ្ឋមន្ត្រី ហ៊ុន សែន ធ្វើឡើងក្នុងជំនួបជាមួយ លោក Antonio Guterres អគ្គលេខាធិការអង្គការសហប្រជាជាតិ នាថ្ងៃទី ២២ ខែកញ្ញា នៅទីក្រុងញូវយ៉ក សហរដ្ឋអាមេរិក ក្នុងឱកាសលោកទៅចូលរួមមហាសន្និបាតអង្គការសហប្រជាជាតិលើកទី ៧៧។
ហ្វេសប៊ុកលោក ហ៊ុន សែន បានឱ្យដឹងក្រោយជំនួបនេះថា៖ «សម្ដេចតេជោ ក៏បានគូសបញ្ជាក់អំពីការចូលរួមរបស់ប្រទេសកម្ពុជាក្នុងក្របខ័ណ្ឌប្រតិបត្តិការរក្សាសន្តិភាពនៃអង្គការសហប្រជាជាតិ។ កម្ពុជាត្រៀមក្នុងការចូលរួមបន្ថែមនៃកងទ័ពចូលរួមក្នុងបេសកកម្មរក្សាសន្តិភាពនៃអង្គការសហប្រជាជាតិ ហើយសម្ដេចក៏បានអរគុណចំពោះអង្គការសហប្រជាជាតិ ដែលបានចូលរួមយ៉ាងសកម្មក្នុងការថែរក្សាសន្តិភាពទូទាំងពិភពលោក រួមទាំងប្រទេសកម្ពុជាផងដែរ»។
ហ្វេសប៊ុកដដែលបន្តថា លោក Antonio Guterres ពិតជារីករាយយ៉ាងក្រៃលែងចំពោះកម្ពុជាដែលបានចូលរួមក្នុងក្របខ័ណ្ឌប្រតិបត្តិការរក្សាសន្តិភាពរបស់ UN កន្លងទៅនេះ។
ហ្វេសប៊ុកដដែលដកស្រង់សម្ដីលោក Antonio Guterres ថា៖ «យើងនឹងបង្កើនសាមគ្គីភាពជាមួយបណ្ដាប្រទេស ដែលបានប៉ះពាល់ដោយវិបត្តិទាំងឡាយ រួមទាំងជំងឺកូវីដ ១៩ ផងដែរ។ អង្គការសហប្រជាជាតិ គឺឈរលើស្មារតីសាមគ្គីភាពជាមួយប្រទេសកំពុងអភិវឌ្ឍន៍និយាយជារួម និងនិយាយដោយឡែកចំពោះប្រទេសកម្ពុជា។ យើងនឹងខិតខំជំរុញការកែទម្រង់នៃហិរញ្ញប្បទានអន្តរជាតិផងដែរ»។
លោក ហ៊ុន សែន ក៏បានលើកឡើងពីភាពជោគជ័យនៃតុលាការខ្មែរក្រហម ដែលជាកិច្ចសហការរវាងរដ្ឋាភិបាលកម្ពុជាជាមួយនឹង UN ពីព្រោះនាថ្ងៃទី ២២ ខែកញ្ញានេះដែរ តុលាការកូនកាត់នេះបានប្រកាសសាលក្រមស្វែងរកយុត្តិធម៌ចំពោះប្រជាពលរដ្ឋដែលជាអ្នករងគ្រោះក្នុងរបបខ្មែរក្រហម។
លោកលើកឡើងថា លោកបានរង់ចាំរយៈពេល ៤៣ ឆ្នាំ សម្រាប់ការស្វែងរកយុត្តិធម៌នៅពេលនេះ ហើយកាលពី ៤៣ ឆ្នាំមុន ប្រជាជនកម្ពុជាបានរួចពីការស្លាប់នៃរបបនេះ ដោយមានការជួយពីប្រទេសវៀតណាម។ ការស្វែងរកយុត្តិធម៌ សម្រាប់ប្រជាជន គឺក្នុងគោលដៅ ដើម្បីបង្ការកុំឱ្យមានព្រឹត្តិការណ៍ស្ថានភាពបែបនេះកើតឡើងសារជាថ្មីទៀត។
លោក ហ៊ុន សែន ក៏បានលើកឡើងពីក្របខ័ណ្ឌអាស៊ាន ដោយលោកបានអញ្ជើញលោក Antonio Guterres ដើម្បីចូលរួមកិច្ចប្រជុំកំពូលអាស៊ាន-UN ដែលគ្រោងនឹងធ្វើឡើងនៅរាជធានីភ្នំពេញនាខែវិច្ឆិកាខាងមុខនេះ ខណៈឆ្នាំនេះ កម្ពុជានឹងរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធផ្សេងទៀត ដែលនឹងមានវត្តមានប្រធានាធិបតី និងនាយករដ្ឋមន្ត្រីពីបណ្ដាប្រទេសជាដៃគូសន្ទនារបស់អាស៊ាន។
ហ្វេសប៊ុកលោក ហ៊ុន សែន បញ្ជាក់ថា លោក Antonio Guterres នឹងពិចារណានៃការចូលរួមក្នុងកិច្ចប្រជុំនាពេលខាងមុខនេះ ពីព្រោះកន្លងទៅនេះ លោកក៏ធ្លាប់មកប្រទេសកម្ពុជាផងដែរ តែក្នុងនាមជាអ្នកទេសចរណ៍។ ដូច្នេះលោកពិតជាចង់ត្រឡប់មកប្រទេសកម្ពុជាសាជាថ្មី ជាពិសេសលោកនឹងជំរុញកិច្ចសហប្រតិបត្តិការរវាង UN និងអាស៊ាន៕
