.jpg)
ផ្លូវក្នុងភូមិសាស្ត្រខេត្តកំពង់ធំត្រូវបានជំនន់ទឹកភ្លៀងជន់លិច។ រូបថត រដ្ឋបាលខេត្តកំពង់ធំ
អាជ្ញាធរខេត្តមួយចំនួនសម្រេចផ្អាកការធ្វើដំណើររបស់យានយន្ដធុនធ្ងន់ ដើម្បីការពារផ្លូវជាតិពីជំនន់ទឹកភ្លៀង។ មន្ទីរសាធារណការ និងដឹកជញ្ជូនខេត្តព្រះវិហារនិ ងខេត្តកំពង់ធំបានចេញលិខិតផ្សេងគ្នាកាលពីថ្ងៃទី ២៦ ខែកញ្ញា ដោយសម្រេចផ្អាកចរាចរណ៍ជាបណ្ដោះអាសន្នចំពោះរថយន្តដឹកទំនិញធុនធ្ងន់ភូមិសាស្ត្រខេត្តទាំង ២ ចាប់ពីថ្ងៃទី ២៦ ខែកញ្ញារហូតដល់មានការជូនដំណឹងជាថ្មី។
មន្ទីរសាធារណការ និងដឹកជញ្ជូនខេត្តព្រះវិហារលើកឡើងក្នុងសេចក្ដីជូនដំណឹងរបស់ខ្លួនថា អាជ្ញាធរខេត្តនៅក្នុងខេត្តព្រះវិហារបិទចរាចរណ៍ទាំងស្រុងចំពោះរថយន្តធុនធ្ងន់ចាប់ពីកំណាត់ផ្លូវជាតិលេខ ៩ ពីគីឡូម៉ែត្រលេខ ៥៦០ ដល់លេខ ៥៦១ ដែលស្ថិតក្នុងភូមិម្លូព្រៃ ឃុំម្លូព្រៃមួយ ស្រុកឆែប រហូតដល់មានការជូនដំណឹងជាថ្មី។
មន្ទីរសាធារណការ និងដឹកជញ្ជូនខេត្តព្រះវិហារ៖ «ការផ្អាកចរាចរណ៍នេះដោយសារស្ថានភាពជំនន់ទឹកភ្លៀងបានបន្តឡើងរហូតដល់កម្រិតប្រកាសអាសន្នធ្វើឱ្យថ្នល់ស្ពាន មិនអាចទ្រាំទ្រនឹងទម្ងន់រថយន្ដធុនធ្ងន់បានទេ។
មន្ទីរសាធារណការ និងដឹកជញ្ជូនខេត្តកំពង់ធំបានជូនដំណឹងពីការផ្អាកចរាចរណ៍រថយន្ដធ្ងន់ចាប់ពីលើកំណាត់ផ្លូវផ្សេងគ្នាចំនួន ៣ ខ្សែ រួមមានទី ១ ផ្លូវជាតិលេខ ៦ ពីគីឡូម៉ែត្រលេខ ២២០ ដល់ ២២៤ ស្ថិតក្នុងភូមិត្រាច ឃុំកំពង់ចិនជើង នៅទីប្រជុំជនភូមិត្នោត ឃុំកំពង់ចិនជើង ទី ២ ផ្លូវខេត្តលេខ ២៦៤D ស្ថិតនៅក្នុងឃុំបន្ទាយស្ទោង ទី ៣ ផ្លូវខេត្តលេខ ២៦៤G ស្ថិតនៅក្នុងភូមិតាទ្រាល ឃុំប្រឡាយ។
មន្ទីរសាធារណការ និងដឹកជញ្ជូនខេត្តកំពង់ធំបញ្ជាក់ថា៖ «ដោយសារតែជំនន់ទឹកភ្លៀងបានជន់លិចយ៉ាងខ្លាំង ជាហេតុបណ្ដាលឱ្យលិចលង់តាមបណ្ដាផ្លូវមួយចំនួនក្នុងភូមិសាស្ត្រខេត្តកំពង់ធំ ស្ថានភាពបែបនេះធ្វើឱ្យផ្លូវស្ពានមិនអាចទ្រទម្ងន់រថយន្ដធ្ងន់បានទេ។ ការផ្អាកចរាចរណ៍នេះដើម្បីបង្ការគ្រោះថ្នាក់ជាយថាហេតុ និងទប់ស្កាត់ការខូចខាតហេដ្ឋារចនាសម្ព័ន្ធស្ពានថ្នល់»។
ការព្យាករណ៍ស្ថានភាពអាកាសធាតុខាងមុខនេះ ក្រសួងធនធានទឹក និងឧតុនិយមបានឱ្យដឹងថា ចាប់ពីថ្ងៃទី ២៧ ដល់ថ្ងៃទី ៣០ ខែកញ្ញា ឆ្នាំ ២០២២ ឥទ្ធិពលព្យុះទី ១៦ ឈ្មោះ ណូរុ (NORU) នឹងធ្វើឱ្យបណ្ដាខេត្តមួយចំនួនក្នុងប្រទេសកម្ពុជា រួមមាន៖ ខេត្តឧត្ដរមានជ័យ ព្រះវិហារ រតនគិរី សៀមរាបបន្ទាយមានជ័យ ប៉ៃលិន បាត់ដំបង និងខេត្តពោធិ៍សាត់។ ស្ថានភាពនេះនឹងបណ្ដាលឱ្យមានភ្លៀងធ្លាក់ក្នុងកម្រិតពីបង្គួរទៅច្រើន បូកផ្សំនឹងបរិមាណទឹកភ្លៀងដែលហូរមកពីប្រទេសថៃបន្ថែមទៀត អាចបង្កឱ្យទីទំនាបជាប់ផ្លូវទឹក និងផ្លូវទឹកនៅក្នុងភូមិសាស្ត្រនៃបណ្តាខេត្តទាំងនោះប្រឈមនឹងជំនន់ទឹកភ្លៀង (I-lash flood) និងជំនន់ដោយបរិមាណទឹកហួសកម្រិត (Overflow)។
សូមបញ្ជាក់ថា បច្ចុប្បន្ននេះបណ្តាខេត្តមួយចំនួនដូចជាឧត្តរមានជ័យ បន្ទាយមានជ័យ ពោធិ៍សាត់ បាត់ដំបង់ សៀមរាប និងកំពង់ធំផងដែរ កំពុងជួបការជន់លិច ដោយសារជំនន់ទឹកភ្លៀង និងទឹកហូរធ្លាក់មកពីប្រទេសថៃ៕
