.jpg)
ក្រុមជនបរទេសដែលសមត្ថកិច្ចឃាត់ខ្លួននៅខេត្តព្រះសីហនុកាលពីខែមុន ។ រូបថត ប៉ូលិស
ភ្នំពេញៈរយៈពេល ៩ ខែឆ្នាំ២០២២ អគ្គនាយកដ្ឋានអន្តោប្រវេសន៍បានបណ្តេញជនបរទេសចេញពីកម្ពុជាសរុបចំនួន ១ ៤៥០ នាក់ (ស្រី ២៧៩ នាក់) មាន ៣២ សញ្ជាតិ ក្នុងនោះកាលពីថ្ងៃទី ២៣ ខែកញ្ញាទើបបានបណ្ដេញជនបរទេសចំនួន ២៣០ នាក់ (ស្រី ៥០ នាក់) ចេញពីកម្ពុជាផងដែរ។ នេះបើតាមអ្នកនាំពាក្យអគ្គនាយកដ្ឋានអន្តោប្រវេសន៍។
លោក កែវ វណ្ណថន អគ្គនាយករង និងជាអ្នកនាំពាក្យអគ្គនាយកដ្ឋានអន្តោប្រវេសន៍បានប្រាប់ភ្នំពេញប៉ុស្ដិ៍កាលពីថ្ងៃទី ២៧ ខែកញ្ញាថា ជនបរទេសដែលបណ្ដេញចេញទាំងនេះត្រូវបានសមត្ថកិច្ចឃាត់ខ្លួនពាក់ព័ន្ធបទល្មើសលួចស្នាក់នៅខុសច្បាប់ គ្មានលិខិតឆ្លងដែន លើសទិដ្ឋាការកំណត់ និងប្រើប្រាស់ទិដ្ឋាការខុសគោលដៅដែលល្មើស និងច្បាប់ស្ដីពីអន្តោប្រវេសន៍។
លោកថ្លែងថា៖ «រយៈពេល ៩ ខែឆ្នាំ ២០២២ អគ្គនាយកដ្ឋានអន្តោប្រវេសន៍បានបណ្តេញជនបរទេសចេញពីកម្ពុជា សរុបចំនួន ១ ៤៥០ នាក់ ស្រី ២៧៩ នាក់ មាន ៣២ សញ្ជាតិ»។
បើតាមលោក វណ្ណថន នៅថ្ងៃទី ២៣ ខែកញ្ញា ឆ្នាំ ២០២២ អគ្គនាយកដ្ឋានអន្តោប្រវេសន៍ទើបបានបណ្ដេញជនបរទេសចំនួន ២៣០ នាក់ ស្រី ៥០ នាក់ ចេញពីកម្ពុជា។
លោកបានឱ្យដឹងថា ជនបរទេសទាំងនេះ មានសញ្ជាតិជាតិវៀតណាម ២២៨ នាក់ និងជនជាតិចិនចំនួន ២ នាក់។ ការបណ្ដេញចេញពីកម្ពុជានេះអនុលោមតាមច្បាប់ស្ដីពីអន្តោប្រវេសន៍តាមប៉ុស្តិ៍នគរបានច្រកទ្វារអាកាសយានដ្ឋានអន្តរជាតិភ្នំពេញ និងច្រកទ្វារព្រំដែនអន្តរជាតិព្រែកចាក។
លោកថ្លែងថា៖ «ជនបរទេសចំនួន ២៣០ នាក់ខាងលើត្រូវបានសមត្ថកិច្ចឃាត់ខ្លួនពាក់ព័ន្ធបទល្មើសលួចស្នាក់នៅខុសច្បាប់ គ្មានលិខិតឆ្លងដែន លើសទិដ្ឋាការកំណត់ និងប្រើប្រាស់ទិដ្ឋាការខុសគោលដៅដែលល្មើសនឹងច្បាប់ស្ដីពីអន្តោប្រវេសន៍»។
ទាក់ទងនឹងការស្រាវជ្រាវបង្ក្រាបជនបរទេសរស់នៅខុសច្បាប់ និងការបង្ខាំងមនុស្សនេះ ចាប់ពីថ្ងៃទី ១៩ ដល់ថ្ងៃទី ២៧ ខែកញ្ញា សមត្ថកិច្ចខេត្តព្រះសីហនុសហការជាមួយនឹងអគ្គស្នងការដា្ឋននគរបាលជាតិបានចុះស្រាវជ្រាវ និងត្រួតពិនិត្យរដ្ឋបាលនៅទីតាំងអគារចំនួន ៤ កន្លែង ក្នុងភូមិសាស្ដ្រក្រុងព្រះសីហនុ ក្នុងនោះមានទីតាំងអគារឈ្មោះហ្កាឡាក់ស៊ីវើល,ទីតាំងឈ្មោះ ជីងឆាយ៥,ទីតាំងឈ្មោះ ប៉ាវយ៉ុងតិចណូឡូជី និងទីតាំងឈ្មោះ ស៊ីងសាន ទីង (ហៅឆាងឆីង)។ នេះបើតាមអ្នកនាំពាក្យរដ្ឋបាលខេត្តព្រះសីហនុ ។
លោក ឃាង ភារម្យ អ្នកនាំពាក្យរដ្ឋបាលខេត្តបានឱ្យដឹងថា ការការចុះត្រួតពិនិត្យរដ្ឋបាលនេះ សម្រាប់ទីតាំងក្រុមហ៊ុន ហ្កាឡាក់ស៊ីវើល កម្លាំងចម្រុះបានរកឃើញជនបរទេសសរុបចំនួន ៤១៤ នាក់ ស្រី ៤២ នាក់ មានចំនួន ៥ សញ្ជាតិ ក្នុងនោះជនជាតិចិនចំនួន ៣៥១ នាក់ (ស្រីចំនួន ៣០ នាក់) ជនជាតិឡាវចំនួន ២ នាក់ (ស្រី) ជនជាតិវៀតណាមចំនួន ៤៦ នាក់ (ស្រីចំនួន ១០ នាក់) ជនជាតិម៉ាឡេស៊ី ១០ នាក់ និងជនជាតិឥណ្ឌាចំនួន ៥ នាក់។
លោកបានឱ្យដឹងថា ក្នុងចំណោមជនបរទេសទាំង ៤១៤ នាក់ មានជនបរទេសចំនួន ១៦៨ នាក់ (ស្រី ១៧ នាក់) ត្រូវបានរកឃើញស្នាក់នៅនិងធ្វើការដោយគ្មានឯកសារត្រឹមត្រូវនិងជនបរទេសចំនួន ២០៨ នាក់ (ស្រី ២៣ នាក់) ត្រូវបានផាកពិន័យ ដោយអគ្គនាយកដ្ឋានអន្តោប្រវេសន៍សរុបជាទឹកប្រាក់ប្រមាណជាង ១០ លានរៀល។ ជាមួយគ្នានេះជនបរទេសដែលបានផាកពិន័យរួច តម្រូវឱ្យស្នើបណ្ណការងារថ្មីដែលប្រមូលបានអាករសរុបចំនួន ៦០ ៣១០ ដុល្លារអាមេរិក។
ចំណែកទីតាំងឈ្មោះ ស៊ីង សានទីង សមត្ថកិច្ចបានរកឃើញជនបរទេសខុសច្បាប់អន្តោប្រវេសន៍ចំនួន ១៤១ នាក់ (ស្រី ៦ នាក់ )មាន២ សញ្ជាតិ ក្នុងនោះមានជនជាតិចិនចំនួន ១៣០ នាក់ (ស្រី ៣ នាក់) និងជនជាតិវៀតណាមចំនួន ១១ នាក់ (ស្រី ៣ នាក់)។ ពួកគេត្រូវបានបញ្ជូនទៅនាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ ដើម្បីបណ្តេញចេញពីកម្ពុជា។
លោកបញ្ជាក់ថា ក្នុងនោះមានជនបរទេសចំនួន ២៦២ នាក់ (ស្រី ២៥ នាក់) ត្រូវបានពិនិត្យឃើញថា បានបម្រើការងារដោយគ្មានបណ្ណការងារ ហើយត្រូវបានផាកពិន័យដោយជំនាញមកពីអគ្គនាយកដ្ឋានអន្តោប្រវេសន៍រួចទើបអនុញ្ញាតឱ្យស្នើសុំបណ្ណការងារពីមន្ទីរការងារ និងបណ្តុះបណ្តាលវិជ្ជាជីវៈខេត្តឡើងវិញ។
រីឯទីតាំងឈ្មោះ ជីងឆាយតូចណូឡូជី សមត្ថកិច្ចបានរកឃើញជនបរទេសសរុប ៤៦៩ នាក់ ស្រី ៧៥ នាក់ មានចំនួន ១០ សញ្ជាតិ។
លោកបន្តថា បន្ទាប់ពីសមត្ថកិច្ចជំនាញផ្នែកការងារ និងសមត្ថកិច្ចជំនាញផ្នែកអន្តោប្រវេសន៍បានសាកសួរព័ត៌មាន និងពិនិត្យឯកសារពាក់ព័ន្ធនានាលើជនបរទេសសរុបចំនួន ៤១៤ នាក់(ស្រីចំនួន ៤២ នាក់) ឃើញថា ពួកគេបម្រើការងារមិនមានបណ្ណការងារមានចំនួន ២៣៦ នាក់(ស្រី ៣៩ នាក់) ហើយបានផាកពិន័យ និងប្រមូលអាករពីការធ្វើបណ្ណការងារបានថវិកាសរុបចំនួន ១១៨ លានរៀល។ មានបណ្ណការងារ ៣៥ នាក់ (ស្រី ៨ នាក់)។
រីឯជនបរទេសដែលមិនមានលិខិតឆ្លងដែន និងកំពុងស្នាក់នៅក្នុងទីតាំងហ្គាឡាក់ស៊ីវើលមានចំនួន ១៦៨ នាក់ (ស្រីចំនួន ១៧ នាក់ ) ក្នុងនោះមានសញ្ជាតិចិនចំនួន ១៣០ នាក់ ស្រីចំនួន ៨ នាក់ វៀតណាមចំនួន ៣៣ នាក់ ស្រីចំនួន ៧ នាក់ ម៉ាឡេស៊ីចំនួន ៣នាក់ និងឡាវ ២ នាក់ (ស្រី)។
ចំពោះទីតាំងឈ្មោះ ប៉ាវយ៉ុងតិចណូឡូជី លោក ភារម្យ បានឱ្យដឹងថា សមត្ថកិច្ចបានរកឃើញជនបរទេសខុសច្បាប់អន្តោប្រវេសន៍ចំនួន ១៨៤ នាក់ (ស្រី ២១ នាក់) មាន៣សញ្ជាតិក្នុងនោះមានជនជាតិចិន ១០០ នាក់ (ស្រី ២ នាក់) ជនជាតិវៀតណាមចំនួន ៧៩ នាក់ (ស្រី ១៨ នាក់) និងជនជាតិម៉ាឡេស៊ីចំនួន ៥ នាក់ (ស្រីម្នាក់)។
លោកបានឱ្យដឹងថា ពួកគេត្រូវបានបញ្ជូនទៅនាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ ដើម្បីបណ្ដេញចេញពីកម្ពុជា។ ក្នុងនោះផងដែរ មានជនបរទេសចំនួន ៣៥៧ នាក់ (ស្រី ៤៩ នាក់) ត្រូវបានពិនិត្យឃើញថា បម្រើការងារដោយគ្មានបណ្ណការងារ ហើយត្រូវបានផាកពិន័យដោយជំនាញមកពី អគ្គនាយកដ្ឋានអន្តោប្រវេសន៍រួចទើបអនុញ្ញាតឱ្យស្នើសុំបណ្ណការងារពីមន្ទីរការងារ៕
