ភ្នំពេញៈ កម្ពុជា និងគុយបា បានចុះហត្ថលេខាលើឯកសារចំនួន ៣ ដើម្បីជំរុញកិច្ចសហប្រតិបត្តិការលើវិស័យសុខាភិបាល ផែនការសហប្រតិបត្តិការការបរទេស និងទំនាក់ទំនងការទូត រវាងប្រទេសទាំង ២។ ជាមួយគ្នានោះ កម្ពុជាបានប្រកាសផ្តល់អង្ករ ៦ ពាន់តោនដល់គុយបា។
លោក Miguel Diaz-Canel ប្រធានាធិបតីគុយបា ធ្វើជាសហធិបតីក្នុងពិធីចុះហត្ថលេខានេះ កាលពីថ្ងៃទី ២៤ ខែកញ្ញា ជាមួយលោកនាយករដ្ឋមន្ត្រី ហ៊ុន សែន នៃកម្ពុជា ក្នុងឱកាសលោកទៅបំពេញទស្សនកិច្ចនៅប្រទេសនេះ ពីថ្ងៃទី ២៣-២៥ ខែកញ្ញា។
ឯកសារទី១ គឺអនុស្សរណៈយោគយល់គ្នា (MoU) រវាងក្រសួងសុខាភិបាលកម្ពុជា និងក្រសួងសុខាភិបាលគុយបា ដែលចុះហត្ថលេខា ដោយលោក ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា និងលោក ហូសេ អាងហ្គេល ព័រតាល់ មីរ៉ាន់ដា រដ្ឋមន្ត្រីក្រសួងសុខាភិបាលសាធារណៈគុយបា។
ឯកសាទី២ គឺផែនការសហប្រតិបត្តិការ រវាងក្រសួងការបរទេសគុយបា និងក្រសួងការបរទេស និងសហប្រតិបត្តិការអន្តរជាតិកម្ពុជា ដែលចុះហត្ថលេខា រវាងលោក ហេឡាដូ ផេណាល់ប៊ែរ ព័រតាល់ អនុរដ្ឋមន្ត្រីទី១ នៃក្រសួងការបរទេសគុយបា និងលោក អ៊ុច បូររិទ្ធ រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងការបរទេស និងសហប្រតិបត្តិការអន្តរជាតិកម្ពុជា។
ឯកសារទី៣ គឺ អនុស្សរណៈយោគយល់ (MoU) រវាងវិទ្យាស្ថានឧត្តមសិក្សាទំនាក់ទំនងអន្តរជាតិនៃប្រទេសគុយបា និងវិទ្យាស្ថានជាតិការទូត និងទំនាក់ទំនងអន្តរជាតិនៃប្រទេសកម្ពុជា ដែលចុះហត្ថលេខា រវាងលោក អ៊ុច បូររិទ្ធ និងលោក រ៉ូហេលីអូ ស៊ីរ៉ា ឌីយ៉ាស ព្រឹទ្ធបុរស នៃវិទ្យាស្ថានទំនាក់ទំនងបរទេសជាន់ខ្ពស់ នៃក្រសួងការបរទេសគុយបា។
ក្នុងជំនួបជាមួយនឹងលោក Miguel Diaz-Canel នៅមុនពិធីចុះ MoU នេះ លោកនាយករដ្ឋមន្ត្រី ហ៊ុន សែន បានប្រកាសផ្តល់អង្ករ ៦ ពាន់តោនដល់រដ្ឋាភិបាល និងប្រជាជនគុយបា ដោយលោកបញ្ជាក់ថា៖ «អង្ករ ៦ ពាន់តោននេះ មាន ៣ ពាន់តោន ជាជំនួយរបស់រាជរដ្ឋាភិបាល និងប្រជាជនកម្ពុជា ហើយ ៣ ពាន់តោនទៀត ជាជំនួយរបស់វិស័យឯកជន។ អង្ករ ៦ ពាន់តោននេះ នឹងដឹកចេញពីកម្ពុជានៅខែតុលា ហើយដឹកដល់ប្រទេសគុយបានៅក្នុងខែធ្នូ»។
ហ្វេសប៊ុករបស់លោក ហ៊ុន សែន បញ្ជាក់នាថ្ងៃទី ២៤ ខែកញ្ញាថា មេដឹកនាំប្រទេសទាំង ២ បានជជែកគ្នាពីការរៀបចំឱ្យមានទស្សនកិច្ចរបស់ក្រុមអ្នកបច្ចេកទេសផ្នែកកសិកម្ម ដើម្បីសិក្សាស្រាវជ្រាវផ្នែកកសិកម្ម នៅប្រទេសកម្ពុជា ជាពិសេស លើដំណាំស្រូវ។ លោក ហ៊ុន សែន បានបញ្ជាក់ថា កម្ពុជាជាអ្នករ៉ាប់រងរាល់ការចំណាយលើការសិក្សាស្រាវជ្រាវនេះ ហើយលោកបានចាត់ទុកការសិក្សាស្រាវជ្រាវលើវិស័យកសិកម្ម ជាចំណែក ១ សម្រាប់ធានាដល់សន្តិសុខស្បៀងរវាងកម្ពុជា និងប្រទេសគុយបា។
ខណៈធ្វើទស្សនកិច្ចនៅមជ្ឈមណ្ឌលវិស្វកម្មហ្សេន និងជីវបច្ចេកវិទ្យា លោកនាយករដ្ឋមន្ត្រី ហ៊ុន សែន បានចាត់ឱ្យលោក ម៉ម ប៊ុនហេង ធ្វើទំនាក់ទំនងជាមួយមជ្ឈមណ្ឌលនេះ ដើម្បីធ្វើកិច្ចសហប្រតិបត្តិការលើការនាំចូល ឬផលិតវ៉ាក់សាំងការពារជំងឺមហារីក និងទឹកនោមផ្អែមមកកាន់កម្ពុជា ព្រោះកម្ពុជាមានអត្រាមនុស្សកើតជំងឺទាំង ២ ប្រភេទនេះខ្ពស់។
ហ្វេសប៊ុកលោក ហ៊ុន សែន បញ្ជាក់ថា ថ្នាក់ដឹកនាំវិទ្យាស្ថាននេះបានទទួលយកនូវសំណូមពរ របស់លោក ហ៊ុន សែន ហើយនឹងបន្តសហការជាមួយក្រសួងសុខាភិបាលកម្ពុជា។
ដោយឡែក ក្នុងជំនួបជាមួយ លោក រ៉ាអ៊ួល កាស្ត្រូ អតីតប្រធានាធិបតីគុយបា កាលពីថ្ងៃទី ២៥ ខែកញ្ញាលោក ហ៊ុន សែន ថ្លែងថា កម្ពុជាមិនភ្លេចឡើយនូវអ្វី ដែលប្រទេសគុយបា បានជួយដល់ប្រទេសកម្ពុជា ក្នុងគ្រាដ៏លំបាក ក្រោយកម្ពុជាត្រូវបានរំដោះចេញពីរបបខ្មែរក្រហម។
ហ្វេសប៊ុកដដែលឱ្យដឹងថា៖ «សម្តេចតេជោ [ហ៊ុន សែន] បានបញ្ជាក់ថា នៅពេលនោះប្រទេសគុយបា បានជួយកម្ពុជាក្នុងការប្រយុទ្ធប្រឆាំងនឹងក្រុមចក្រពត្តិនិយម និងរបបប្រល័យពូជសាសន៍ខ្មែរក្រហម។ សម្តេចតេជោបានរំឭកថា នៅក្នុងឆ្នាំ ១៩៧៩ ប្រទេសគុយបា បានជួយកម្ពុជាយ៉ាងច្រើន ហើយនៅចងចាំថា ពេលនោះកម្ពុជាមានស្ករគុយបា មានមជ្ឈមណ្ឌលកុមារកំព្រាគុយបា ហើយក៏មានកប៉ាល់ចម្លងរបស់គុយបាផងដែរ»។
លោក ហ៊ុន សែន បានរំឭកថា ជំនួយគុយបានៅពេលនោះ គឺមានសារៈសំខាន់ខ្លាំងណាស់ សម្រាប់ពលរដ្ឋកម្ពុជា ដែលទើបងើបពីសេចក្តីស្លាប់នៃរបបខ្មែរក្រហម ហើយត្រូវការចាំបាច់ការរស់រានមានជីវិត។ ប្រទេសគុយបា បានជួយបណ្តុះបណ្តាលធនធានមនុស្ស ដែលធនធានមនុស្ស គឺជារឿងសំខាន់ក្នុងការអភិវឌ្ឍប្រទេសកម្ពុជានាពេលនោះ។ ទំនាក់ទំនងកម្ពុជា និងគុយបា ជាពិសេសទំនាក់ទំនងនយោបាយនៅតែខ្លាំង ទោះបីមានការប្រឈមបញ្ហានានាយ៉ាងណាក៏ដោយ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាថ្លែងថា ទស្សនកិច្ចរបស់លោក ហ៊ុន សែន ទៅកាន់ប្រទេសគុយបានេះ គឺជាការពង្រឹងទំនាក់ទំនងជាប្រពៃណី រវាងប្រទេសទាំង ២ ដែលមានតាំង ពីសម័យសង្គ្រាមត្រជាក់៕