.jpg)
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យកាលពីពេលកន្លងទៅ។ រូបថត ហ្វេសប៊ុក
ភ្នំពេញៈ សាលារាជធានីភ្នំពេញបានអនុញ្ញាតឱ្យសមាគមគ្រូបង្រៀនកម្ពុជាឯករាជ្យជួបជុំមនុស្ស ២០០ នាក់ ប្រារព្ធទិវាគ្រូបង្រៀននៅថ្ងៃទី ៥ តុលា នៅទីលានប្រជាធិតេយ្យតាមគ្រោងទុក តែបានតម្រូវឱ្យសមាគមនេះធានាថា ការជួបជុំនោះមិនអនុញ្ញាតឱ្យអ្នកនយោបាយដែលត្រូវបានហាមឃាត់ដោយតុលាការកំពូលរយៈពេល ៥ ឆ្នាំចូលរួមឡើយ លើកលែងតែបុគ្គលនោះទទួលបាននីតិសម្បទាធ្វើនយោបាយឡើងវិញពីព្រះមហាក្សត្រទើបចូលរួមបាន។
លក្ខខណ្ឌនេះត្រូវបានកំហិតនៅក្នុងជំនួបរវាងអាជ្ញាធររាជធានីភ្នំពេញ និងសមាគមគ្រូបង្រៀនកម្ពុជាឯករាជ្យនៅថ្ងៃទី ២៨ កញ្ញា នៅសាលារាជធានីភ្នំពេញ។
លោក កើត ឆែ អភិបាលរងរាជធានីភ្នំពេញថ្លែងតាមទូរស័ព្ទក្រោយជំនួបនោះថា៖ «សមាគមត្រូវទទួលខុសត្រូវថា អ្នកដែលត្រូវបានតុលាការកំពូលហាមឃាត់សិទ្ធិធ្វើនយោបាយក្នុងរយៈពេល ៥ ឆ្នាំ មិនឱ្យទៅធ្វើនយោបាយនៅកន្លែងជួបជុំទេ លើកលែងតែអ្នកដែលទទួលបាននីតិសម្បទាធ្វើនយោបាយឡើងវិញ»។
លោកអភិបាលរងរាជធានីភ្នំពេញបានឱ្យដឹងទៀតថា ក្រៅពីលក្ខខណ្ឌនេះ អាជ្ញាធរបានណែនាំសមាគមគ្រូបង្រៀនសម្ដែងមតិដោយមិនត្រូវប៉ះពាល់ដល់ស្ថាប័នព្រះមហាក្សត្រ ឬស្ថាប័នកំពូលថ្នាក់ជាតិឡើយ ហើយអាជ្ញាធរនឹងធានារក្សាសន្តិសុខការពារការជួបជុំនោះ។ បន្ថែមលើនេះការហែញត្តិយកទៅដាក់នៅស្ថាប័នមួយចំនួនក៏មិនត្រូវបានអនុញ្ញាតដែរ ដោយត្រូវជំនួសមកវិញគឺតំណាងស្ថាប័នទាំង ៣ នឹងអញ្ជើញមកទទួលញត្តិផ្ទាល់នៅកន្លែងជួបជុំ។
ជាមួយគ្នានេះ លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យឱ្យដឹងថា អាជ្ញាធរបានលើកពីមូលហេតុមិនឱ្យយកញត្តិទៅដល់ស្ថាប័នទាំង ៣ ផ្ទាល់ក្រោមហេតុបញ្ចៀសការកកស្ទះចរាចរណ៍។ លោកស្រីថា៖ «យើងខំទាញហេតុផលប្រាប់ទៅខាងក្រុងដែរថា ការដើរដាក់ញត្តិធ្វើដោយសន្តិវិធីមិនប្រទាំងប្រទើសទេ នៅតែមិនត្រូវបានអនុញ្ញាត តែយ៉ាងណាយើងនឹងគោរពតាមការព្រមព្រៀងជាមួយសាលាក្រុងដើម្បីឱ្យការជួបជុំសម្ដែង[មតិ]របស់យើងប្រព្រឹត្តទៅដោយរលូន»។
បើតាមលោកស្រីអ៊ុក ឆាយ៉ាវី ប្រធានបទដែលត្រូវប្រារព្ធក្នុងទិវាគ្រូបង្រៀនឆ្នាំ ២០២២ គឺ «កម្រិតស្ថានភាពគ្រូបង្រៀននៅកម្ពុជា» ដែលលោកស្រីចង់ឃើញរូបភាពថ្មីនៅក្នុងវិស័យអប់រំ គ្រូបង្រៀនគួរបង្ហាញភាពស្អាតស្អំ ថ្លៃថ្នូរដោយបញ្ឈប់ការយកនំទៅលក់ក្នុងសាលា និងបញ្ឈប់បើកការបង្រៀនគួរក្រៅម៉ោង ដើម្បីបានចំណូលនិងគាបពិន្ទុសិស្សដែលគ្មានលទ្ធភាពរៀនគួរក្រៅម៉ោង។
ចំណែកក្រសួងអប់រំ យុវជននិងកីឡា នឹងរៀបចំទិវាគ្រូបង្រៀននៅថ្ងៃទី ៥ តុលា ក្រោមប្រធានបទ «គ្រូបង្រៀនយើង អនាគតយើង ប្រទេសជាតិយើង» មួយថ្ងៃពេញនៅវិទ្យាស្ថានគរុកោសល្យរាជធានីភ្នំពេញនិងមានផ្សាយផ្ទាល់តាមប្រព័ន្ធអនឡាញ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានឱ្យដឹងថា ក្រសួងអប់រំ ផ្តោតលើការលើកកម្ពស់ ជីវភាព និងគុណវុឌ្ឍិរបស់គ្រូបង្រៀនសម្រាប់ចូលរួមចំណែកពង្រឹងគុណភាពអប់រំដូចមានចែងនៅក្នុងផែនការយុទ្ធសាស្ត្រវិស័យអប់រំ ២០១៩-២០២៣។
លោកថា៖ «ជាក់ស្ដែងប្រាក់ខែគ្រូបង្រៀននៅឆ្នាំ ២០១៥ គឺចន្លោះជាង៥សែនរៀលដល់ ១ លាន ២ សែនរៀលនិងឆ្នាំ ២០២២ គឺចន្លោះ ១ លាន ២ សែនរៀលដល់ ២ លាន ១ សែនរៀល ហើយសម្តេចតេជោនាយករដ្ឋមន្ត្រីបានជម្រាបជូនមហាជនរួចមកហើយថា ចាប់ពីដើមឆ្នាំ ២០២៣ តទៅ ប្រាក់ខែគ្រូបង្រៀនគឺមានចំនួន ១ លាន ៥ សែនយ៉ាងតិច»៕
