ភ្នំពេញៈ ​ដោយមាន​ការសម្របសម្រួល និង​ជំនួយ​ពី​អង្គការ​គាំពារ​ជនរងគ្រោះ ដើមបណ្តឹង​រដ្ឋប្បវេណី​ចំនួន ១៧០​ នាក់ បាន​ចូលរួម​ស្តាប់​ការប្រកាស​សាលដីកា​លើ​បណ្តឹង​សារទុក្ខ​ដោយ​អង្គជំនុំជម្រះ​តុលាការ​កំពូល ​អ.វ.ត.ក​. នៅ​ថ្ងៃទី​ ២៦ ​ខែកញ្ញា ឆ្នាំ​ ២០២២​។

​យោងតាម​សេចក្តីប្រកាស​ព័ត៌មាន​របស់​អង្គជំនុំជម្រះ​តុលាការ​កំពូល ​អ.វ.ត.ក​. នៅ​ថ្ងៃទី ​២៨ ​ខែកញ្ញា ​ឆ្នាំ​ ២០២២ ​បានឱ្យដឹងថា​ ដើម​បណ្តឹង​រដ្ឋប្បវេណី​ទាំងនេះ​ជា​តំណាងឱ្យ​ផ្នែក​ដ៏​ធំ​នៃ​ដើម​បណ្តឹង​រដ្ឋប្បវេណី​ ដែល​ជ្រើសរើស​ផ្អែកលើ​លក្ខណវិនិច្ឆ័យ​ មានដូចជា​ ភេទ ​ជាតិពន្ធុ​ ទីតាំង​ភូមិសាស្ត្រ ​និង​បទចោទ ​ដែល​បាន​លើក​មក​សួរ​ដេញដោល​នៅពេល​សវនាការ ​ក្នុង​សំណុំរឿង​ ០០២/០២​។​

​សេចក្តីប្រកាស​ព័ត៌មាន​បន្តថា ​បន្ទាប់ពី​ស្តាប់​ការប្រកាស​សាលដីកា ​ដើម​បណ្តឹង​រដ្ឋប្បវេណី​បានធ្វើ​ដំណើរ​ទៅកាន់​មជ្ឈមណ្ឌល​ប្រជុំ Meeting Center នៅ​រាជធានី​ភ្នំពេញ ដើម្បី​ជួប​ជាមួយ​តំណាង​ផ្លូវច្បាប់​របស់​ខ្លួន ​និង​ពិភាក្សា​អំពី​សាលដីកា​នោះ​។ ពួកគាត់​បាន​សម្តែង​ក្តី​សោមនស្ស​រីករាយ​ចំពោះ​សាលដីកា ​និង​បានលើកឡើង ​នូវ​បញ្ហា​មួយចំនួន ​ដែលមាន​សារៈសំខាន់​ចំពោះ​ពួកគាត់ ​និង​សហគមន៍​របស់​ពួកគាត់​។​

​បើតាម​សេចក្តីប្រកាស​ព័ត៌មាន​នេះ មួយរយៈ​ពេលកន្លងមក ការរីក​រាលដាល​នៃ​ជំងឺ​កូ​វីដ​ ១៩ ពុំ​អាច​អនុញ្ញាត​ឱ្យមាន​ការជួប​ជុំ​ជា​ទ្រង់ទ្រាយ​ធំ​បានទេ​។ ហេតុនេះ អង្គភាព​គាំពារ​ជនរងគ្រោះ បាន​សម្របសម្រួល ​និង​រៀបចំ​ឱ្យមាន​ការជួបជុំ​តូចៗ​នៅតាម​សហគមន៍​ អនុញ្ញាតឱ្យ​ដើមបណ្តឹង​រដ្ឋប្បវេណី​បាន​ជួប​ជាមួយ​តំណាង​ផ្លូវច្បាប់​របស់ខ្លួន ​ដើម្បី​ទទួលបាន​ព័ត៌មាន​ស្ដីពី​ការវិវឌ្ឍ​ថ្មីៗ​សំណុំរឿង ០០២/០២​។

​លោក​ ហង្ស វណ្ណៈ ​ប្រធាន​អង្គភាព​គាំពារ​ជនរងគ្រោះ​ បានឱ្យដឹងថា​ ចាប់តាំងពី​ដើម​ឆ្នាំ ២០២២​ មក​ អង្គភាព​គាំពារ​ជនរងគ្រោះ ​បានរៀបចំ​វេទិកា​ចំនួន​៣​លើក ​ហើយនឹង​នៅតែ​បន្ត​រៀបចំ​វេទិកា​នានា​បន្ថែមទៀត ​ដើម្បី​ផ្សព្វផ្សាយ​ពី​បច្ចុប្បន្នភាព​នៃ​សាលដីកា​លើ​បណ្តឹង​សារទុក្ខ​របស់​អ.វ.ត.ក.។​

​លោក​បន្តថា ​អង្គភាព​គាំពារ​ជនរងគ្រោះ ​ក៏បាន​សម្របសម្រួល​ផងដែរ ​ដើម្បីឱ្យ​ដើម​បណ្តឹង​រដ្ឋប្បវេណី ​បាន​ចូលរួម​ក្នុង​អង្គសិក្ខាសាលា ​ស្តីពី​ជនរងគ្រោះ ​កាលពី​ខែឧសភា ​ឆ្នាំ ២០២២ ​ដែល​រៀបចំ​ការិយាល័យ​រដ្ឋបាល​ អ.វ.ត.ក. ​និង​បាន​ជួប​ជាមួយ​ក្រុម​ម្ចាស់​ជំនួយ​ចម្បង​សម្រាប់ ​អ.វ.ត.ក. ​(PDG) ​ដើម្បី​ពិភាក្សា​អំពី​ក្តី​ព្រួយបារម្ភ ​និង​សំណើ​របស់​ពួកគាត់​ជា​បន្តទៀត​។​

​លោក​ថ្លែងថា​៖ «ការសម្រប​សម្រួល ​ឱ្យ​ដើម​បណ្តឹង​រដ្ឋប្បវេណី​បាន​ចូលរួម​ទៅក្នុង​វេទិកា ​សវនាការ ​និង​ការពិភាក្សា​ជាមួយ​មេធាវី ​គឺជា​ការងារ​របស់​អង្គភាព​គាំពារ​ជន​រងគ្រោះ។ ការងា​រថ្មីៗ​នេះ​អាច​ដំណើរការ​ទៅបាន ​ដោយសារ​មាន​ការផ្ដល់​ថវិកា​ពី​គម្រោង​សេវាកម្ម​សន្តិភាព ​សម្រាប់​ជន​ស៊ីវិល ​(Civil Peace Services) ​នៃ​អង្គការ GIZ»៕