The Phnom Penh Post Search

Search form




Logo of Phnom Penh Post newspaper Phnom Penh Post - ជំនន់​ទឹក​ភ្លៀង​នៅ​ខេត្ត​ភាគ​និរតី​ឡើង​លឿន ​ខណៈ​ខេត្ត​ជាប់​ព្រំដែន​ថៃ​មាន​ការ​ថម​ថយ​បន្តិច​វិញ​

ជំនន់​ទឹក​ភ្លៀង​នៅ​ខេត្ត​ភាគ​និរតី​ឡើង​លឿន ​ខណៈ​ខេត្ត​ជាប់​ព្រំដែន​ថៃ​មាន​ការ​ថម​ថយ​បន្តិច​វិញ​

Content image - Phnom Penh Post
ស្ថានភាពទឹកលិចនៅអធិការដ្ឋាននគរបាល​ស្រុកស្ទោង ខេត្តកំពង់ធំនៅថ្ងៃទី ២៨ កញ្ញា។ រូបថត គណៈកម្មាធិការជាតិគ្រប់គ្រងគ្រោះមហន្តរាយ

ជំនន់​ទឹក​ភ្លៀង​នៅ​ខេត្ត​ភាគ​និរតី​ឡើង​លឿន ​ខណៈ​ខេត្ត​ជាប់​ព្រំដែន​ថៃ​មាន​ការ​ថម​ថយ​បន្តិច​វិញ​

ភ្នំពេញ ស្ថាន​ភាព​ជំនន់​ទឹក​ភ្លៀង​​ តាម​ប្រព័ន្ធ​អូរ ព្រែក និង​ស្ទឹង នៅ​បណ្ដា​ខេត្ត​ភាគ​និរតី រួមមាន​ ខេត្ត​កែប​ កំពត និង​កំពង់​ស្ពឺ ​បាន​ចាប់​ផ្ដើម​ជន់​ឡើង​យ៉ាង​លឿន​នៅ​ថ្ងៃទី​ ២៨​ ខែកញ្ញា​ ខណៈ​ក្រុមហ៊ុន​អគ្គិសនី​កំចាយ ​ស៊ី​ណូ​ហាយ​ដ្រូ បាន​បើក​ទ្វារ​ទឹក​ ដើម្បី​បង្ហូរទឹក​ចេញ​ពី​អាង​ការពារ​ការបាក់​ស្រុត​ទំនប់​អាង​ទឹក​ដ៏​ធំ​នេះ​ ក៏​ប៉ុន្តែ​នៅ​បណ្ដា​ខេត្ត​ជាប់​ព្រំដែន​ថៃបាន​ថម​ថយ​បន្តិច​វិញ​។​

​លោក ​ចាន់ វណ្ណា ប្រធាន​មន្ទីរ​ធន​ធាន​ទឹក និង​ឧតុ​និយម ​ខេត្ត​កំពត បាន​ប្រាប់ ​ភ្នំពេញ​ ប៉ុស្តិ៍​ថា​ ស្ថាន​ភាព​អាកាស​ធាតុ​នៅ​ព្រឹក​ថ្ងៃទី​ ២៨ ​ខែកញ្ញា​ ភ្លៀង​នៅ​តែ​បន្ត​ធ្លាក់​ក្នុង​កម្រិត​មធ្យម​នៅ​ឡើយ​ ធ្វើឱ្យ​តំបន់​ទំនប់​អាង​វា​រី​អគ្គិ​សនី​កំចាយ ​មាន​បរិមាណ​ទឹក​កើន​ឡើង​ច្រើន​លើស​កម្រិត​ដែល​ត្រូវ​រក្សា​ទុក​ ជា​ហេតុ​នាំឱ្យ​ខាង​ភាគី​ក្រុម​ហ៊ុន​អគ្គិ​សនី​កំចាយ ​សម្រេច​បើក​ទ្វារ​ទឹក​ដើម្បី​បញ្ចេញ​ទឹក​ពី​អាង​ ការ​ពារ​ការ​បាក់​ស្រុត​ទំនប់​អាង​ទឹក​។​

​លោក​ថ្លែង​ថា​៖ «​ក្នុង​ស្ថាន​ភាព​នេះ ​ធ្វើឱ្យ​តំបន់​វាល​ទំនាប​ជាប់​មាត់​ទឹក​មួយ​ចំនួន​រង​ការ​ជន់​លិច​ដោយ​អន្លើ ​ប៉ុន្តែ​មិន​ធ្ងន់​ធ្ងរ​នោះ​ទេ​»​។

​ជា​មួយ​គ្នា​នេះ លោក សោម វិចិត្រ ​ប្រធាន​មន្ទីរ​រ៉ែ និង​ថាម​ពល ​ខេត្ត​កំពត បាន​ប្រាប់ ​ភ្នំពេញ ​ប៉ុស្តិ៍​ថា ​នៅ​ពេល​នេះ ខាង​ក្រុម​ហ៊ុន​បាន​បើក​ទ្វារ​ទឹក​ក្នុង​កម្ពស់​កន្លះ​ម៉ែត្រ ​បន្ទាប់​ពី​បាន​បើក​កម្ពស់​ ១ ម៉ែត្រ​កាល​ពី​ព្រលប់​ថ្ងៃទី​ ២៧ ខែកញ្ញា​ ឆ្នាំ​ ២០២២​ គ្រា​ដែល​ទឹក​នៅ​ក្នុង​អាង​មាន​កម្ពស់​ដល់​ទៅ ​១៤៨,៦៩​ ម៉ែត្រ លើស​ពី​កម្រិត​កម្ពស់​ដែល​ត្រូវ​រក្សា​ទុក​ ឬ​ប្រកាស​ឱ្យ​មាន​ការ​ប្រុង​ប្រយ័ត្ន​ ០,៦៩ ​ម៉ែត្រ​។

​លោក​បាន​បញ្ជាក់​ថា​៖ «​កាលពី​យប់​មិញ​បរិមាណ​ទឹក​ភ្លៀង​ ដែល​បាន​ហូរ​ចូល​ទៅក្នុ​ង​អាង គឺ​ជាង​​ ១៤០​ ម៉ែត្រ​គុប​ ក្នុង​ ១ ​វិនាទី​ ធ្វើឱ្យ​ទឹក​នៅក្នុង​អាង​ជន់​ឡើង​យ៉ាង​គំហុក ​ដែល​តម្រូវឱ្យ​មាន​ការ​បើក​ទ្វារ​ទឹក​ ដើម្បី​ដោះ​ទឹក​ចេញពី​អាង​ ការ​ពារ​ការបាក់​ស្រុត​ទំនប់​អាង​វា​រី​អគ្គិ​សនី​ ដ៏​ធំ​នេះ​។ ប៉ុន្តែ​នៅ​ព្រឹក​ថ្ងៃទី​ ២៨ ​ខែកញ្ញានេះ ​ទឹក​នៅ​ក្នុង​អាង​ស្តុក​បាន​ស្រក​មក​នៅ​កម្ពស់ ​១៤៨,​៣៤ ​ម៉ែត្រ»​។​

​បើតាម​លោក វិចិត្រ ​ការបើក​ទ្វារ​ទឹក​ទំនប់​វា​រី​អគ្គិ​សនី​កំចាយ​នា​ពេល​នេះ មិន​ទាន់​បង្ក​ផល​ប៉ះពាល់​ជា​ដុំកំភួន ដល់​លំនៅ​ឋាន​ប្រជា​ពលរដ្ឋ​ ដែល​នៅ​ខ្សែ​ទឹក​ខាង​ក្រោម​ជាប់​ដង​ព្រែក​កំពង់​បាយ​នៅ​ឡើយ​ទេ​។ ទោះ​យ៉ាង​ណា លោក​អំពាវ​នាវ​ឱ្យ​ពលរដ្ឋ​ដែល​មាន​លំ​នៅ​ជាប់​ដង​ព្រែក​នេះ ​បង្កើន​ការ​ប្រុង​ប្រយ័ត្ន​ និង​ត្រៀម​ខ្លួន​ដើម្បី​ជម្លៀស​ទៅ​កាន់​ទីទួល​សុវត្ថិ​ភាព​ក្នុង​ករណី​ភ្លៀង​នៅ​តែ​បន្ត​ធ្លាក់ ធ្វើ​ឱ្យ​មាន​ការ​ជន់​លិច​ខ្លាំង​។​

​ស្រដៀង​គ្នា​នេះ ​អាជ្ញា​ធរ​ខេត្ត​កំពង់​ស្ពឺបាន​ជូន​ដំណឹង​ដល់​ប្រជា​ពលរដ្ឋ​ដែល​រស់​នៅតាម​បណ្តោយ​ស្ទឹង​ព្រែក​ត្នោត ត្រូវ​ប្រុង​ប្រយ័ត្ន​ខ្ពស់ និង​ត្រៀម​ខ្លួន​រក​ទីទួល​មាន​សុវត្ថិ​ភាព ដើម្បី​ការពារ​គ្រោះ​ថ្នាក់​ផ្សេងៗ​ជាយ​ថា​ហេតុ ​ខណៈ​ភ្លៀង​កំពុង​បន្ត​ធ្លាក់​ច្រើន​នៅ​តំបន់​ខាង​លើ​ (​តំបន់​ភ្នំ​) ធ្វើឱ្យ​ទឹក​នៅ​ក្នុង​ស្ទឹ​ងព្រែក​ត្នោត​ជន់​ឡើង​យ៉ាង​លឿន​គួរ​ឱ្យ​កត់​សម្គាល់​។​

​លោក ​វ៉ី សំណាង អភិ​បាល​ខេត្ត​កំពង់​ស្ពឺ បាន​ប្រាប់​ ភ្នំពេញ​ ប៉ុស្តិ៍​ថា ​ប៉ុន្មាន​ថ្ងៃ​កន្លង​មក​នេះ​នៅ​ផ្នែក​ខាងលើ (​តំប​ន់​ភ្នំ​) មាន​ភ្លៀង​ធ្លាក់​ខ្លាំង​ជា​បន្ត​បន្ទាប់​បង្ក​ឱ្យ​ទឹក​ស្ទឹង​ព្រែក​ត្នោត​ជន់​ឡើង​យ៉ាង​លឿន និង​បង្ក​ឱ្យ​លិច​លង់​ផ្ទះសំបែង ក៏​ដូច​ជា​ដំណាំ​រួមផ្សំ​មួយ​ចំនួន​របស់​ប្រជា​កសិករ​ខ្លះ ​ដែល​រស់នៅ​ទី​ទំនាប​ជាប់​មាត់​ស្ទឹង​នេះ​។

​លោក​បាន​ថ្លែង​ថា​៖ «​ថ្វីដ្បិត​តែ​នៅពេលនេះ​ ក​ម្ពស់​ទឹក​មិន​ទាន់​ហក់​ឡើងដ​ល់​កម្រិត​ប្រកាស​ឱ្យ​ប្រុង​ប្រយ័ត្ន ប៉ុ​ន្តែ​វា​បាន​បង្ក​ការជន់​លិច​ប៉ះ​ពាល់​លំនៅ​ឋាន​ប្រជា​ពលរដ្ឋ​មួយ​ចំនួន​ នៅ​ផ្នែក​ខាង​លើ​នៃ​ទ្វារ​ទឹក​រលាំង​ជ្រៃ​។ ដូច្នេះ ​អ្នក​នៅ​ផ្នែក​ខាង​ក្រោម​ទ្វារ​ទឹក​រលាំង​ជ្រៃ តាម​បណ្ដោយ​ស្ទឹង​ព្រែក​ត្នោត ​ត្រូវ​បង្កើន​ការ​ប្រុង​ប្រយ័ត្ន​ចំពោះ​ទឹក​ជំនន់​»​។​

​ចំណែក​អាជ្ញា​ធរ​ខេត្ត​ជាប់​ព្រំដែន​ខ្មែរ​ថៃ​វិញបាន​អះ​អាង​ថា នៅ​ពេល​នេះ​ស្ថាន​ភាព​ទឹក​បាន​ធូ​រស្រាល​បន្តិច​វិញ នៅ​ថ្ងៃទី​ ២៨ ​ខែកញ្ញា​ ដោយ​ទឹក​បាន​ហូរ​ស្រុង​ចុះ​ទៅ​បឹង​ទន្លេ​សាប ​តាម​ប្រព័ន្ធ ​អូរ ស្ទឹង​ បឹង​ ព្រែក​ធម្មជាតិ​នានា ដែល​នៅ​ផ្នែក​ខាង​ក្រោម​។

​លោក ​ចាប កុយ ​ប្រធាន​មន្ទីរ​ធន​ធាន​ទឹក​និង​ឧតុនិ​យម​ខេត្ត​ព្រះវិហារ​ បាន​ប្រាប់​ ភ្នំពេញ​ ប៉ុស្តិ៍​ថា ​កម្ពស់​ទឹក​ស្ទឹង​សែន ​នៅ​ស្ថា​នីយ​ជល​សាស្ត្រ​ខេត្ត​ព្រះវិហារ​ គិត​ត្រឹម​ម៉ោង​ ៣:៣០​ នាទី​រសៀល​ថ្ងៃទី​ ២៨​ ខែ​កញ្ញា​ ឆ្នាំ​ ២០២២​ ទឹក​មាន​កម្ពស់​ ១៣,៧០​ ម៉ែត្រ ​ទាប​ជាង​រសៀល​ថ្ងៃទី​ ២៧​ ខែ​កញ្ញា​ ០,១២ ​ម៉ែត្រ ​ខណៈ​កម្រិត​កម្ពស់​ប្រកាស​ឱ្យ​ប្រុង​ប្រយ័ត្ន​ ១១,៥០​ ម៉ែត្រ​។ ប៉ុន្តែ​កម្ពស់​ទឹក​នៅ​ក្នុង​អាង​ទឹក​រក្សា ​បាន​ហក់​ឡើង​បន្តិច​វិញ ​គឺ​ ៤៦,៥០ ​ម៉ែត្រ ​ធៀប​នឹង​នី​វ៉ូទឹក​សមុទ្រ ​ដែល​កាល​ពី​រសៀល​ថ្ងៃទី​ ២៧​ ខែ​កញ្ញា ​ទឹក​នៅ​ក្នុង​អាង​នេះ ​មាន​កម្ពស់​ត្រឹមតែ​ ៤៦,៣៥​ ម៉ែត្រ​ប៉ុណ្ណោះ​។​

​លោក ​កុយ បាន​និយាយ​ថា​៖«​នៅ​ពេល​នេះ ទឹក​បាន​ជន់​លិច​ផ្លូវ លំនៅឋា​ន និង​ស្រែ​ចម្ការ​របស់​ប្រជា​ពលរដ្ឋ​ជា​ច្រើន ​ដែល​ស្ថិត​នៅ​តាម​ទំនាប​ជាប់​ដង​ស្ទឹង​សែន និ​ង​ផ្នែក​ខ្លះ​ទៀត​នៃ​ស្រុក​រវៀង ​និង​ស្រុក​ជ័យ​សែន​»​។​

​ស្រ​ដៀង​គ្នា​នេះ​ដែរ ​លោក ​អ៊ុំ រាត្រី អភិបាល​ខេត្ត​បន្ទាយ​មាន​ជ័យ បាន​ប្រាប់​ ភ្នំពេញ​ ប៉ុស្តិ៍​ថា ​ស្ថាន​ភាព​ទឹក​ជំនន់​ពី​ដង​ស្ទឹង​ស្រែង និង​ស្ទឹង​ក្រឡាញ់​ នៅ​ប៉ែក​ខាង​កើត ​ស្រុក​ព្រះ​នេត្រ​ព្រះ និង​ស្រុក​ភ្នំស្រុក​ នៅ​ពេល​នេះ​ បាន​ផ្តើម​ស្រក​ចុះ​បន្តិច​វិញ​ហើយ ប៉ុន្តែ​កម្លាំង​ចម្រុះ​នៅ​បន្ត​ជម្លៀស​ពលរដ្ឋ​រង​គ្រោះ​ទៅ​ទីទួល​សុវត្ថិ​ភាព​។​

​លោក​បាន​បញ្ជាក់​ថា​៖ «​ឥឡូវ​ទឹក​បាន​ស្រក​បន្តិច​ហើយ ប៉ុន្តែ​ផល​ប៉ះ​ពាល់​ដំណាំ​ស្រូវ ​និង​ដំណាំ​រួមផ្សំ​របស់​ប្រជា​ពលរដ្ឋ​មានការ​កើន​ឡើង​ ព្រោះ​ទឹក​វា​ស្រក​យឺត​ពេក​។ តាម​របាយ​ការណ៍​បឋម​ពី​អាជ្ញាធរ​ស្រុក​ទាំង​២​នេះ ផល​ប៉ះ​ពាល់​លំនៅ​ឋាន​ពលរដ្ឋ​ជាង ​១ ៥០០ ​គ្រួសារ ក្នុង​នោះ​មនុស្ស​ជាង​ ៤០០ ​នាក់ ​ត្រូវ​បាន​ជម្លៀស​ទៅ​កាន់​ទីទួល​សុវត្ថិ​ភាព​។ប៉ះ​ពាល់​ដំណាំ​ស្រូវ ​១៣ ៨៥៤ ​ហិក​តា ដំឡូង​មី​ ៤៩០​ ហិក​តា មណ្ឌល​សុខ​ភាព​ ១ សា​លា​រៀន ​១៦​ វត្ត​ ៥ ទឹក​ហូរ​កាត់​ផ្លូវ​លើ​ ៦២ ​ខ្សែ ប្រវែង ​៤៧ ៣៥៥​ ម៉ែត្រ​»​។​

​បើតាម​លោក អ៊ុំ រាត្រី ​ការ​ជន់​លិច​ប៉ែក​ខាង​កើត​នៃ​ស្រុក​ព្រះ​នេត្រ​ព្រះ​ និង​ស្រុក​ភ្នំស្រុក​មិន​មែន​បណ្ដាល​មក​ពី​មាន​ទឹក​ហូរ​ធ្លាក់​តាម​អូរ​ព្រំដែន​ប្រទេស​ថៃ​ នោះ​ទេ ​តែដោយ​សារ​ការ​ទទួល​រងគ្រោះ​ទឹក​ជំនន់​ដែល​ហូរ​ធ្លាក់ពី​ខេត្ត​ឧត្តរ​មាន​ជ័យ ​តាម​រយៈ​ស្ទឹង​ស្រែង ​និង​ស្ទឹង​ក្រឡាញ់ ​ក្រោយ​ពី​មាន​ភ្លៀង​ធ្លាក់​ខ្លាំង​ជាប់ៗ​គ្នា ដែល​បង្ក​ពី​បាតុ​ភូតវិ​សម្ពាធ​ទាប និង​ឥទ្ធិ​ពល​នៃ​ព្យុះ​មូសុង​ក្នុង​តំបន់​។​

​យ៉ាង​ណា​ក៏ដោយ ​នៅ​ខេត្ត​សៀមរាប ​និង​ខេត្ត​កំពង់​ធំ ស្ថានភា​ព​ទឹក​ជំនន់ ​គិត​ត្រឹម​ថ្ងៃទី ​២៨​ ខែកញ្ញា​ ឆ្នាំ​ ២០២២ នៅ​តែ​បន្ត​ជន់​លិច​គ្រប់​ទីកន្លែង​នៅ​ឡើយ ​ប៉ុន្តែ​អាជ្ញាធរ​នៃ​ខេត្ត​ទាំង ​២ នៅតែ​អះអាង​ថា មិន​ធ្ងន់​ធ្ងរ រហូត​មិនអា​ច​គ្រប់​គ្រង​បាន​នោះ​ទេ​។

​លោក សុខ ហៃ អភិ​បាល​រង និងជា​អ្នកនាំ​ពាក្យ​រដ្ឋបាល​ខេត្ត​កំពង់ធំ​ បាន​ប្រាប់​ ភ្នំពេញ​ ប៉ុស្តិ៍​ថា ​ជំនន់​ទឹកភ្លៀងបាន​ជន់​លិចស្ទើរ​គ្រប់​កន្លែង​ទូទាំង​ក្រុង​-​ស្រុក​ទាំង​អស់​នៃ​ខេត្ត​នេះ ​ប៉ុន្តែស្រុក​ចំនួន​ ៣ ​រួមមាន​ ស្រុក​ស្ទោង ស្រុក​កំពង់​ស្វាយ​ និង​ប្រា​សាទ​ប​ល្ល័ង្ក​ រង​ការ​ជន់​លិច​ធ្ងន់​ធ្ងរ​ជាង​គេ ​ដោយ​ប៉ះពាល់​កំណាត់​ផ្លូវ​ជាតិ​លេខ ​៦ និង​ផ្លូវលំ​ជន​បទ​ជា​ច្រើន​កន្លែង ​ដែល​តម្រូវ​ឱ្យ​មាន​ការ​បិទ​ផ្អាក​ការ​ធ្វើ​ចរាច​រណ៍​ឆ្លង​កាត់​ជា​បណ្ដោះ​អាសន្ន​ ដើម្បី​ការពារ​ការ​ខូច​ខាត​ផ្លូវ​ធ្ងន់​ធ្ងរ​ជាង​នេះ​។

​លោក​បាន​បញ្ជាក់​ថា​៖ «​ចំណែក​ឯ​ដំណាំ​ស្រូវ​និង​ដំណាំ​រួម​ផ្សំ​វិញ​គឺ​ខូចខា​ត​សរុប​ជាង​ ១ ​ម៉ឺន​ហិក​តា ​ប៉ះពាល់​ជីវភាព​ប្រជា​ពលរដ្ឋ​ជាង​ ២​ ម៉ឺន​គ្រួសារ​ ប៉ុន្តែ​វា​នៅ​មិន​ទាន់​ធ្ងន់​ធ្ងរ​នៅឡើយ​ទេ បើ​ប្រៀប​ធៀប​នឹង​បណ្ដា​ឆ្នាំ​មុនៗ​»​។​

​ចំណែក ​លោក ឡុង កុសល អ្នក​នាំ​ពាក្យ អាជ្ញាធ​រជាតិ​អប្សរា ​បាន​ប្រាប់ ​ភ្នំពេញ​ ប៉ុស្តិ៍​ដែរ​ថា ជំនន់​ទឹក​ភ្លៀង ​និងទឹក​ដែល​ហូរ​ធ្លាក់​ពី​ខេត្ត​ឧ​ត្ត​រ​មាន​ជ័យ​តាម​ដង​ស្ទឹង​ស្រែង​ បាន​បង្ក​ឱ្យ​ជន់​លិច​ផ្នែក​ខ្លះ​នៃ​តំបន់​រមណី​យ​ដ្ឋា​ន​
ប្រា​សាទ​អង្គរ ​ប៉ុន្តែ​ស្ថាន​ភាព​នៅ​អាច​គ្រប់​គ្រង​បាន​។

​លោក​ថ្លែង​ថា​៖ «​នៅពេ​លនេះ ក្រុ​មការងារ​យើង​បាន​រំដោះ​ទឹក​នៅ​ប្រា​សាទ​មួយ​ចំនួន​ដូច​ជា ​ប្រាសាទ​អង្គរវត្ត ព្រះ​ខ័ន តា​ព្រហ្ម និង​ប្រាសាទ​បា​យ័ន ដោយ​បាន​បញ្ចៀស​ទឹក​តាម​ប្រព័ន្ធ​ប្រឡាយ​បុរាណ ​ឱ្យ​ហូរ​ស្រុង​ទៅតាម​ស្ទឹង​នានា ​ដូច​ជា ​ស្ទឹង​សៀម​រាប ស្ទឹង​រលួស ស្ទឹង​ពួក និ​ង​ស្ទឹង​ព្រះ​ស្រុក ​ដើម្បី​កុំឱ្យ​មាន​ផល​ប៉ះពាល់​ជា​អវិជ្ជមាន​ដល់​តំបន់​ប្រា​សាទ និង​ក្រុង​សៀម​រាប​»​។​

​បើតាម​របាយ​ការណ៍​ពី​រដ្ឋបាល​ខេត្ត​សៀម​រាប ស្រុក​ស្រី​ស្នំ ​និងស្រុក​ក្រឡាញ់​ មាន​ការប្រឈម​គ្រោះ​ទឹក​ជំនន់​ខ្លាំង​ជាង​គេ ដោយ​ប៉ះ​ពាល់​ប្រជា​ពលរដ្ឋ​សរុប​ជាង ​៨០០ ​គ្រួសារ លិច​ប៉ះពាល់​ដំណាំ​ស្រូវ​ជាង​១​ម៉ឺន​ហិកតា ​និង លិច​ផ្លូវ​ជា​ច្រើន​កន្លែង ព្រម​ទាំង​មណ្ឌល​សុខ​ភាព សាលា​រៀន និង​វត្ត​អា​រាម​មួយ​ចំនួន​ទៀត​។​

​ដោយ​ឡែក​នៅឯ​ខេត្ត​កំពង់​ឆ្នាំង​វិញ ទឹក​ទន្លេ​សាប​បាន​ជន់​ឡើង​លិច​ផ្ទះ​ប្រជា​ពលរដ្ឋ​នៅ​ស្រុក​កំពង់​លែង និង ស្រុក​បរិបូណ៌ សរុប​ ១៥៣ ​ខ្នង​។ នេះ​បើ​យោង​តាម​របាយ​ការណ៍រ​បស់​រដ្ឋបាល​ខេត្ត​កំពង់​ឆ្នាំង ​ដែល​ភ្នំពេញ​ប៉ុស្តិ៍​ទទួល​បាន នៅ​ព្រឹក​ថ្ងៃទី​ ២៨ ​ខែកញ្ញា​ ៕

អត្ថបទគួរចាប់អារម្មណ៍