.jpg)
លោកនាយករដ្ឋមន្ត្រី ហ៊ុន សែន និងលោក គីស៊ីដា ហ្វូមីអូ នាយករដ្ឋមន្ត្រីជប៉ុន នៅក្នុងជំនួបកាលពីថ្ងៃម្សិលមិញ។ រូបថត SPM
ភ្នំពេញៈ នាយករដ្ឋមន្ត្រីជប៉ុន លោក គីស៊ីដា ហ្វូមីអូ (Kishida Fumio) បញ្ជាក់ថា ដំណើរទស្សនកិច្ចរបស់លោកមកកាន់កម្ពុជានៅខែវិច្ឆិកាខាងមុខនឹងបន្តពង្រឹងកិច្ចសហប្រតិបត្តិការជាមួយគ្នា ហើយលោកក៏ស្នើលោកនាយករដ្ឋមន្ត្រី ហ៊ុន សែន គាំទ្រជប៉ុនក្នុងក្របខ័ណ្ឌរវាងអាស៊ាន និង ជប៉ុន។
លោកបញ្ជាក់ដូច្នេះ ក្នុងជំនួប នាថ្ងៃទី ២៨ ខែកញ្ញា ជាមួយលោក ហ៊ុន សែន ក្នុងឱកាស លោកចូលរួមពិធីបុណ្យសពថ្នាក់ជាតិរបស់អតីតនាយករដ្ឋមន្ត្រីជប៉ុន លោក ស៊ីនហ្សូ អាបេ (Shinzo Abe) នៅទីក្រុងតូក្យូ ប្រទេសជប៉ុន។ ក្នុងជំនួបនោះ លោក ហ៊ុន សែន បានអញ្ជើញលោក Kishida ចូលរួមកិច្ចប្រជុំកំពូលអាស៊ាន-ជប៉ុន និងកិច្ចប្រជុំកំពូលអាស៊ីបូព៌ានៅខែវិច្ឆិកានៅកម្ពុជា និងបានអរគុណ លោក Kishida ដែលបានគាំទ្រកម្ពុជាធ្វើជាប្រធានអាស៊ាន។ លោក Kishida បានថ្លែងអំណរគុណដល់លោក ហ៊ុន សែន ចំពោះការអញ្ជើញលោកចូលរួមកិច្ចប្រជុំទាំង ២ នេះ។
ហ្វេសប៊ុកលោក ហ៊ុន សែន បញ្ជាក់នៅក្រោយជំនួបនេះថា៖ «ឯកឧត្តម [Kishida] ក៏បានបញ្ជាក់ថា ដំណើរទស្សនកិច្ចរបស់ឯកឧត្តមមកកាន់ប្រទេសកម្ពុជា នៅខែវិច្ឆិកា ឆ្នាំ ២០២២ ខាងមុខនេះ នឹងបន្តពង្រឹងពង្រីកកិច្ចសហប្រតិបត្តិការជាមួយប្រទេសកម្ពុជា។ ឯកឧត្តម ក៏បានស្នើសម្តេចតេជោ គាំទ្រជប៉ុនក្នុងក្របខ័ណ្ឌរវាងអាស៊ាន និងជប៉ុនផងដែរ»។
លោក ហ៊ុន សែន ក៏បានថ្លែងអំណរគុណដល់លោក Kishida ដែលបានថ្លែងក្នុងមហាសន្និបាត អង្គការសហប្រជាជាតិពាក់ព័ន្ធនឹងវិភាគទានរបស់ជប៉ុនដល់ប្រទេសកម្ពុជា ជាពិសេសក្នុងក្របខ័ណ្ឌរក្សាសន្តិភាពរបស់ប្រជាជនជប៉ុននៅប្រទេសកម្ពុជា។ លោក ហ៊ុន សែន បញ្ជាក់ ក្នុងមហាសន្និបាតនេះថា កម្ពុជានឹងបន្តចូលរួមក្នុងការរក្សាសន្តិភាពក្រោមឆត្រអង្គការសហប្រជាជាតិនាពេលខាងមុខទៀត។
យោងតាមហ្វេសប៊ុករបស់លោកនាយករដ្ឋមន្ត្រី ហ៊ុន សែន លោក Kishida ក៏បានថ្លែងអំណរគុណដល់លោក ហ៊ុន សែន និងរាជរដ្ឋាភិបាលកម្ពុជា ដែលកន្លងមកបានទទួលនាវាជប៉ុនក្នុងការចូលចតនៅកំពង់ផែខេត្តព្រះសីហនុ។
គួរបញ្ជាក់ថា កាលពីខែមីនា នាវាកងស្វ័យការពារជើងទឹកជប៉ុន ២ គ្រឿង URAGA និង HIRADO ដែលមានកងនាវិក ១៨០ នាក់បានសុំចូលចតនៅកំពង់ផែស្វយ័តក្រុងព្រះសីហនុរយៈពេល ៣ ថ្ងៃ ដើម្បីលើកកម្ពស់មិត្តភាព ពង្រឹងការយល់ដឹងពីគ្នាជាមួយកងទ័ពជើងទឹកកម្ពុជា និងសម្រេចបាននូវឥណ្ឌូប៉ាស៊ីហ្វិកសេរី និងបើកចំហ។
លោក ហ៊ុន សែន ជួបជាមួយលោក Kishida Fumio នៅតូក្យូ ពីថ្ងៃទី ២៨ កញ្ញា។ រូប SPM
កងនាវាកងស្វ័យការពារជើងទឹកជប៉ុនបានធ្វើការហ្វឹកហ្វឺនបោសសម្អាតមីនដែលជាលំហាត់សុច្ឆន្ទៈជាមួយកងទ័ពជើងទឹកកម្ពុជា និងបានទៅបំពេញទស្សនកិច្ចទៅកាន់មូលដ្ឋានកងទ័ពសមុទ្ររាម នាខេត្តព្រះសីហនុ។
លោក ហ៊ុន សែន និងលោក Kishida ក៏បានពិភាក្សាផ្លាស់ប្ដូរមតិគ្នាជុំវិញស្ថានភាពក្នុងតំបន់ និងអន្តរជាតិ បញ្ហានៅមីយ៉ាន់ម៉ាបញ្ហានៅសមុទ្រចិនខាងត្បូងបញ្ហានៅឧបទ្វីបកូរ៉េ និងសង្គ្រាមនៅអ៊ុយក្រែន។
ហ្វេសប៊ុកដដែលឱ្យដឹងថា បញ្ហានៅមីយ៉ាន់ម៉ា លោក Kishida ក៏បានបញ្ជាក់ថា លោកពិតជាអរគុណចំពោះការខិតខំប្រឹងប្រែងទាំងអស់របស់លោក ហ៊ុន សែន ថ្វីដ្បិតស្ថានភាពមីយ៉ាន់ម៉ាជាការបារម្ភ ប៉ុន្តែជប៉ុននៅតែបន្តគាំទ្រការខិតខំប្រឹងប្រែងរបស់អាស៊ានទាំងឡាយ។
លោក ហ៊ុន សែន បញ្ជាក់ថា៖ «បញ្ហាមីយ៉ាន់ម៉ា យើងនឹងបន្តការងារនេះក្នុងក្របខ័ណ្ឌអាស៊ាន ហើយយើងនឹងបន្តក្នុងការជំរុញ ទោះបីជាការប្រឈមក៏ដោយ គឺយើងមិនបោះចោលការងារនោះទេ។ ចំពោះបញ្ហាផ្សេងៗទៀត ដែលឯកឧត្តមនាយករដ្ឋមន្ត្រីជប៉ុនបានលើកឡើង យើងនឹងបន្តធ្វើកិច្ចការជាមួយគ្នាបន្តទៀត»។
ចំពោះបញ្ហានៅឧបទ្វីបកូរ៉េ លោក Kishida បានលើកឡើងជាពិសេសពាក់ព័ន្ធទៅនឹងបញ្ហានុយក្លេអ៊ែរ និងការចាប់ជំរិតជនជាតិជប៉ុន ដែលជាការបារម្ភរបស់ប្រទេសជប៉ុន ក៏ដូចជាសហគមន៍អន្តរជាតិផងដែរ។
កាលពីខែមីនា លោក Kishida បានមកបំពេញទស្សនកិច្ចនៅកម្ពុជារយៈពេល ២ ថ្ងៃ ដើម្បីពង្រឹងទំនាក់ទំនង និងកិច្ចសហប្រតិបត្តិការរវាងប្រទេសទាំង ២។
លោក ថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គ សម្រាប់ការសិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ី (AVI) ប្រាប់ភ្នំពេញប៉ុស្តិ៍ថា ដំណើររបស់លោកនាយករដ្ឋមន្ត្រី ហ៊ុន សែន ចូលរួមពិធីបុណ្យសពអតីតនាយករដ្ឋមន្ត្រីជប៉ុនលោក អាបេ គឺជាសក្ខីភាពដ៏រឹងមាំនៃទំនាក់ទំនងជិតស្និទ្ធកម្ពុជា-ជប៉ុន។ ជប៉ុនគឺជាមិត្តចាស់ និងជាដៃគូអភិវឌ្ឍន៍ដ៏សំខាន់របស់កម្ពុជា ដែលជប៉ុនបានជួយកសាងហេដ្ឋារចនាសម្ព័ន្ធ កសាងធនធានមនុស្ស ក៏ដូចជាសង្គមសេដ្ឋកិច្ចកម្ពុជាជាច្រើន។
លោកថ្លែងថា៖ «ដំណើរទស្សនកិច្ចនាយករដ្ឋមន្ត្រីជប៉ុន លោក គីស៊ីដា ហ្វូមីអូ នៅខែវិច្ឆិកាខាងមុខនេះ គឺមានលក្ខណៈជាដំណើរទស្សនកិច្ចជាប្រពៃណីផង និងជាដំណើរទស្សនកិច្ចជាយុទ្ធសាស្ត្រផងដែរ ពោលដំណើរទស្សនកិច្ចរបស់លោក គឺដើម្បីពង្រីកទំនាក់ទំនងកម្ពុជាលើវិស័យពាណិជ្ជកម្ម វិនិយោគ ថាមពល ស្បៀងអាហារ ការអភិវឌ្ឍធនធានមនុស្សក៏ដូចជាកិច្ចថែរក្សាសន្តិសុខនៅក្នុងតំបន់ និងសកល»។
លោក ថុង ម៉េងដាវិត បញ្ជាក់ថា ការប្រកួតប្រជែងរបស់ «មហាអំណាច និងល្បែងភូមិសាស្ត្រនយោបាយ» បានធ្វើឱ្យកម្ពុជាកាន់តែត្រូវការជប៉ុនបន្ថែមលើកិច្ចការអភិវឌ្ឍន៍សេដ្ឋកិច្ច និងការកសាងសមត្ថភាពកងទ័ពកម្ពុជា ដើម្បីត្រៀមខ្លួនក្នុងកិច្ចការការពារសន្តិសុខពិភពលោក ក្រោមឆត្ររបស់អង្គការសហប្រជាជាតិ៕
