.jpg)
ជនជាតិចិនដែលលួចឆ្លងចូលមកកម្ពុជាតាមសមុទ្រ។ រូប រដ្ឋបាលខេត្តព្រះសីហនុ
ភ្នំពេញៈ នគរបាលនៃអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ នៅថ្ងៃទី ២៨ កញ្ញា កំពុងបន្តសួរនាំ និងកសាងសំណុំរឿងដើម្បីបញ្ជូនចេញជនជាតិចិនចំនួន ២១ នាក់បន្ទាប់ពីពួកគេត្រូវបានបញ្ជូនមកដល់អគ្គនាយកដ្ឋានអន្តោប្រវេសន៍នៅយប់ថ្ងៃទី ២៧ ខែកញ្ញា ខណៈក្នុងរយៈពេល ៩ ខែ ឆ្នាំ ២០២២ កម្ពុជាបានបញ្ជូនជនបរទេសចេញសរុបចំនួន ១ ៤៥០ នាក់។
លោក កែវ វណ្ណថន អគ្គនាយករងនៃអគ្គនាយកដ្ឋានអន្តោប្រវេសន៍ ថ្លែងប្រាប់ ភ្នំពេញ ប៉ុស្តិ៍ នៅថ្ងៃទី ២៨ កញ្ញាថា៖ «ជនជាតិចិន ២១ នាក់នេះយើងកំពុងតែសួរនាំ និងរៀបចំនីតិវិធីដើម្បីធ្វើការបណ្តេញចេញ ដោយសារអ្នកទាំងនេះអត់មានលិខិតឆ្លងដែនទេ គឺលួចឆ្លងដែនខុសច្បាប់»។
ជនជាតិចិនទាំង ២១ នាក់នេះ ស្ថិតក្នុងចំណោមជនជាតិចិនសរុប ៤១ នាក់ដែលបានឆ្លងដែនចូលកម្ពុជាតាមផ្លូវទឹក នៅថ្ងៃទី ២២ ខែកញ្ញា ឆ្នាំ ២០២២ និងបានជួបឧបទ្ទវហេតុលិចទូកចំនួន ១ គ្រឿង ស្ថិតនៅចន្លោះពយសារឿង និងកោះតាង ក្នុងភូមិសាស្រ្តខេត្តព្រះសីហនុ។
ឧបទ្ទវហេតុនេះត្រូវបានកម្លាំងនគរបាលការពារព្រំដែនទឹកសង្គ្រោះបានចំនួន ១៨ នាក់ (ប្រុស) ប្រជានេសាទខ្មែរសង្គ្រោះបាន ៤ នាក់ (ស្លាប់ម្នាក់ភេទស្រី) និងកម្លាំងស្នងការដ្ឋាននគរបាលខេត្តព្រះសីហនុរកឃើញសាកសពចំនួន ២ នាក់ កងការពារព្រំដែនស្រុកហ្វូគួក ខេត្តគៀងយ៉ាង (វៀតណាម) សង្គ្រោះបានចំនួន ៩ នាក់។ នេះបើតាមនាយកដ្ឋាននគរបាលការពារព្រំដែនទឹក។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានឱ្យដឹងនៅថ្ងៃទី ២៧ កញ្ញាថា សមត្ថកិច្ច និងក្រុមជួយសង្គ្រោះកំពុងបន្តស្វែងរកអ្នកបាត់ខ្លួន ៨ នាក់ផ្សេងទៀត។
ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ ២០២១ និងលើកទិសដៅបន្ដរបស់អគ្គនាយកដ្ឋានអន្ដោប្រវេសន៍ កាលពីថ្ងៃទី ៦ ខែមេសា ឆ្នាំ ២០២២ លោក ស ខេង រដ្ឋមន្ត្រីក្រសួងមហាផ្ទៃ បានក្រើនរំឭកទៅកម្លាំងនគរបាលអន្ដោប្រវេសន៍ នៅតាមព្រំដែនត្រូវពង្រឹងការគ្រប់គ្រងការចេញចូលរបស់ជនបរទេសឱ្យបានល្អ។ លោកថា អាជ្ញាធរត្រូវតែបណ្តេញចេញពីកម្ពុជា រាល់ជនបរទេសទាំងឡាយណា ដែលចូលមកកម្ពុជាដោយខុសច្បាប់ ដោយអនុវត្តច្បាប់កម្ពុជាតែមួយ ដោយមិនគិតថា ជនបរទេសទាំងនោះជាជាតិសាសន៍ណាឡើយ។
ក្នុងរយៈពេល ៩ ខែឆ្នាំ ២០២២ អគ្គនាយកដ្ឋានអន្តោប្រវេសន៍បានបណ្តេញជនបរទេសចេញពីកម្ពុជាសរុប១ ៤៥០ នាក់ (ស្រី ២៧៩ នាក់) មាន ៣២ សញ្ជាតិ ក្នុងនោះកាលពីថ្ងៃទី ២៣ កញ្ញា ទើបបានបណ្ដេញជនបរទេសចំនួន ២៣០ នាក់ (ស្រី ៥០ នាក់) ចេញពីកម្ពុជាផងដែរ។ នេះបើតាម លោក កែវ វណ្ណថន។
រដ្ឋបាលខេត្តព្រះសីហនុបានឱ្យដឹងតាមរយៈហ្វេសប៊ុកនៅយប់ថ្ងៃទី ២៧ កញ្ញាថា នៅព្រឹកថ្ងៃទី ២៧ កញ្ញា លោក គួច ចំរើន អភិបាលខេត្តព្រះសីហនុបានផ្តល់ថវិកាលើកទឹកចិត្តដល់ប្រជានេសាទ ០៤ នាក់ដែលបានចូលរួមជួយសង្គ្រោះជនរងគ្រោះក្នុងករណីលិចទូក។
លោកអភិបាលខេត្តបានថ្លែងអំណរគុណ និងកោតសរសើរដល់បងប្អូនអ្នកនេសាទ ដែលបានខិតខំជួយរុករកជនរងគ្រោះជាជនជាតិចិនដែលបានជួបគ្រោះថ្នាក់ក្នុងហេតុការណ៍លិចទូក កាលពីវេលាម៉ោង ១០ និង ៣០ នាទីព្រឹក ថ្ងៃទី ២២ ខែកញ្ញា។ ជាមួយគ្នានេះ លោកក៏បានដាក់ចេញនូវបទបញ្ជាដល់អាជ្ញាធរ កម្លាំងមានសមត្ថកិច្ច ក្រុមជួយសង្គ្រោះ និងមានការចូលរួមពីក្រុមហ៊ុនទូកទេសចរណ៍របស់លោកឧកញ៉ា ទៀ វិចិត្រ ចេញជួយសង្គ្រោះបន្ទាន់ និងបានប្រកាសជូនដំណឹងដល់ប្រជានេសាទ និងក្រុមជួយសង្គ្រោះផ្សេងទៀត ក្នុងករណីសង្គ្រោះបានជនរងគ្រោះម្នាក់ រដ្ឋបាលខេត្តនឹងផ្តល់ជូនថវិកាលើកទឹកចិត្តចំនួន ២ លានរៀល៕
