.jpg)
បុរសម្នាក់កំពុងមើលព័ត៌មានអំពីបារីអេឡិចត្រូនិច ដែលដាក់លក់តាមបណ្ដាញសង្គម។ ហុង មិនា
ភ្នំពេញៈ ក្រុមអង្គការសង្គមស៊ីវិលដែលធ្វើការងារលើកកម្ពស់សុខុមាលភាពកុមារ និងយុវជន ទទូចឱ្យអាជ្ញាធរ ចាត់វិធានការបន្ថែមទៀតប្រឆាំងនឹងជំនួញបារីអេឡិចត្រូនិកតាមអនឡាញ ដែលបារីប្រភេទនេះបង្កផលប៉ះពាល់យ៉ាងធ្ងន់ធ្ងរដល់សួត បេះដូង និងខូចខាតដល់ប្រព័ន្ធខួរក្បាល។
ស្ថាប័នអង្គការសង្គមស៊ីវិលចំនួន ២ រួមមាន អង្គការចលនាដើម្បីសុខភាពកម្ពុជា និងសម្ព័ន្ធកម្ពុជាដើម្បីប្រយុទ្ធនឹងជំងឺឆ្លង នៅថ្ងៃទី ២៧ កញ្ញា បានចេញសេចក្ដីប្រកាសព័ត៌មានរួម ១ ព្រមានពីករណីឈ្មួញជ្រើសយកផលិតផល ដែលយុវជន និងកុមារស្គាល់ស្រាប់ ដាក់លើសម្បកបារីអេឡិចត្រូនិក ហើយលក់តាមអនឡាញដោយផ្ដោតសំខាន់លើទីផ្សារនៅកម្ពុជា។
សេចក្ដីប្រកាសព័ត៌មានលើកឡើងថា អ្នកផលិតបារីអេឡិចត្រូនិក បានផលិតទឹកសូលុយស្យុង រសជាតិកូកាកូឡា (Cocacola) ប៉ិបស៊ី (Pepsi) ហ្វាន់តា (Fanta) គោជល់ (Red Bull) ស្ករកៅស៊ូឌុបបលមីន (Duoblemint) និងស្ករផ្លេ (Play) ដើម្បីដាក់លក់តាមបណ្ដាញសង្គម និងស្វែងរកអតិថិជនថ្មី គឺសំដៅទៅលើយុវជន និងកុមារ។
សេចក្ដីប្រកាសព័ត៌មានបញ្ជាក់ ថា៖ «បារីអេឡិចត្រូនិកនេះ គឺមានផ្ទុកសារធាតុនីកូទីន បើសិនជា យុវជន និងកុមារបានប្រើប្រាស់បារីនេះ វាបង្កគ្រោះថ្នាក់យ៉ាងធ្ងន់ធ្ងរ ដល់សួត បេះដូង និងជាពិសេសខូចខាតដល់ប្រព័ន្ធខួរក្បាល។ ប៉ុន្តែ វាត្រូវបានផ្សព្វផ្សាយបំភាន់ដោយអ្នកចែកចាយ និងអ្នកផលិត ថា ជាមធ្យោបាយផ្ដាច់បារី»។
នាយកប្រតិបត្តិអង្គការចលនា ដើម្បីសុខភាពកម្ពុជា លោកវេជ្ជបណ្ឌិត មុំ គង់ បានប្រាប់ថា បារីអេឡិចត្រូនិក និងបារីធម្មតា គឺវាជាផលិតផលថ្នាំជក់ និងមានគ្រោះថ្នាក់ដល់សុខភាពដូចគ្នា។ ចំណែកភាពខុសគ្នា រវាងបារីអេឡិចត្រូនិក គឺអ្នកប្រើប្រាស់ ជក់បារីនេះ មិនមានផ្សែងទេ ហើយបារីនេះ គឺផលិតឡើងសម្រាប់យុវជន និងកុមារ។
លោកវេជ្ជបណ្ឌិត មុំ គង់ ថ្លែងថា៖ «ចំពោះយុវជន និងកុមារ ដែលប្រើប្រាស់បារីអេឡិចត្រូនិក គឺវាមានសារធាតុនីកូទីន ហើយសារធាតុនេះញៀនខ្លាំងណាស់ ដែលធ្វើឱ្យខួរក្បាលកុមារ និងយុវជនត្រូវបានប៉ះពាល់ ពីព្រោះថា ខួរក្បាលរបស់ពួកគាត់កំពុងលូតលាស់ ប៉ុន្តែបើជក់អាហ្នឹងហើយ គឺខួរក្បាលរបស់ពួកគាត់មិនអាចលូតលាស់ឡើយ»។
លោកវេជ្ជបណ្ឌិតបន្តថា៖ «ដូច្នេះ អាជ្ញាធរមានសមត្ថកិច្ចគ្រប់ជាន់ថ្នាក់ ត្រូវចាត់វិធានការតាមផ្លូវច្បាប់ចំពោះអ្នកដែលបានផ្សព្វផ្សាយ និងលក់ផលិតផលបារីអេឡិចត្រូនិក ក៏ដូចជាផលិតផលអេចឈ៍ ធី ភី ឱ្យបានតឹងរ៉ឹងបំផុត ដើម្បីការពារសតិប្រាជ្ញាកុមារ និងយុវជនកុំឱ្យធ្លាក់ទៅក្នុងការញៀនបារីអេឡិចត្រូនិកនេះ»។
លោកបានបន្តថា កន្លងមករាជរដ្ឋាភិបាល បានហាមឃាត់ការនាំចូល និងទប់ស្កាត់ការប្រើប្រាស់បារីអេឡិចត្រូនិកនេះតាំងពីឆ្នាំ ២០០៤ ហើយមកដល់ឆ្នាំ ២០២២ រាជរដ្ឋាភិបាល ក៏បានហាមឃាត់ផលិតផលប្រហាក់ប្រហែលនឹងបារីអេឡិចត្រូនិកដែរ ប៉ុន្តែនៅតែមានករណីលក់តាមអនឡាញទៀត។
មន្ត្រីគម្រោងរបស់អង្គការសម្ព័ន្ធកម្ពុជា ដើម្បីប្រយុទ្ធនឹងជំងឺឆ្លង ដែលសុំមិនបញ្ចេញឈ្មោះ ព្រោះបារម្ភពីសុវត្ថិភាពបាននិយាយថា លោកសង្កេតឃើញឈ្មួញនៅតែលក់បារីអេឡិចត្រូនិក តាមអនឡាញ បើទោះបីជាអាជ្ញាធរហាមឃាត់ការចរាចរណ៍បារីទាំងនោះក៏ដោយ។
អង្គការសម្ព័ន្ធកម្ពុជា ដើម្បី ប្រយុទ្ធនឹងជំងឺឆ្លងបញ្ជាក់ថា៖ «យើងដឹងថា មានការធ្វើចរាចរណ៍ (បារីអេឡិចត្រូនិក) លើទីផ្សារអនឡាញ ប៉ុន្តែយើងមិនទាន់ឃើញមានចំណាត់ការណាមួយទេ»។
បើយោងតាមការសិក្សាប្រមូលទិន្នន័យ ដោយ CDC នៃសហរដ្ឋអាមេរិក ចាប់ពីខែសីហា ឆ្នាំ ២០១៩ រហូតដល់ខែកុម្ភៈ ឆ្នាំ ២០២០ បានបង្ហាញថា មានប្រជាជនអាមេរិកចំនួន ២ ៨០៧នាក់ បានឈឺ និង ៦៨ នាក់ បានបាត់បង់ជីវិត ដោយសារតែជំងឺសួត ដែលបណ្ដាលមកពីការប្រើប្រាស់បារីអេឡិចត្រូនិក។
អគ្គស្នងការនគរបាលជាតិ កាលពីខែមិថុនា បានដាក់បទបញ្ជាប្រាប់ឱ្យនគរបាល សហការជាមួយអាជ្ញាធរទាំងអស់ បន្តបង្ក្រាបការប្រើប្រាស់ផលិតផលស៊ីហ្សា និងបារីអេឡិចត្រូនិក ដែលកម្រើកឡើងវិញក្នុងសង្គមកម្ពុជា។ បន្ទាប់ពីមានបទបញ្ជារបស់អគ្គស្នងការនគរបាលជាតិមក អាជ្ញាធរក៏បានបង្ក្រាបទីតាំងលក់បារីអេឡិចត្រូនិករាប់សិបកន្លែង នៅទូទាំងប្រទេស និងរឹបអូសបារីបានរាប់ពាន់ដើម។ ទោះជាយ៉ាងណា ក្រុមសង្គមស៊ីវិល នៅតែសង្កេតឃើញថា ឈ្មួញបានប្រើមធ្យោបាយដើម្បីលក់បារីអេឡិចត្រូនិកតាមអនឡាញវិញម្ដង៕
