សៀមរាបៈ អ្នកធ្វើការ​ផ្នែក​បរិស្ថាន ​នៅ​ថ្ងៃទី​ ២៩ ខែកញ្ញា ​ស្នើឱ្យ​រដ្ឋាភិបាល​គ្រប់គ្រង​រណារយន្ត ​ក្រោយ​ករណី​លួច​កាប់​ឈើ​ប្រណីត​នៅ​តំបន់​អង្គរ​បន្ត​កើតមាន​។ ឈើ​ធ្នង់ ​ដែលជា​ប្រភេទ​ឈើ​ប្រណីត ​និង​មាន​ទំហំ​ធំ ត្រូវបាន​គេ​លួច​កាប់ នាពេល​ថ្មីៗ​នេះ ស្ថិត​ក្នុងភូមិ​បន្ទាយស្រី ឃុំ​ខ្នារ​សណ្តាយ​ ស្រុក​បន្ទាយស្រី ​ខេត្ត​សៀមរាប​។​

លោក ​ហេង គឹមហុង ​ប្រធាន​ផ្នែក​កម្មវិធី​ស្រាវជ្រាវ ​និង​តស៊ូ​មតិ ​នៃ​សមាគម​បណ្តាញ​យុវជន​កម្ពុជា ចាត់ទុក​ករណី​លួច​កាប់​ឈើ​ប្រណីត​ជាថ្មី​ម្ដងទៀត​ក្នុង​តំបន់​អង្គរ ​ដែល​គ្រប់គ្រង​ដោយ​រដ្ឋបាល​ព្រៃឈើ​ជា​រឿង​គួរឱ្យ​បារម្ភ​។ លោក​គឹមហុង ស្នើ​រដ្ឋាភិបាល គួរ​ធ្វើការ​គ្រប់គ្រង​លើ​រណារយន្ត​ឱ្យបាន​ត្រឹមត្រូវ ​ព្រោះ​មានការ​ប្រើប្រាស់​យ៉ាង​អនាធិបតេយ្យ​ទាំង​ក្នុង​តំបន់​អង្គរ និង​តំបន់​ការពារ​ធម្មជាតិ​។

លោក​ថ្លែងថា​៖ «ក្នុង​នាម​ខ្ញុំ​ធ្វើការ​ក្នុង​វិស័យ​បរិស្ថាន ​និង​ធនធាន​ធម្មជាតិ ​១ រូប ​យល់ថា ​គួរ​មាន​ចំណាត់ការ​គ្រប់គ្រង​លើ​ការប្រើប្រាស់​រណារយន្ត​ដើម្បី​ងាយស្រួល​កំណត់​អត្តសញ្ញាណ​ជនល្មើស​។ អាជ្ញាធរ​គួរ​យកចិត្ត​ទុកដាក់​ប​ន្ថែ​ម​ទៀត​ធ្វើការ​ល្បាត​ព្រៃ​តំបន់​អង្គរ ព្រោះ​មិនមែនជា​លើក​ទី​១ ​ទេ​ ដែល​តំបន់​អង្គរ​ត្រូវបាន​គេ​ចូល​លួច​កាប់​ឈើ​ប្រណីត​នោះ ​ហើយ​រកមុខ​អ្នក​កាប់​មិនឃើញ​។ កន្លងមក​មាន​ករណី​កាប់​ឈើ​គ្រញូង​ដែរ​តែ​រកមុខ​អ្នក​កាប់​អត់​ឃើញ​»។​

ចំពោះ​ដំណើរ​ការកាប់​ឈើ​ធ្នង់​ ១​ ដើម​នេះ ​លោក ​ហេង គឹមហុង ​លើកឡើងថា​ មិនមែន​ធ្វើឡើង​តែ​ ១​ ថ្ងៃ​ទេ​ ចុះ​អាជ្ញាធរ​ម្ដេច​មិនបាន​ដឹងឮ​សកម្មភាព​កាប់​បំផ្លាញ​ទៅវិញ​។

លោក​ថា​៖ «វា​អាច​ទាក់ទង​នឹង​ការធ្វេស​ប្រហែស​របស់​ម​ន្ត្រី​ក្នុង​ការបំពេញ​មុខងារ​សាធារណៈ​របស់​រដ្ឋបាល​ថ្នាក់ក្រោម​ជាតិ​ ជាពិសេស​មន្ត្រី​បរិស្ថាន ​មន្ត្រី​អាជ្ញាធរ​ជាតិ​អប្សរា ​មន្ត្រីរដ្ឋបាល​ព្រៃឈើ​។ ដូច្នេះ​គួរ​ធ្វើ​សវនកម្ម​ អធិការ ​លើ​សមត្ថភាព​មន្ត្រី​ តើ​គាត់​ធ្វើ​ការងារ​យ៉ាងម៉េច​ ទើប​កើត​មានរឿង​ដដែលៗ ​ដើម្បី​ទទួល​ខុសត្រូវ​លើ​ការងារ​ធ្វេសប្រហែស​របស់​ខ្លួន​ឯង​នៅ​ចំពោះមុខ​ច្បាប់»។​

មន្ត្រី​សង្កាត់​រដ្ឋបាល​ព្រៃឈើ​ភូមិ​បន្ទាយស្រី ​សហការ​ជាមួយ​មន្ត្រី​អាជ្ញាធរ​ជាតិ​អប្សរា ​និង​អាជ្ញាធរ​ឃុំ​ខ្នារសណ្តាយ ​បាន​ចុះ​ពិនិត្យ​ករណី​ដើមឈើ​ធ្នង់ ​១ ​ដើម ​ដែលមាន​មុខកាត់​ គល់​ទំហំ ​១,២០ ​ម ​និង​ប្រវែង ​៦ ​ម ​ត្រូវបាន​គេ​លួច​អារផ្ដាច់​។ គិត​មកដល់​ថ្ងៃទី ​២៩ ​កញ្ញា​នេះ​ ឈើ​ត្រូវបាន​រក្សាទុក​នៅ​កន្លែង​កើតហេតុ​ជា​បណ្តោះអាសន្ន​ រង់ចាំ​ទឹក​ស្រក​អស់​នៅ​ទីនោះ ​ទើប​ក្រុមការងារ​ដឹកជញ្ជូន​មក​រក្សាទុក​នៅ​សង្កាត់ ​ដើម្បី​ចាត់ការ​បន្ត​តាម​នីតិវិធី ។

លោក​ ឡុង កុសល ​អគ្គនាយករង ​និង​ជា​អ្នកនាំពាក្យ​អាជ្ញាធរ​ជាតិ​អប្សរា ​ឱ្យដឹង​នៅ​ថ្ងៃទី​ ២៩ ​កញ្ញាថា ​គេ​មិន​បានដឹង​ជនល្មើស​ធ្វើ​សកម្មភាព​កាប់​បំផ្លាញ​ដើមឈើ​ធ្នង់​នេះ​តាំងពី​ពេលណា​មក​ទេ ​ប៉ុន្តែ​គេ​ប្រទះឃើញ​វា​ដេក​ដួល​ទៅលើ​ដី​បាត់​ទៅហើយ នៅ​ព្រឹក​ថ្ងៃទី​ ២៩​ ខែកញ្ញា​។

លោក​ថ្លែងថា​៖ «បន្ទាប់ពី​យើង​ឃើញថា​ មាន​គេ​កាប់ ​[ឈើ]​ យើង​ក៏​ប្រញាប់​ទាក់ទង​ទៅ​រដ្ឋបាល​ព្រៃឈើ ​និង​ខាង​ជំនាញ​ផ្សេងទៀត​ចុះទៅ​ត្រួតពិនិត្យ ​សួរថា ​កើត​ឡើង​តាំងពី​ពេលណា ​ខ្ញុំ​ក៏​មិនដឹង​ដែរ​ តែ​មើលទៅ​ទើបតែ​កើតឡើង​ ២-៣​ ថ្ងៃ​នេះ​ទេ»។​

លោក ​ឡុង កុសល ​បានដាក់​ការសង្ស័យ​ជាបឋម​ថា ​ជន​ទុច្ចរិត​ ដែល​កាប់​ឈើ​ធ្នង់ ​មានបំណង​កាប់​យកទៅ​លក់ ​ព្រោះតែ​ធ្នង់​ជា​ប្រភេទ​ឈើ​ប្រណីត។

លោក​ថា​៖ «គោល​បំណង ​គឺ​កាប់​យកតែ​ម្ដង​ហ្នឹង​ វា​គ្មាន​អ្នកណា​ទៅ​កាប់​លេង​ទេ ​មិន​អ៊ីចឹង​? វា​ជា​រឿង​គួរឱ្យ​សោកស្ដាយ ​ដែល​ពពួក​មនុស្ស​ទុច្ចរិត​ចូលមក​កាប់​ឈើ​ប្រណីត ​ដែល​មិន​គិត​ពី​ប្រយោជន៍​សាធារណៈ​ទូទៅ​របស់​សង្គម​ខ្មែរ​ទាំងមូល»។​

ចំពោះ​ប្រតិបត្តិ​ការវែកមុខ​រក​ជនល្មើស​លួច​កាប់​ឈើ​ធ្នង់​ លោក ​ឡុង កុសល ​ប្រាប់ថា ​ជា​សមត្ថកិច្ច​ស៊ើបអង្កេត​បន្ត​របស់​រដ្ឋ​បាល​ព្រៃឈើ​។​

កាលពីពាក់​កណ្ដាល​ខែមិថុនា​ ឆ្នាំ​ ២០២២ ដើម​គ្រញូង​ចំនួន​ ៤ ​ដើម ​ដែលមាន​អាយុកាល​ប្រមាណ ​៥០​ ឆ្នាំ ​ត្រូវបាន​គេ​លួច​កាប់​ក្នុង​ចម្ការ​ពូជឈើ​គ្រញូង ​ដែលមាន​ទំហំ​ ១ ៨៨០​ ហិកតា ​ស្ថិតនៅ​ភូមិ​ខ្នាត​ពោធិ៍ ​និង​ភូមិ​វត្ត ឃុំ​ស្រែ​ពោធិ៍ ស្រុក​វ៉ារិន ​ភូមិ​ខ្នា​រក្រៅ ឃុំ​កន្ទួត ​ស្រុក​ស្វាយលើ ​និង​ឃុំ​ឃុនរាម​ ស្រុក​បន្ទាយស្រី ​ខេត្ត​សៀមរាប​។​

កាលពី​ថ្ងៃទី ​៣១​ ខែមីនា ​ឆ្នាំ​ ២០២១ ​ក៏មាន​ករណី​ជនល្មើស​បាន​លួច​កាប់​ដើមឈើ​គ្រញូង​ ១ ​ដើម ​ក្នុង​តំបន់​ការពារ​ទី​១ ​នៃ​រមណីយដ្ឋាន​អង្គរ​ផងដែរ​។ បើ​តាម​របាយការណ៍​ពី​មន្ត្រី​បរិស្ថាន​ខេត្តសៀមរាប ​គិត​ចាប់ពី​ឆ្នាំ​ ២០២០ ​រហូតដល់​ដើម​ឆ្នាំ​ ២០២២ ​បទល្មើស​លួច​កាប់​ដើម​គ្រញូង​ក្នុង​តំបន់​អង្គរ ​មាន​ប្រមាណ​ជាង​ ១០ ​ករណី ​ក្នុងនោះ​ក៏មាន​ករណី​មួយចំនួន ​ត្រូវបាន​មន្ត្រី​បរិស្ថាន​រឹបអូស​វត្ថុតាង ​និង​កសាង​សំណុំរឿង​បញ្ជូន​ទៅ​តុលាការ​ផងដែរ​៕