ភ្នំពេញៈ នគរបាលអន្តោប្រវេសន៍ បានឃាត់ខ្លួនជនបរទេស ៦៦ នាក់ ក្នុងរយៈពេល ២ ថ្ងៃ នាចុងខែកញ្ញា ដែលបានចូលមករស់នៅក្នុងប្រទេសកម្ពុជាដោយខុសច្បាប់ ហើយត្រូវបានបណ្ដេញចេញ ស្របតាមច្បាប់ស្ដីពីអន្តោប្រវេសន៍។
លោក កែវ វណ្ណថន អគ្គនាយករង និងជាអ្នកនាំពាក្យអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ បានឱ្យដឹងនៅថ្ងៃទី ២៧ ខែកញ្ញាថា ជនបរទេសទាំងនោះ មានជនជាតិថៃ ៦៤ នាក់ ក្នុងនោះមានស្រី ២៥ នាក់ ជនជាតិឥណ្ឌា ១ នាក់ និងជនជាតិនីហ្សេរីយ៉ា ១ នាក់។ ពួកគេត្រូវបានបណ្តេញចេញពីព្រះរាជាណាចក្រកម្ពុជា តាមប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញ និងច្រកទ្វារព្រំដែនអន្តរជាតិប៉ោយប៉ែត។
លោក វណ្ណថន ថ្លែងថា ជនបរទេសទាំង ៦៦ នាក់ ត្រូវបានសមត្ថកិច្ចឃាត់ខ្លួនពាក់ព័ន្ធបទល្មើសលួចឆ្លងដែនខុសច្បាប់ គ្មានលិខិតឆ្លងដែន លួចស្នាក់នៅខុសច្បាប់លើសទិដ្ឋាការកំណត់ និងប្រើប្រាស់លិខិតឆ្លងដែនមិនប្រក្រតី ដែលល្មើសនិងច្បាប់ស្ដីពីអន្តោប្រវេសន៍ ដោយត្រូវធ្វើការបណ្ដេញចេញ និងហាមឃាត់ការចូលប្រទេសកម្ពុជារយៈពេល ៣ ឆ្នាំ។
លោក កែវ វណ្ណថន ថ្លែងថា ចាប់ពីដើមខែមករា រហូតមកដល់ថ្ងៃទី ២៣ ខែកញ្ញា អគ្គនាយកដ្ឋានអន្តោប្រវេសន៍បានបណ្តេញជនបរទេសចេញ សរុបចំនួន ១ ៤៥០ នាក់ (ស្រី ២៧៩ នាក់) មាន ៣២ សញ្ជាតិ ចេញពីកម្ពុជាផងដែរ។
លោក កែវ វណ្ណថន បានឱ្យដឹងនៅថ្ងៃទី ២៨ ខែកញ្ញាថា ក្រៅពីចំនួនជនបរទេសដែលត្រូវបានបណ្ដេញចេញរួចរាល់ហើយនោះ ក៏មានករណីដោយឡែក ១ ទៀត ដែលនគរបាលអន្តោប្រវេសន៍ បានរកឃើញជនជាតិចិនចំនួន ២១ នាក់ ក្នុងចំណោម ៤១ នាក់ ដែលបានឆ្លងដែនសមុទ្រចូលមកកម្ពុជា ដោយខុសច្បាប់នៅថ្ងៃទី ២២ ខែកញ្ញា បានជួបគ្រោះថ្នាក់លិចទូក នៅចន្លោះពយសារឿង និងកោះតាង ក្នុងភូមិសាស្ត្រខេត្តព្រះសីហនុ ហើយកំពុងស្ថិតក្នុងការសួរនាំ និងរៀបចំនីតិវិធីដើម្បីធ្វើការបណ្តេញចេញបន្ថែមទៀត។
អ្នកស្រាវជ្រាវការអភិវឌ្ឍសង្គម លោក មាស នី បានថ្លែងដោយស្វាគមន៍ការអនុវត្តច្បាប់អន្តោប្រវេសន៍នៅកម្ពុជា។
លោក មាស នី ថ្លែងថា៖ «ប៉ុន្តែ (យើង) សង្កេតឃើញថា ការអនុវត្តច្បាប់អន្តោប្រវេសន៍នៅមានចន្លោះប្រហោងខ្លាំងដែលបង្កភាពងាយស្រួលដល់ជនល្មើស យកកម្ពុជាជាទីតាំងប្រព្រឹត្តបទល្មើសផ្សេងៗបាន ហើយបានស្នើឱ្យអាជ្ញាធររឹតបន្តឹងថែមទៀត ចំពោះបញ្ហាអន្តោប្រវេសន៍ខុសច្បាប់នេះ ដោយគ្មានករណីលើកលែង»៕