ភ្នំពេញៈ អង្គការអុកស្វាម (OXFAM) នាថ្ងៃទី ២៩ ខែកញ្ញា បានធ្វើជាម្ចាស់ផ្ទះនៃកិច្ចពិភាក្សាតុមូលពហុភាគី ដើម្បីជជែកពីការពង្រឹងហិរញ្ញវត្ថុប្រកបដោយចីរភាព និងការទទួលខុសត្រូវក្នុងតំបន់អាស៊ាន ខណៈរបាយការណ៍រកឃើញថា ៩៩,៨ ភាគរយនៃកម្មករជាស្ត្រី នៅក្នុងវិស័យកសិពាណិជ្ជកម្មកម្ពុជា ស្ថិតក្នុងស្ថានភាពក្រៅប្រព័ន្ធ។
កិច្ចពិភាក្សាដែលធ្វើឡើងនៅរាជធានីភ្នំពេញនេះ គាំទ្រដោយសម្ព័ន្ធហិរញ្ញវត្ថុយុត្តិធម៌ អាស៊ី (FFA) និងកម្មវិធីលើកកម្ពស់យេនឌ័រ និងការវិនិយោគប្រកបដោយការទទួលខុសត្រូវក្នុងវិស័យកសិពាណិជ្ជកម្ម ក្នុងតំបន់អាស៊ីអាគ្នេយ៍ (GRAISEA)។
កិច្ចពិភាក្សានេះ មានការចូលរួមពីតំណាងមកពីរាជរដ្ឋាភិបាលកម្ពុជា វិស័យឯកជន និងសង្គមស៊ីវិល ដើម្បីផ្តល់ធាតុចូល លើរបកគំហើញ និងអនុសាសន៍សំខាន់ៗ នៅក្នុងរបាយការណ៍រួមរបស់ FFA-GRAISEA ដែលមានចំណងជើងថា «Harvesting Inequality: ផលប៉ះពាល់លើសង្គមនៃការវិនិយោគរបស់គ្រឹះស្ថានហិរញ្ញវត្ថុនៅក្នុងវិស័យកសិពាណិជ្ជកម្មនៅអាស៊ី» ដើម្បីធ្វើសំយោគ និងកែលម្អគោលនយោបាយហិរញ្ញវត្ថុប្រកបដោយចីរភាព និងមានលក្ខណៈយេនឌ័រសម្រាប់អាស៊ានក្នុងខណៈដែលកម្ពុជាធ្វើជាប្រធានអាស៊ាន ឆ្នាំ ២០២២។
លោកស្រី ភាណ សោភ័ណ តំណាងអង្គការអុកស្វាមប្រចាំនៅកម្ពុជា ថ្លែងថា អង្គការអុកស្វាមស្វាគមន៍ការចូលរួមរបស់អ្នកជំនាញជាន់ខ្ពស់មកពីរាជរដ្ឋាភិបាល ធុរកិច្ច និងសង្គមស៊ីវិលនៅក្នុងកិច្ចសន្ទនាពហុភាគីពាក់ព័ន្ធនេះ ដែលផ្តោតលើបញ្ហាហិរញ្ញវត្ថុប្រកបដោយចីរភាព និងមានលក្ខណៈយេនឌ័រក្នុងវិស័យកសិពាណិជ្ជកម្ម ។
របាយការណ៍ Harvesting Inequality បានបញ្ជាក់ថា៖ «៩៩,៨ភាគរយ នៃកម្មករជាស្ត្រីនៅក្នុងវិស័យកសិពាណិជ្ជកម្មកម្ពុជា ស្ថិតក្នុងស្ថានភាពក្រៅប្រព័ន្ធ មានន័យថា ពួកគេមិនអាចទទួលបានអត្ថប្រយោជន៍ និងការការពារក្រោមច្បាប់ការងារនោះទេ។ ពួកគេកាន់តែងាយរងគ្រោះទៅនឹងភាពក្រីក្ររ៉ាំរ៉ៃ ប្រាក់ឈ្នួលទាប ជំងឺ គ្រោះថ្នាក់ការងារ ការកេងប្រវ័ញ្ច និងការអនុវត្តប្រកបដោយគ្រោះថ្នាក់ក្នុងសង្គមផ្សេងៗទៀតជាច្រើន»។
អង្គការអុកស្វាមអំពាវនាវឱ្យរដ្ឋាភិបាលកម្ពុជា វិស័យកសិពាណិជ្ជកម្ម និងគ្រឹះស្ថានហិរញ្ញវត្ថុធានាថា សិទ្ធិស្ត្រីដែលជាកសិករ និងកម្មករ និងក្រុមជនដែលងាយរងគ្រោះដទៃទៀតទទួលបានការការពារ ។
លោក Ashley Aarons ប្រធានកម្មវិធី GRAISEA ថ្លែងថា វិស័យកសិពាណិជ្ជកម្មនៅអាស៊ី មានសារៈសំខាន់ជាសារវន្តចំពោះការីកចម្រើននៃសេដ្ឋកិច្ច ជីវភាព ប្រាក់ចំណូល និងសន្តិសុខស្បៀងរបស់តំបន់អាស៊ី។
លោកថ្លែងថា៖ «ជាង ១ ភាគ ៣ នៃកម្លាំងការងារនៅក្នុងប្រទេសកម្ពុជា ប៉ាគីស្ថាន និងវៀតណាម និងជិតពាក់កណ្តាលនៃកម្លាំងការងារនៅក្នុងប្រទេសឥណ្ឌា និងមីយ៉ាន់ម៉ា ធ្វើការនៅក្នុងវិស័យកសិកម្ម ព្រៃឈើ និងនេសាទ។ វិស័យនេះក៏ជាវិស័យដែលមានកសិករខ្នាតតូច ប្រមាណ ៣៥០ លាននាក់ ដែលផលិត ៨០ ភាគរយ នៃផលិតផលម្ហូបអាហារនៅក្នុងតំបន់នេះ»។
កិច្ចពិភាក្សាពហុភាគីចាប់ផ្តើមជាមួយនឹងកិច្ចប្រជុំពេញអង្គកម្រិតខ្ពស់ ដោយមានការចូលរួមពីវាគ្មិនតំណាងជាន់ខ្ពស់ មកពីរដ្ឋាភិបាលកម្ពុជា ដែលពាក់ព័ន្ធនៅក្នុងការសម្របសម្រួលភាពជាប្រធានរបស់កម្ពុជានៃកិច្ចប្រជុំកំពូលអាស៊ាន។
បន្ទាប់ពីកិច្ចប្រជុំពេញអង្គកម្រិតខ្ពស់ ក្រុមអ្នកជំនាញ និងភាគីពាក់ព័ន្ធមួយចំនួននឹងរៀបចំកិច្ចប្រជុំតុមូលប្រកបដោយអន្តរកម្មមួយ ដើម្បីផ្លាស់ប្តូរទស្សនៈរបស់ពួកគេអំពីសេចក្តីព្រាងសង្ខេបនៃគោលនយោបាយមួយ ដោយផ្អែកលើអនុសាសន៍ដែលបានមកពីរបាយការណ៍ស្ដីពី «Harvesting Inequality»។
កិច្ចពិភាក្សាតុមូលនេះ មានគោលដៅសម្របសម្រួលកិច្ចពិភាក្សាពិគ្រោះយោបល់នៅកម្រិតយុទ្ធសាស្ត្រ ដើម្បីដាក់បញ្ចូលលក្ខណវិនិច្ឆ័យសង្គមកាន់តែប្រសើរឡើង ជាពិសេសសមភាពយេនឌ័រ សិទ្ធិការងារ និងតម្លាភាព និងគណនេយ្យភាព ទៅក្នុងក្របខ័ណ្ឌគោលនយោបាយ និងគំនិតផ្តួចផ្តើមនានាទាក់ទងនឹងហិរញ្ញវត្ថុប្រកបដោយចីរភាពរបស់អាស៊ាន ។
សេចក្ដីសង្ខេបគោលនយោបាយដែលបានកែសម្រួលនេះ នឹងត្រូវបានដាក់ជូនកម្ពុជាដែលជាប្រធានអាស៊ាននៅពេលខាងមុខនេះ និងសម្រាប់ការពិចារណាដោយប្រទេសឥណ្ឌូនេស៊ី ដែលនឹងត្រូវធ្វើជាប្រធានអាស៊ានក្នុងឆ្នាំ ២០២៣ ដើម្បីផ្តល់អាទិភាពដល់ការពន្លឿនហិរញ្ញវត្ថុប្រកបដោយចីរភាព និងការទទួលខុសត្រូវនៅក្នុងតំបន់ ដោយបង្កើនការពិចារណាអំពីលក្ខណវិនិច្ឆ័យសង្គម និងយេនឌ័រ និងផលប៉ះពាល់នានាដែលអាចមាន។
អង្គការអុកស្វាម ជាអង្គការអភិវឌ្ឍន៍និងមនុស្សធម៌ ដែលបានចូលខ្លួនមកជួយប្រទេសកម្ពុជាចាប់តាំងពីឆ្នាំ ១៩៧៩ ក្រោយការដួលរលំនៃរបបខ្មែរក្រហម។
អុកស្វាមបាននិងកំពុងធ្វើការងារយ៉ាងសកម្មជាមួយវិស័យឯកជន ស្ថាប័ននិងក្រសួងពាក់ព័ន្ធនានា អង្គការដៃគូជាតិ និងអន្តរជាតិជាច្រើនទៀត លើវិស័យជំនួយមនុស្សធម៌ និងគ្រប់គ្រងគ្រោះមហន្តរាយ អភិវឌ្ឍន៍សេដ្ឋកិច្ចនិងសង្គម អភិវឌ្ឍន៍វិស័យកសិកម្ម សហគមន៍នេសាទ សហគមន៍ព្រៃឈើ អភិបាលកិច្ចដីធ្លីនិងធនធានធម្មជាតិ ការប្រែប្រួលអាកាសធាតុ ក្រុមឥណទានសន្សំប្រាក់ និងកិច្ចគាំពារសង្គមនិងសេវាសាធារណៈ សេដ្ឋកិច្ចបៃតង និងហិរញ្ញវត្ថុប្រកបដោយបរិយាប័ន្ន ក្នុងគោលបំណងចូលរួមចំណែកអភិវឌ្ឍ ប្រទេសប្រកបដោយចីរភាព៕