ភ្នំពេញៈ មន្រ្តីជាន់ខ្ពស់នៃអគ្គលេខាធិការដ្ឋានក្រុមប្រឹក្សាជាតិកម្ពុជា ដើម្បីកុមារ (ក.ជ.ក) បានលើកឡើងថា ការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ គឺជាបញ្ហាសកលដែលកើតឡើងក្នុងទម្រង់ផ្សេងៗគ្នា និងបានក្លាយជាក្តីបារម្ភថ្មីមួយទៀត ដែលទាមទារឱ្យអ្នកពាក់ព័ន្ធធ្វើការរួមគ្នាដើម្បីទប់ស្កាត់ និងការពារកុមារ។
លោកស្រី ស៊ន សាបោន អគ្គលេខាធិការរងនៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ បានលើកឡើងដូចនេះ ក្នុងពិធីផ្សព្វផ្សាយរបាយការណ៍នៃការសិក្សាស្រាវជ្រាវស្តីពីការបញ្ឈប់គ្រោះថ្នាក់នៅកម្ពុជា ភ័ស្តុតាងអំពើកេងប្រវ័ញ្ចនិងរំលោភបំពានផ្លូវភេទកុមារតាមប្រព័ន្ធអនឡាញ ដែលនឹងត្រូវប្រកាសជាផ្លូវការនៅថ្ងៃទី ៣០ ខែកញ្ញា។
លោកស្រីបានលើកឡើងថា៖ «ការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ គឺជាបញ្ហាសកលដែលកើតឡើងក្នុងទម្រង់ផ្សេងៗគ្នា និងបានក្លាយជាក្តីបារម្ភថ្មីមួយទៀត ដែលទាមទារឱ្យភាគីពាក់ព័ន្ធ ទាំងសាធារណជន អាណាព្យាបាលរបស់កុមារ អាជ្ញាធរ និងសង្គមស៊ីវិល ចាំបាច់ធ្វើការរួមគ្នាដើម្បីទប់ស្កាត់ និងការពារកុមារពីការរំលោភបំពានតាមប្រព័ន្ធអនឡាញនេះ»។
លោកស្រីបានបញ្ជាក់ថា ល្បិចកលនិងអំពើនៃការរំលោភបំពានផ្លូវភេទរបស់ជនល្មើសកាន់តែមានភាពស្មុគស្មាញនិងកាន់តែអាក្រក់ទៅៗ ដែលទាមទារឱ្យគ្រប់ភាគីពាក់ព័ន្ធចាំបាច់រួមគ្នាដោះស្រាយ។ កុមាររងគ្រោះពីការកេងប្រវ័ញ្ចផ្លូវភេទ បានបន្សល់នូវផលប៉ះពាល់ធ្ងន់ធ្ងរ ទាំងផ្លូវកាយ និងផ្លូវចិត្ត។
លោកស្រី ស៊ន សាបោន បានបន្ថែមថា៖ «កុមាររងគ្រោះភាគច្រើន មានអារម្មណ៍ពិបាកក្នុងការទុកចិត្តអ្នកដទៃ អស់សង្ឃឹម បាក់ទឹកចិត្ត ឯកា ច្របូកច្របល់ ខកចិត្ត ស្តីបន្ទោសខ្លួនឯង និងឆាប់ភ័យខ្លាចជាដើម។ ទំហំនៃផលប៉ះពាល់នៃដំណើរការស្តារ នីតិសម្បទារបស់កុមាររងគ្រោះ ត្រូវការគាំទ្រទាំងផ្លូវចិត្ត និងផ្លូវកាយពីសំណាក់ឪពុកម្តាយ អាណាព្យាបាល អ្នកជំនាញ និងសហគមន៍ផងដែរ»។
លោកស្រីបន្តថា ទន្ទឹមនឹងតម្រូវការទាំងនេះ កុមារក៏ត្រូវការការទទួលបានយុត្តិធម៌តាមផ្លូវច្បាប់ ដែលជាផ្នែកមួយក្នុងការជំរុញឱ្យដំណើរការការស្តារនីតិសម្បទា មានភាពរលូន និងឆាប់ជាសះស្បើយ។
យោងតាមសេចក្តីប្រកាសព័ត៌មានរបស់ (កជក) ដែល ភ្នំពេញ ប៉ុស្តិ៍ ទទួលបាននៅថ្ងៃទី ២៩ ខែកញ្ញាថា កជក, អង្គការយូនីសេហ្វប្រចាំកម្ពុជា និងអង្គការ EPACT អន្តរជាតិ តាមរយៈអង្គការសកម្មភាពដើម្បីកុមារ (APLE Cambodia) ធ្វើការផ្សព្វផ្សាយ របាយការណ៍នៃការសិក្សាស្រាវជ្រាវ ស្តីពីការបញ្ឈប់គ្រោះថ្នាក់នៅកម្ពុជា ភស្តុតាងអំពើកេងប្រវ័ញ្ចនិងរំលោភបំពានផ្លូវភេទកុមារតាមប្រព័ន្ធអនឡាញ ដែលធ្វើឡើងនៅទីស្តីការ ក្រសួងសង្គមកិច្ច អតីតយុទ្ធជន និងយុវនីតិសម្បទា (សអយ)។
តំណាងអង្គការយូនីសេហ្វប្រចាំកម្ពុជា លោកស្រី ហ៊្វូរូ ហ៊្វូយ៉ូហ្សាត បានឱ្យដឹងដែរថា ការរកឃើញបានបង្ហាញយ៉ាងច្បាស់ពីទំហំនៃហានិភ័យដែលកុមារប្រឈមមុខនៅលើអនឡាញ នៅក្នុងពិភពឌីជីថលដែលចេះតែកើនឡើង ដោយ ១១% នៃកុមារដែលប្រើអ៊ីនធឺណិតដែលមានអាយុពី ១២-១៧ ឆ្នាំ ត្រូវបានរាយការណ៍ថា ជួបប្រទះជាមួយឧទាហរណ៍ច្បាស់លាស់ នៃការកេងប្រវ័ញ្ចផ្លូវភេទ តាមអនឡាញ និងការរំលោភបំពាន មុនពេលត្រូវបានអង្កេតសិក្សាស្រាវជ្រាវនេះបានធ្វើឡើង។
លោកស្រី បានបញ្ជាក់ថា៖ «១៦% នៃកុមារត្រូវបានទទួលរងនូវការបញ្ចេញមតិទាក់ទងផ្លូវភេទរបស់ពួកគេដែលកើតឡើងជាចម្បងនៅលើប្រព័ន្ធផ្សព្វផ្សាយសង្គម (Social media),១៦% នៃកុមារត្រូវបានគេបញ្ជូនរូបភាពផ្លូវភេទដែលមិនចង់បាន ហើយ ៩% នៃកុមារទទួលបានគេស្នើសុំឱ្យចែករំលែកនូវរូបភាពផ្លូវភេទរបស់ពួកគេ»។
ជាមួយគ្នានោះដែរ លោកស្រី ខៀវ បូរី រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាជាតិកម្ពុជាដើម្បីកុមារ បានលើកឡើងថា ជាការពិតការកេងប្រវ័ញ្ហាផ្លូវភេទលើកុមារតាមប្រព័ន្ធអនឡាញជាបញ្ហាសកល។
លោកស្រីថា ពិភពលោកកំពុងតែយកចិត្តទុកដាក់ និងរួមគ្នាដើម្បីបង្ការ ទប់ស្កាត់ និងឆ្លើយតបការរំលោភបំពានក្នុងបរិបទប្រព័ន្ធបច្ចេកវិទ្យាព័ត៌មាន ដែលក្នុងនោះកម្ពុជា ជាប្រទេសដែលបោះជំហានទៅមុខ ក្នុងការចូលរួមចំណែកសំដៅធ្វើឱ្យកាន់តែប្រសើរឡើងនូវ ការលើកកម្ពស់កិច្ចការពារកុមារ និងឧត្តមប្រយោជន៍របស់កុមារ ទាំងកម្ពុជា ក៏ដូចជាពិភពលោកផងដែរ។
លោកស្រី ខៀវ បូរី បានថ្លែងថា៖ «យុទ្ធសាស្ត្រចតុកោណដំណាក់កាលទី៤ បានជំរុញឱ្យមានការវិភាជន៍ធនធានបន្ថែមដល់វិស័យអប់រំ សុខាភិបាល សង្គមកិច្ច និងវិស័យផ្សេងៗទៀត ដែលក្នុងនោះ ការអភិវឌ្ឍកុមារគឺជាអាទិភាពមួយនៃការកសាងធនធានមនុស្ស សម្រាប់ការអភិវឌ្ឍន៍ជាតិ និងសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាព ២០១៦-២០៣០»។
ទន្ទឹមនឹងនេះ កម្ពុជាបានត្រៀមខ្លួនជាស្រេចក្នុងការចូលរួមក្នុងបដិវត្តន៍ឧស្សហកម្ម ៤.០ ដែលផ្តោតជាពិសេស លើវិស័យបច្ចេកវិទ្យា ដែលពិភពលោកកំពុងប្រើប្រាស់ជាមធ្យោបាយសម្រាប់វិស័យនយោបាយ សេដ្ឋកិច្ច និងសង្គមកិច្ចយ៉ាងមានប្រសិទ្ធភាព។
សូមបញ្ជាក់ថា របាយការណ៍ស្រាវជ្រាវស្តីពីការបញ្ឈប់គ្រោះថ្នាក់នៅកម្ពុជា ក៏បានផ្តល់អនុសាសន៍សំខាន់ៗដើម្បីជំរុញកិច្ចការពារកុមារឱ្យមានសុវត្ថិភាពតាមប្រព័ន្ធអនឡាញផងដែរ។
អនុសាសន៍ទាំងនោះ រួមមានការពង្រឹងក្របខ័ណ្ឌច្បាប់ ការកសាងសមត្ថភាពឆ្លើយតបការកេងប្រវ័ញ្ច និងរំលោភបំពានផ្លូវភេទកុមារតាមប្រព័ន្ធអនឡាញរបស់គ្រប់ភាគីពាក់ព័ន្ធនៅទូទាំងប្រទេស ការបង្កើនកិច្ចសហការជាតិ និងអន្តរជាតិ។
ប្រភពដដែលបានបន្តថា ជាពិសេសជាមួយវិស័យឯកជន ការពង្រឹងយន្តការ ឆ្លើយតប និងគាំទ្រដល់ជនរងគ្រោះដោយផ្តោតលើការអនុវត្តបែបកុមារមេត្រីដែលឆ្លើយតបតាមបទដ្ឋានអន្តរជាតិ ការបង្កើតឱ្យមានយន្តការរាយការណ៍ថ្នាក់ជាតិដែលងាយស្រួលប្រើប្រាស់ និងការបង្កើនធនធានរបស់ អ្នកជំនាញ។
លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ធ្លាប់បានថ្លែងឱ្យដឹងកាលពីចុងខែមិថុនា កន្លងមកថា ការគិតគូរការពារកុមារលើប្រព័ន្ធអនឡាញ មានសារៈសំខាន់សម្រាប់សង្គមកម្ពុជានាពេលបច្ចុប្បន្ននិងអនាគត។
លោកថា៖ «ស្ថិតក្នុងបរិបទនៃការរីករាលដាលជំងឺកូវីដ ១៩ និងការបិទសាលារៀន កុមារកម្ពុជាជាង ៣ លាននាក់មានតម្រូវការប្រើប្រាស់ប្រព័ន្ធអនឡាញសម្រាប់ការសិក្សារៀនសូត្រ ការកម្សាន្ត និងការប្រាស្រ័យទាក់ទងគ្នា។ ស្របពេលជាមួយគ្នានេះ ហានិភ័យនៃប្រព័ន្ធអនឡាញ ដូចជា ការគំរាមកំហែងនិងការរំលោភបំពានផ្លូវភេទចំពោះកុមារ មានចំនួនកើនឡើងគួរឱ្យព្រួយបារម្ភ ដែលទាមទារឱ្យមានកិច្ចអន្តរាគមន៍ជាបន្ទាន់ និងការគិតគូរយុទ្ធសាស្រ្តការពារសម្រាប់រយៈវែងបន្ថែមទៀត»។
យោងស្ថិតិរបស់មជ្ឈមមណ្ឌលជាតិនៃកុមារបាត់ខ្លួន និងការកេងប្រវ័ញ្ច របស់សហរដ្ឋអាមេរិកនាពេលថ្មីៗនេះបានឱ្យដឹងថា ករណីនៃការរាយការណ៍ពីការរំលោភបំពានផ្លូវភេទចំពោះកុមារលើបណ្តាញអ៊ីនធឺណិតឆ្នាំ ២០២១ បានកើនឡើងប្រមាណ ៣៥ ភាគរយ ខ្ពស់ជាងឆ្នាំ ២០២០ គឺកើនពីចំនួន ២០ លានករណី ទៅប្រមាណ ២៩ លានករណី៕