ថ្នាក់ដឹកនាំគណៈកម្មាធិការជាតិគ្រប់គ្រងគ្រោះមហន្តរាយចុះពិនិត្យស្រូវរបស់ប្រជាពលរដ្ឋដែលត្រូវទឹកជំនន់ជន់លិចនៅក្នុងខេត្តបន្ទាយមានជ័យកាលពីថ្ងៃទី២៨កញ្ញា។ រូបថត NCDM
ភ្នំពេញៈ ឆ្នាំនេះមានព្យុះច្រើន តែសម្រាប់ប្រទេសកម្ពុជា មិនទាន់មានការជន់លិចធ្ងន់ធ្ងរដោយសារទឹកជំនន់នោះទេ ព្រោះកម្ពស់ទឹកទន្លេមេគង្គ នៅមានកម្រិតទាបនៅឡើយ។ នេះជាការថ្លែងរបស់លោកនាយករដ្ឋមន្ត្រី ហ៊ុន សែន។
នៅក្នុងវេទិកាអន្តរសាសនា ប្រឆាំងការជួញដូរមនុស្សលើកទី៦ ដែលត្រូវបានធ្វើឡើងកាលពីព្រឹកថ្ងៃទី ២៩ ខែកញ្ញា ឆ្នាំ ២០២២ នៅមជ្ឈមណ្ឌលពាណិជ្ជកម្ម និងពិព័រណ៍ជ្រោយចង្វារ លោកនាយករដ្ឋមន្ត្រី ហ៊ុន សែន ថ្លែងថា ការប្រែប្រួលអាកាសធាតុ បានក្លាយជាបញ្ហាធំនៅលើពិភពលោក។ សម្រាប់ប្រទេសកម្ពុជា នាប៉ុន្មានឆ្នាំចុងក្រោយនេះ កម្ពស់ទឹកទន្លេមេគង្គ ក្នុងរដូវវស្សាបានហក់ឡើងតិចតួចបំផុត។
លោកបានបញ្ជាក់ថា៖ «ទឹកទន្លេមេគង្គ វាមិនហក់ឡើងខ្លាំងទេ។ នៅរាជធានីភ្នំពេញទឹកទើបតែឡើងត្រឹមជាង ៨ ម៉ែត្រប៉ុណ្ណោះ ខណៈដែលយើងត្រូវការឱ្យទឹកឡើងដល់ ៩,៣០ ម៉ែត្រ»។
ក្នុងស្ថានភាពនេះ លោកនាយករដ្ឋមន្ត្រីបានលើកឡើងពីទុក្ខកង្វល់របស់ប្រជាកសិករនៅតាមដងទន្លេ ដែលជាទូទៅនិយមធ្វើការដាំដុះដំណាំចម្ការរួមផ្សំ ដែលពឹងផ្អែកស្ទើរតែទាំងស្រុងទៅលើដីល្បាប់ដ៏មានជីជាតិ ដែលបានហូរធ្លាក់ពីតំបន់ភ្នំនិងខ្ពង់រាប មកចាក់បំពេញដីចម្ការរបស់ពួកគេនៅពេលមានទឹកជំនន់កើតឡើង។
លោកថ្លែងថា៖ «អ្នកទន្លេ ភ័យខ្លាចបំផុត គឺរឿងទឹកទន្លេមិនឡើង។ ព្រោះបើទឹកទន្លេមិនឡើង សត្វល្អិតចង្រៃវាមិនងាប់ ហើយដីល្បាប់ក៏អត់ហូរចូល អ៊ីចឹងទេ ការដាំដុះរបស់កសិករនៅតាមដងទន្លេនឹងជួបការលំបាក»។
បើតាមការកត់ចំណាំរបស់ចាស់ៗ តាំងពីបុរាណកាលមក នៅក្រោយរដូវបុណ្យភ្ជុំ ទឹកទន្លេចាប់ផ្ដើមស្រក ប៉ុន្តែវាមិនប្រាកដទាំងស្រុងនោះទេ ព្រោះមានឆ្នាំខ្លះទឹកទន្លេក៏ចាប់ផ្ដើមជន់ឡើងក្រោយរដូវបុណ្យភ្ជុំផងដែរ។
បច្ចុប្បន្ន ទឹកទន្លេមេគង្គ បានចាប់ផ្ដើមជន់ឡើងជាបន្តបន្ទាប់ និងធ្វើឱ្យមានការជន់លិចស្រែចម្ការនិងលំនៅឋានប្រជាពលរដ្ឋមួយចំនួនក្នុងតំបន់វាលទំនាបជាប់ផ្លូវទឹក បន្ទាប់ពីមានព្យុះកើតឡើងជាបន្តបន្ទាប់ ហើយឥទ្ធិពលរបស់វាបានធ្វើឱ្យមានភ្លៀងធ្លាក់ខ្លាំងនិងរាយប៉ាយគ្របដណ្ដប់លើផ្ទៃប្រទេស។
ទន្ទឹមនឹងនេះ ក្រសួងធនធានទឹក និងឧតុនិយម នៅថ្ងៃទី ២៩ ខែកញ្ញា ឆ្នាំ២០២២ បានចេញសេចក្តីជូនដំណឹងបន្ទាន់មួយស្ដីពី ស្ថានភាពកម្ពស់ទឹកទន្លេមេគង្គ ដោយបានអំពាវនាវ ដល់ពលរដ្ឋដែលរស់នៅតាមទីទំនាបជាប់ដងទន្លេមេគង្គ និងជាប់តាមផ្លូវទឹកនានា បង្កើនការប្រុងប្រយ័ត្នចំពោះគ្រោះទឹកជំនន់។
ផ្អែកតាមសេចក្ដីជូនដំណឹងនោះ ទឹកទន្លេមេគង្គនឹងហក់ឡើងក្នុងរយៈពេលពី ៣-៥ ថ្ងៃខាងមុខ ជាពិសេស នៅ ភាគខាងលើនៃប្រទេសកម្ពុជា រួមមាន ខេត្តស្ទឹងត្រែង ទឹកនឹងអាចឡើងដល់កម្ពស់ ១០,០០ ម៉ែត្រ កៀកនឹងកម្ពស់ប្រកាសឱ្យប្រុងប្រយ័ត្ន ១០,៧០ ម៉ែត្រ ខណៈនៅខេត្តក្រចេះ ទឹកនឹងអាចឡើងដល់កម្ពស់ ២១,០០ ម៉ែត្រ កៀកនឹងកម្ពស់ប្រកាសឱ្យប្រុងប្រយ័ត្ន ២២,០០ ម៉ែត្រ។ នៅខេត្តកំពង់ចាម ទឹកនឹងអាចឡើងដល់កម្ពស់ ១៤,៣០ ម៉ែត្រ កៀកនឹងកម្ពស់ប្រកាសឱ្យប្រុងប្រយ័ត្ន ១៥,២០ ម៉ែត្រ ខណៈនៅស្ថានីយជលសាស្ត្រភ្នំពេញចតុមុខ ទឹកអាចឡើងដល់កម្ពស់ ៩,៤០ ម៉ែត្រ កៀកនឹងកម្ពស់ឱ្យប្រុងប្រយ័ត្ន ១០,៥០ ម៉ែត្រ។
ក្រសួងបានគូសបញ្ជាក់ថា៖ «ថ្វីបើទឹកទន្លេ ដែលហក់ឡើងនាពេលនេះ នៅមិនទាន់ដល់កម្រិតឱ្យមានការប្រុងប្រយ័ត្ន តែទឹកអាចនឹងហូរចូលលិចតំបន់ទំនាបមួយចំនួន អមតាមដងទន្លេ និងបន្តហូរចូលតាមបណ្តាព្រែកបន្ថែមទៀត។ ជាពិសេស នៅតំបន់ភាគឦសាន ទឹកទន្លេសេកុងកំពុងហក់ឡើង ដែលអាចប្រឈមនឹងទឹកជំនន់»។
ដោយឡែកនៅឯខេត្តបាត់ដំបង ជំនន់ទឹកភ្លៀងកំពុងជន់លិច និងប៉ះពាល់ផលដំណាំ និងជីវភាពរស់នៅរបស់ប្រជាពលរដ្ឋជាច្រើនគ្រួសារ នៅក្នុងស្រុកចំនួន ៣ រួមមានស្រុកភ្នំព្រឹក ស្រុកសំពៅលូន និងស្រុកកំរៀង។ ទន្ទឹមនឹងនេះ ផ្លូវលំជនបទជាច្រើនកន្លែង ត្រូវបានទឹកជន់លិចនិងកាត់ផ្ដាច់ការធ្វើចរាចរណ៍ឆ្លងកាត់ ជាបណ្ដោះអាសន្ន ខណៈសាលារៀន ជាច្រើនកន្លែងត្រូវបានទឹកជន់លិច ធ្វើឱ្យប៉ះពាល់ដល់ការសិក្សារបស់សិស្សរាប់ពាន់នាក់។ នេះបើយោងតាមរបាយការណ៍បឋមរបស់រដ្ឋបាលខេត្តបាត់ដំបង ដែល ភ្នំពេញ ប៉ុស្តិ៍ ទើបទទួលបាននៅព្រឹកថ្ងៃទី ២៩ ខែកញ្ញា ឆ្នាំ ២០២២។
លោក សុខ លូ អភិបាលខេត្តបាត់ដំបង បានប្រាប់ ភ្នំពេញ ប៉ុស្តិ៍ថា៖« នៅពេលនេះ អាជ្ញាធរយើង កំពុងចុះសួរសុខទុក្ខ និងផ្ដល់អំណោយសង្គ្រោះបឋមដល់គ្រួសាររងគ្រោះនៅក្នុងមូលដ្ឋានដែលកំពុងជួបប្រឈមគ្រោះជំនន់ទឹកភ្លៀង និងជួយអន្តរាគមន៍ដឹកអ្នកភូមិមួយចំនួនទៅកាន់ទីទួលសុវត្ថិភាព»។
បើតាមលោក សុខ លូ ជំនន់ទឹកភ្លៀង ដែលកំពុងជន់លិចលំនៅឋានពលរដ្ឋនៅក្នុងស្រុកទាំង៣ជាប់ព្រំដែនថៃ ខាងលើនេះ គឺបណ្ដាលមកពី ឥទ្ធិពលនៃព្យុះ ណូរុ ដែលធ្វើឱ្យមានភ្លៀងធ្លាក់ខ្លាំង នៅផ្នែកខាងលើ។
ទោះយ៉ាងណា លោកនាយករដ្ឋមន្ត្រី ហ៊ុន សែន បានថ្លែងថា ការជន់លិចដោយជំនន់ទឹកភ្លៀង គឺ «មិនធ្ងន់ធ្ងរ» នោះទេ។ ដោយភ្ជាប់ហានិភ័យនៃនិន្នាការប្រែប្រួលអាកាសធាតុជាសកល លោកនាយករដ្ឋមន្ត្រី បានលើកឡើងថា ប្រទេសប៉ាគីស្ថាន បានជួបប្រឈមគ្រោះមហន្តរាយទឹកជំនន់ធ្ងន់ធ្ងរជាងគេនៅក្នុងឆ្នាំនេះ ហើយកាលពីពេលថ្មីៗនេះ កម្ពុជាបានផ្ដល់ជំនួយមនុស្សធម៌ជាច្រើនដល់រដ្ឋាភិបាលនៃប្រទេសប៉ាគីស្ថាន ដើម្បីជួយរំលែកទុក្ខលំបាករបស់ប្រជាជនប៉ាគីស្ថាន ដែលកំពុងជួបប្រឈមខ្វះស្បៀងអាហារ៕
