ភ្នំពេញៈ លោក​នាយក​រដ្ឋមន្ត្រី ហ៊ុន សែន ក្រើន​រំឭក​ដាស់តឿន​ដល់​គណៈ​ប្រតិភូ​កម្ពុជា​ ដែល​ធ្វើ​ដំណើរ​ទៅកាន់​សហរដ្ឋ​អាមេរិក​ សូមធ្វើឱ្យបានត្រឹមត្រូវ ដើម្បី​រក្សា​នូវ​ភាពថ្លៃថ្នូរ​ ព្រោះ​កន្លងមក​មាន​គណៈប្រតិភូ​កម្ពុជា​មួយចំនួន​បាន​ឆ្លៀត​នាំ​មនុស្ស​ទៅជា​មួយ​ខ្លួន តែ​មនុស្ស​ទាំងនោះ​មិន​ព្រម​វិល​ត្រឡប់​មកវិញ ហើយ​នាំឱ្យ​សហ​រដ្ឋ​អាមេរិក ​ដាក់ទណ្ឌកម្ម​ដល់​ប្រធាន​គណៈប្រតិភូ​មិនឱ្យ​ចូល​ទឹកដី​អាមេរិក​ផង​ដែរ។

ក្នុង​វេទិកា​ជាតិ​អន្តរ​សាសនា​ប្រឆាំង​ការជួញដូរ​មនុស្ស​លើក​ទី៦ នៅ​មជ្ឈ​មណ្ឌល​ពាណិជ្ជកម្ម និង​ពិព័រណ៍​ជ្រោយ​ចង្វារ រាជធានី​ភ្នំពេញ​ លោក​ថ្លែងថា៖ «ខ្លះ​ធ្វើឱ្យ​ខូច​កេរ្តិ៍ឈ្មោះ។ ឧទាហរណ៍​ចេញទៅ​សហរដ្ឋ​អាមេរិក​ដោយមាន​ទិដ្ឋាការ​ត្រឹម​ត្រូវ ប៉ុន្តែ​គណៈប្រតិភូ​ខ្លះ​ឆ្លៀត​ដាក់​មនុស្ស​ទៅជា​មួយ ដែល​មនុស្ស​ទាំង​នោះ​ទៅដល់​អាមេរិក​ហើយ អត់​ព្រម​ត្រឡប់​មក​វិញ»។

លោក ហ៊ុន សែន បន្ថែម​ថា៖ «ហ្នឹង ក៏​សូ​មរំ​ឭ​ក​ដាស់​តឿន​ចំពោះ​មន្ត្រី​រាជរដ្ឋាភិបាល​ទាំងអស់ ឬក៏​អ្នក​វិនិយោ​គិន​ទាំង​ឡាយ​ ដែល​ធ្វើ​ដំណើរ​ទៅកាន់​សហរដ្ឋ​អាម​រិ​ក ​សូម​ធ្វើឱ្យបាន​ត្រឹមត្រូវ។ ខ្លះ​ថា​ សុំ​ទៅជា​មួយ ទៅហើយ​វា​មិន​មកវិញ ដល់​អ៊ីចឹង​អាមេ​រិក​ មិន​មែន​ដាក់​ទណ្ឌកម្ម​ត្រឹមតែ​អ្នក​ដែល​ទៅ​ស្នាក់នៅ​ខុសច្បាប់​នៅ​អាម​រិ​ក​ទេ ដាក់​ទាំង​ប្រធាន​គណៈប្រតិភូ​ហ្នឹង​តែម្តង ដែល​ថ្ងៃ​ក្រោយ​លែង​ចូល​អាម​រិ​កបាន។ អ៊ីចឹង គ្រាន់តែ​ផ្តាំ​ទេ​ដើម្បី​រក្សា​នូវ​ភាព​ថ្លៃថ្នូរ​របស់​គណៈប្រតិភូ​កម្ពុជា​ទៅកាន់​ប្រទេស​ដទៃ»។

លោក​លើក​ឡើង​ថា ​គណៈប្រតិភូ​កម្ពុជា​មួយ​ចំនួន​មិន​មែន​ត្រឹមតែ​នាំ​មនុស្ស​ដទៃ​ទៅជា​មួយ​ខ្លួន​ទៅកាន់​តែ​សហរដ្ឋ​អាម​រិ​ក​នោះទេ ប៉ុន្តែ​ក៏​នាំ​មនុស្ស​ដទៃ​ទៅជា​មួយ​ខ្លួន​ទៅកាន់​បារាំង​និង​អឺ​រ៉ុប​ផង​ដែរ។

លោក គិ​ន ភា ប្រធាន​វិទ្យាស្ថាន​ទំនាក់​ទំនង​អន្តរជាតិ​នៃ​រា​ជប​ណិ្ឌ​ត្យ​សភា​កម្ពុជាប្រាប់ ​ភ្នំពេញ ​ប៉ុស្តិ៍​ថា លោក​មិនមាន​ព័ត៌មាន​ថា​ តើ​មាន​គណៈប្រតិភូ​កម្ពុជា​ណា​ដែល​ធ្លាប់​ទៅកាន់​សហរដ្ឋអាមេរិក​ហើយ​បាន​នាំ​អ្នកផ្សេង​ទៅជា​មួយ​ខ្លួន​ហើយ​មិនបាន​ត្រឡប់មក​ប្រទេស​កម្ពុជា​វិញ​នោះ​ទេ។

ទោះយ៉ាង​ណា​ក្តី លោក​ឯកភាព​ចំពោះ​ការ​លើក​ឡើង​របស់លោក​នាយក​រដ្ឋមន្ត្រី ហើយ​បើសិនជា​រឿងនេះ​ មាន​ពិតមែន​គឺ​វា​ប៉ះពាល់​​ធ្ងន់ធ្ងរ​ណាស់​ទៅ​ដល់កេរ្តិ៍ឈ្មោះ និង​កិ​ត្តិ​យល​របស់​ប្រទេស​កម្ពុជា ជាពិ​សេស​ពាក់​ព័ន្ធ​ជាមួយ​នឹង​ការជួញ​ដូរ​មនុស្ស​តែម្តង។

លោក​ថ្លែងថា៖ «អ៊ីចឹង​ហើយ​បានជា​កន្លង​មក យើង​ឃើញ​មាន​ទណ្ឌ​កម្ម​ដល់​គណៈ​ប្រតិភូ​មិន​ឱ្យ​ចូល​ទឹកដី​សហរដ្ឋ​អាមេរិក​ជា​ដើម។ វា​ជា​ទង្វើ​មួយ​ដែល​មិនគួរ​កើតមាន​ ដែល​វា​ប៉ះពាល់​ធ្ងន់ធ្ងរ​ដល់កិ​ត្តិ​យស​កេរ្តិ៍ឈ្មោះ​និង​មុខមាត់​កម្ពុជា​ក្រោម​ក្រសែភ្នែក​របស់​សហរដ្ឋ​អាមេរិក»។

លោក​ គិ​ន ភា​ បន្តថា ​គណៈប្រតិភូ​កម្ពុជា ដែល​មាន​ភារកិច្ច​ទៅ​ទស្សន​កិច្ច​នៅ​សហរដ្ឋ​អាមេរិក​គួរតែ​រក្សា​នូវ​សេចក្តី​ថ្លៃថ្នូ​រ និង​កិត្តិយស​ជាតិ ដោយ​ចៀស​វាង​នូវ​អំពើ​បែប​នេះ​ដែល​អាច​ចាត់​ទុក​ថា​ ជាការ​ជួញ​ដូរ​មនុស្ស​ហើយ​វា​ធ្វើឱ្យ​កម្ពុជា​ត្រូវបាន​គេ​ដាក់​ចំណាត់​ថ្នាក់​មិនល្អ​ពាក់ព័ន្ធ​ជាមួយ​នឹង​បញ្ហា​ការ​ជួញ​ដូរ​មនុស្ស​នេះ។

កាលពី​ខែ​ឧសភា លោក ហ៊ុន សែន បាន​សម្តែង​ការខក​ចិត្ត​ចំពោះ​សហរដ្ឋ​អាមេរិក​ដែល​បន្ត​ដាក់​ទណ្ឌកម្ម​ទិដ្ឋាការ​មកលើ​មន្ត្រី​ក្រសួង​ការ​បរទេស​កម្ពុ​ជា ចំពោះ​ការ​ចោទ​ប្រកាន់​ថា បដិសេធ ឬ​ពន្យារ​ពេល​ដោយ​គ្មាន​ហេតុផល​សម​ស្រប​ចំពោះ​ការ​អនុវត្ត​កិច្ចព្រម​ព្រៀង​ទទួល​យក​ពលរដ្ឋ​ខ្លួន ដែល​អាមេរិក​ បញ្ជូន​ឱ្យ​ត្រឡប់​មក​កម្ពុជា​វិញ ​បើទោះ​បីជា​កម្ពុជា​បាន​អនុវត្ត​យ៉ាង​សកម្ម​នូវ​កិច្ច​ព្រម​ព្រៀង​នេះ​ក៏ដោយ​។

សហរដ្ឋ​អាមេរិក​ កាលពី​ឆ្នាំ​ ២០១៧ បាន​ផ្អាក​ចេញ​ទិដ្ឋាការ​ប្រភេទ B1/B2 ដល់​មន្ត្រី​នៃ​ក្រសួង​ការបរ​ទេស​កម្ពុ​ជា​ ដែល​មាន​តួនាទី​ចាប់ពី​ថ្នាក់​អគ្គនាយក​រហូតដល់​ថ្នាក់ដឹក​នាំ​កំពូល​នៃ​ក្រសួង​នេះ ព្រម​ទាំង​សមាជិក​ក្រុម​គ្រួសារ​របស់​ពួក​គេ​ដោយមាន​ករណី​លើក​លែង​តិចតួច​ប៉ុណ្ណោះ ដែលជា​វិធានការ​ឆ្លើយ​តប​ពាក់​ព័ន្ធ​នឹង​ការដែល​កម្ពុជា មិន​ព្រម​ទទួល​យក​ពលរដ្ឋ​រប​ស់​ខ្លួន​ពី​អា​មេរិក​ត្រឡប់​មក​វិញ៕