ភ្នំពេញៈ កម្ពុជាកំពុងពិចារណាសម្រួលលក្ខខណ្ឌបន្ថែមទៀតទាក់ទងនឹងជំងឺកូវីដ ១៩ ខណៈស្ថានភាពនៃការឆ្លងរាលដាលពីមេរោគកូវីដ ១៩ ក្នុងប្រទេសមានភាពធូរស្រាល និងល្អប្រសើរច្រើន ប៉ុន្តែរាជរដ្ឋាភិបាលនៅតែបន្តអំពាវនាវឱ្យប្រជាពលរដ្ឋប្រុងប្រយ័ត្ន និងទៅចាក់វ៉ាក់សាំងដូសជំរុញឱ្យបានគ្រប់ៗគ្នាផងដែរ។
គម្រោងនៃការដកបម្រាមទាំងនេះ ត្រូវបានលើកឡើងដោយលោកនាយករដ្ឋមន្ត្រី ហ៊ុន សែន នាថ្ងៃទី ២៩ ខែកញ្ញា ក្នុងឱកាសដែលលោកបានចូលរួមជាអធិបតីក្នុងពេលប្រារព្ធវេទិកាអន្តរសាសនាប្រឆាំងការជួញដូរមនុស្សលើកទី ៦ ក្រោមប្រធានបទ «សូមកុំយកកម្ពុជាធ្វើជាគោលដៅប្រព្រឹត្តអំពើជួញដូរមនុស្ស» នៅមជ្ឈមណ្ឌលពាណិជ្ជកម្ម និងពិព័រណ៍ជ្រោយចង្វារ (OCIC)។
លោក ហ៊ុន សែន បានមានប្រសាសន៍ថា៖ «ពិតមែនហើយ ខ្ញុំកំពុងតែដាក់ឱ្យក្រសួងសុខាភិបាលធ្វើការប្រជុំបច្ចេកទេសដោយចង់ឱ្យមានការដកចេញនូវបម្រាមបន្ថែមទៀត ដែលឥឡូវនេះយើងតម្រូវការនូវកាតវ៉ាក់សាំង ហើយនឹងតម្រូវការវិញ្ញាបនបត្រពិនិត្យសុខភាព តែខ្ញុំគិត គួរតែលើកលែងទៅ»។
ការណែនាំឱ្យមានការដកបម្រាមនូវកាតចាក់វ៉ាក់សាំងនេះ បន្ទាប់ពីលោក ហ៊ុន សែន បានទៅចូលរួមកិច្ចប្រជុំជាមួយនឹងអង្គការសហប្រជាជាតិនៅទីក្រុងញូវយ៉ក សហរដ្ឋអាមេរិក ដោយមិនមានអ្នកណាស្នើ ឬទាមទារឱ្យលោកបង្ហាញកាតចាក់វ៉ាក់សាំងឡើយ។
លោក ហ៊ុន សែន បានប្រាប់ថា៖ «ខ្ញុំបានដាក់កាតវ៉ាក់សាំងនៅក្នុងហោប៉ៅពេលខ្ញុំទៅសហរដ្ឋអាមេរិកក្នុងកិច្ចប្រជុំអង្គការសហប្រជាជាតិ តែមិនមានការសួររកកាតចាក់វ៉ាក់សាំងទេ ហើយក៏មិនមែនដោយសារតែយើងជាភ្ញៀវសំខាន់ទេ (VIP) ដែលខុសពីលើកមុនដែលត្រូវការធ្វើតេស្តរកកូវីដ ១៩ មុននឹងចូលប្រជុំនានា»។
លោកបានបញ្ជាក់ទៀតថា៖ «កាតចាក់វ៉ាក់សាំងអាចប្រើប្រាស់រយៈពេលមួយ ប៉ុន្តែបើពេលនេះវាមិនមានការចាំបាច់ គឺមិនបាច់ប្រើទេ។ នៅពេលអ្នកដំណើរមកដល់ឱ្យគាត់ទៅៗ ហើយប្រសិនបើគាត់មិនស្រួលខ្លួន គាត់អាចធ្វើតេស្តដោយខ្លួនឯង ឬពួកគាត់មករកយើង យើងធ្វើតេស្តឱ្យគាត់ទៅ ហើយបើឈឺក៏ព្យាបាលជូនពួកគាត់ទៅ»។
ឆ្លៀតក្នុងឱកាសនោះដែរ លោកនាយករដ្ឋមន្ត្រី ហ៊ុន សែន ក៏បានថ្លែងអំណរគុណដល់ប្រជាពលរដ្ឋទាំងអស់ដែលបានចូលរួមជាមួយនឹងរាជរដ្ឋាភិបាលក្នុងការទប់ស្កាត់ការរីករាលដាលជំងឺកូវីដ ១៩ តាមរយៈវិធានការសុខាភិបាល ៣ ការពារ និង ៣ កុំ និងការទទួលយកវ៉ាក់សាំងកូវីដ ១៩។
ជាមួយគ្នានេះលោកក៏បានអរគុណចំពោះមិត្តភក្តិអន្តរជាតិ ដែលបានផ្តល់ និងលក់វ៉ាក់សាំងមករាជរដ្ឋាភិបាលកម្ពុជា ដើម្បីចាក់ជូនពលរដ្ឋកម្ពុជាផងដែរ ក៏ប៉ុន្តែលោកនាយករដ្ឋមន្ត្រី នៅតែបន្តអំពាវនាវឱ្យពលរដ្ឋប្រុងប្រយ័ត្ន និងត្រូវប្រកាន់ខ្ជាប់នូវវិធានការសុខាភិបាល ៣ កុំ និង ៣ ការពារជាប្រចាំផងដែរ។
លោកថ្លែងថា៖ «ខ្ញុំនៅតែបន្តអំពាវនាវឱ្យប្រជាពលរដ្ឋដែលមិនទាន់ទទួលបានដូសទី ៣ ត្រូវមកទទួលយកការចាក់ដូសទី ៣ ដែលនេះគឺជាការខ្វល់ខ្វាយមួយ ខណៈពេលដែលពលរដ្ឋមួយចំនួនបានទទួលដល់ដូសទី ៥ រួចហើយ ដែលអ្នកខ្លះមិនទាន់មកទទួលយកដូសទី ៣ ផង»។
មូលហេតុមួយចំនួនដែលធ្វើឱ្យប្រជាពលរដ្ឋមិនមកចាក់វ៉ាក់សាំងដូសជំរុញ [ដូសទី ៣] ត្រូវបានលោក ហ៊ុន សែន លើកឡើងថា នេះប្រហែលជាពួកគាត់យល់ឃើញថា ពួកគាត់ចាក់បាន ២ ដូសហើយ ហើយមិនមានករណីឆ្លងច្រើន និងស្លាប់ទៀត ទើបបានជាពួកគាត់មិនចាក់ដូសទី ៣ តែនេះគឺជាបញ្ហា។ បើទោះបីជាមកទល់ពេលនេះ មានអ្នកជំងឺតែ ១០ នាក់ប៉ុណ្ណោះដែលកំពុងសម្រាកព្យាបាលនៅមន្ទីរពេទ្យ ឯអ្នកឆ្លងដទៃទៀតសម្រាកព្យាបាលនៅតាមផ្ទះ។ នេះបើតាមការបញ្ជាក់បន្ថែមពីលោក ហ៊ុន សែន។
លោកបានបន្តថា៖ «ប្រសិនបើមានការប្រែប្រួលដែលមានប្រភេទកូវីដថ្មីកើតឡើងថែមទៀត នោះធ្វើឱ្យយើងជួបការលំបាក។ អ៊ីចឹងទេ ខ្ញុំសូមធ្វើការអំពាវនាវឱ្យអនុវត្តនូវវិធានការសុខាភិបាល។ សូមកុំប្រហែសឱ្យសោះដោយសារកូវីដមិនទាន់ទៅណាឆ្ងាយនោះទេ។ យើងអាចភ្លេចកូវីដ តែកូវីដមិនភ្លេចយើងនោះទេ»។
សូមរំឭកផងដែរថា កាលពីខែមីនា ឆ្នាំ ២០២២ ក្រសួងសុខាភិបាលធ្លាប់បានចេញសេចក្តីប្រកាសកែសម្រួលលក្ខខណ្ឌមួយចំនួនចំពោះអ្នកដំណើរមកពីបរទេសដោយបានលុបចោលលក្ខខណ្ឌតម្រូវឱ្យបង្ហាញលទ្ធផលតេស្ត PCR អវិជ្ជមាន ក្នុងរយៈពេល ៧២ ម៉ោង មុនពេលមកដល់កម្ពុជា។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានឱ្យដឹងនាពេលនោះថា ក្រសួងសម្រេចលុបចោលការតម្រូវឱ្យធ្វើតេស្តរហ័ស នៅពេលមកដល់កម្ពុជា និងអនុញ្ញាតឱ្យបើកដំណើរការឡើងវិញនូវការផ្តល់ទិដ្ឋាការពេលមកដល់ (Visa on Arrival) សម្រាប់អ្នកដំណើរអន្តរជាតិទាំងអស់ ទាំងតាមផ្លូវអាកាស ផ្លូវគោក និងផ្លូវទឹក។
លោករដ្ឋមន្ត្រីបានបន្ថែមថា៖ «ទោះបីមានការលុបចោលលក្ខខណ្ឌតម្រូវដូចមានចែងក្នុងចំណុចទី ១ និងទី ២ ខាងលើនេះក៏ដោយ ក្រសួងសុខាភិបាលសូមលើកទឹកចិត្តដល់អ្នកដំណើរទាំងអស់គប្បីធ្វើតេស្តរហ័សខ្លួនឯង»។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានថ្លែងក្នុងសន្និសីទសារព័ត៌មានពីថ្ងៃទី ១៥ ខែកញ្ញាថា មកទល់ពេលនេះមេរោគកូវីដ ១៩ បានបំប្លែងខ្លួនរហូតដល់ចន្លោះពី ៤០ ទៅ ៥០ ប្រភេទផ្សេងទៀត។
លោកស្រីថា៖ «មេរោគកូវីដ ១៩ នេះឆ្លាតណាស់ដោយបានបំប្លែងខ្លួនរបស់វារហូតប្រមាណជា ៤០ ទៅ ៥០ ប្រភេទ។ ខ្ញុំសុំប្រើពាក្យថាមេរោគនេះបានបង្កើតកូនបង្កើតចៅបានច្រើនហើយ ដូចនេះយើងក៏ត្រូវតែបន្តនូវការប្រុងប្រយ័ត្ន...»។
តាមរបាយការណ៍ក្រសួងសុខាភិបាលគិតត្រឹមថ្ងៃទី ២៨ ខែកញ្ញា លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦ លាននាក់ មាន ៩៤,៩៦% អត្រាអ្នកចាក់ដូសទី ៣ មានជាង ១០ លាននាក់ ដូសទី ៤ មានចំនួនជាង ៥ លាននាក់ និងដូសទី ៥ មានចំនួនជាង ៨៥ ម៉ឺននាក់៕