.jpg)
ជំនួបពិភាក្សារវាងថ្នាក់ដឹកនាំនគរបាលកម្ពុជា និងថៃ កាលពីថ្ងៃទី ២៩ កញ្ញា។ រូបថត នគរបាល
ភ្នំពេញៈ លោកឧត្តមសេនីយ៍ឯក ជា ពៅ អគ្គស្នងការរងនគរបាលជាតិ តំណាងលោក នាយឧត្តមសេនីយ៍ នេត សាវឿន អគ្គស្នងការនគរបាលជាតិ កាលពីថ្ងៃទី ២៩ កញ្ញា បានជួបពិភាក្សាការងារជាមួយគណៈប្រតិភូ នៃរាជបណ្ឌិត្យសភានគរបាលភូមិន្ទថៃ ដឹកនាំដោយលោក ឧត្តមសេនីយ៍ឯក THATCHAI PITANEELABOOT ប្រធានរាជបណ្ឌិត្យសភានគរបាលភូមិន្ទថៃ នៅអគ្គស្នងការដ្ឋាននគរបាលជាតិ។
បើតាមការចុះផ្សាយរបស់អគ្គស្នងការដ្ឋាននគរបាលជាតិ លោកឧត្តមសេនីយ៍ឯក ជា ពៅ បានសម្ដែងនូវការស្វាគមន៍យ៉ាងកក់ក្តៅ និងបានធ្វើការពិភាក្សាការងារដែលផ្តោតសំខាន់លើការពង្រឹងចំណងមិត្តភាពរវាងកម្ពុជា-ថៃ ក្នុងការបង្ការ ទប់ស្កាត់ និងបង្ក្រាបបទល្មើសបច្ចេកវិទ្យា។
ក្នុងជំនួបនេះ ភាគីទាំង ២ បានធ្វើការវាយតម្លៃខ្ពស់ចំពោះលទ្ធផលប្រកបដោយផ្លែផ្កា នៃទំនាក់ទំនងកិច្ចសហប្រតិបត្តិការរវាងនគរបាលជាតិកម្ពុជា និងនគរបាលភូមិន្ទថៃ នាពេលកន្លងមក ដែលគឺជាការចូលរួមចំណែកយ៉ាងសំខាន់ដល់ការរឹតចំណងមិត្តភាពរវាងប្រទេស និងថែរក្សាបាននូវសុខសន្តិភាព ស្ថិរភាព សណ្តាប់ធ្នាប់សាធារណៈអន្តរជាតិ ក្នុងនាមរដ្ឋជិតខាង។
ឆ្លៀតក្នុងឱកាសនេះ លោក ឧត្តមសេនីយ៍ឯក THATCHAI PITANEELABOOT បានថ្លែងអំណរគុណយ៉ាងជ្រាលជ្រៅចំពោះ លោកនាយឧត្តមសេនីយ៍ នេត សាវឿន ដែលបានចាត់ លោក ឧត្តមសេនីយ៍ឯក ជា ពៅ ជាតំណាងដើម្បីទទួលស្វាមគមន៍ និងពិភាក្សាការងារនិងផ្លាស់ប្តូរបទពិសោធការងារ៕
