ព្រះសីហនុៈ គណៈបញ្ជាការឯកភាពខេត្តព្រះសីហនុ បានសម្រេចបង្កើតក្រុមការងារប្រតិបត្តិការចំនួន ០៣ ក្រុម ដើម្បីចុះត្រួតពិនិត្យនៅតាមទីតាំងអាជីវកម្ម សណ្ឋាគារ កាស៊ីណូ និងអគារស្នាក់នៅរួម ដើម្បីប្រយុទ្ធប្រឆាំងគ្រប់ទម្រង់ នៃអំពើជួញដូរមនុស្ស ជួញដូរពលកម្ម និងអាជីវកម្មផ្លូវភេទ។
ការសម្រេចនេះ ត្រូវបានធ្វើឡើង នៅក្នុងកិច្ចប្រជុំដែលដឹកនាំដោយលោក គួច ចំរើន អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពខេត្តព្រះសីហនុ ដោយមានការចូលរួមពីអភិបាលរងខេត្ត នាយករដ្ឋបាលសាលាខេត្ត ប្រធានសាលាដំបូងខេត្ត ព្រះរាជអាជ្ញា អគ្គនាយកដ្ឋានអន្តោប្រវេសន៍ ស្នងការនគរបាលខេត្ត មេបញ្ជាការកងរាជអាវុធហត្ថខេត្ត អភិបាលក្រុងស្រុក និងប្រធានមន្ទីរអង្គភាពពាក់ព័ន្ធក្នុងខេត្តកាលពីថ្ងៃទី ២៨ កញ្ញា។
បើតាមហ្វេសប៊ុករដ្ឋបាលខេត្តព្រះសីហនុ ចុះផ្សាយនៅថ្ងៃទី ២៩ កញ្ញាបានឱ្យដឹងថា ក្រុមការងារដែលត្រូវបានបង្កើតឡើងទាំង ៣ ក្រុមនោះ មានតួនាទី ត្រូវចុះត្រួតពិនិត្យនៅតាមទីតាំងអាជីវកម្ម សណ្ឋាគារ កាស៊ីណូ និងអគារស្នាក់នៅរួម នៅក្នុងក្រុងព្រះសីហនុ ខេត្តព្រះសីហនុ ដើម្បីប្រយុទ្ធប្រឆាំងគ្រប់ទម្រង់ នៃអំពើជួញដូរមនុស្ស ជួញដូរពលកម្ម និងអាជីវកម្មផ្លូវភេទ។
ចុះត្រួតពិនិត្យអំពីភាពស្របច្បាប់ នៃជនបរទេស និងភាពស្របច្បាប់ នៃការប្រើប្រាស់កម្លាំងពលកម្ម ស្របតាមច្បាប់ស្តីពីអន្តោប្រវេសន៍ និងច្បាប់ស្តីពីការងារ នៃព្រះរាជាណាចក្រកម្ពុជា។
ចុះត្រួតពិនិត្យលិខិតអនុញ្ញាត ឬអាជ្ញាបណ្ណអាជីវកម្ម បណ្ណប៉ាតង់ និងឯកសារពាក់ព័ន្ធដទៃផ្សេងទៀតនិងបង្ក្រាបករណីការជួញដូរមនុស្ស ការចាប់បង្ខាំងមនុស្ស ការធ្វើទារុណកម្មការបង្ខំឱ្យធ្វើការ ការជំរិតទារប្រាក់ជាដើម។ល។
បន្ថែមពីនេះ ត្រូវចុះត្រួតពិនិត្យ និងបង្ក្រាបករណី ការផលិត ការជួញដូរ ការចែកចាយ និងការប្រើប្រាស់គ្រឿងញៀន បង្ក្រាបករណី ការជួញដូរ និងប្រើប្រាស់អាវុធខុសច្បាប់។
រាល់ការចុះអនុវត្តការងារត្រូវមានការសម្របសម្រួលនីតិវិធី ពីអយ្យការអមសាលាដំបូងខេត្តព្រះសីហនុ ត្រូវធ្វើកំណត់ហេតុរាល់ការចុះត្រួតពិនិត្យទីតាំងនីមួយៗ និងបូកសរុបលទ្ធផលការងារ រាយការណ៍ជូនអភិបាលខេត្ត។
លើសពីនេះក្រុមការងារ ត្រូវរៀបចំកសាងសំណុំឯកសារស្របតាមនីតិវិធី ដើម្បីបញ្ជូនទៅតុលាការហើយក្រុមការងារនីមួយៗមានសិទ្ធិប្រើប្រាស់មន្ត្រីក្រោមឱវាទទៅតាមទំហំការងារជាក់ស្តែងនិងត្រូវអនុវត្តភារកិច្ចផ្សេងៗទៀតតាមការដឹកនាំចង្អុលបង្ហាញពីប្រធានគណៈបញ្ជាការឯកភាពរដ្ឋបាលខេត្ត៕