បាត់ដំបងៈ ប្រជាពលរដ្ឋជាង ១០០ គ្រួសារ នៃឃុំចំនួនពីរ គឺឃុំបួរ និងឃុំពេជ្រចិន្ដា ត្រូវបានជម្លៀសមកទីទួលសុវត្ថិភាពប្រកបដោយជោគជ័យ កាលពីថ្ងៃទី ២៩ ខែកញ្ញា ខណៈជំនន់ទឹកភ្លៀងបានជន់លិចភូមិករ និងផ្ទះសម្បែងរបស់ពួកគាត់។ នេះបើតាមអភិបាលស្រុកភ្នំព្រឹក។
លោក សុង សុភ័ក្ត្រ អភិបាលស្រុកភ្នំព្រឹក បានដឹងឡើងថា ស្ថានភាពជំនន់ទឹកភ្លៀងនេះ គឺមានលក្ខណៈធ្ងន់ធ្ងរតែក្នុងរយៈពេលប៉ុន្មានថ្ងៃនេះប៉ុណ្ណោះ ពោលគឺចាប់តាំងពីថ្ងៃទី ២៧ មកដល់ថ្ងៃទី ២៩ ខែកញ្ញា ឆ្នាំ ២០២២ នេះ គឺដោយសារតែមានភ្លៀងធ្លាក់មកខ្លាំង ៣ ថ្ងៃជាប់គ្នា ទើបបង្កជាជំនន់ទឹកភ្លៀងតែម្តង។
លោក បានបន្តទៀតថា រហូតមកដល់រសៀលថ្ងៃទី ២៩ ខែកញ្ញានេះស្ថានភាពជំនន់ទឹកភ្លៀងនេះ គឺនៅមានការប៉ះពាល់ធ្ងន់ធ្ងរនៅឃុំបួរនៃស្រុកភ្នំព្រឹក ដែលមានភ្លៀងធ្លាក់យ៉ាងខ្លាំងបណ្តាលឱ្យមានទឹកជំនន់រហ័សបង្កឱ្យមានការលិចលង់ដល់លំនៅឋាន និងផលដំណាំរបស់ប្រជាពលរដ្ឋផងដែរ។
លោក សុខ លូ អភិបាលខេត្តបាត់ដំបង បានដឹកនាំក្រុមការងារចុះពិនិត្យមើលស្ថានភាពជំនន់ទឹកភ្លៀងដែលស្ថិតក្នុងស្រុកបវេល និងស្រុកភ្នំព្រឹក ខេត្តបាត់ដំបង នៅថ្ងៃទី ២៩ ខែកញ្ញានេះ បន្ទាប់ពីបានដឹកនាំមន្ទីរ អង្គភាពជំនាញចុះពិនិត្យវឌ្ឍនភាព នៃការសាងសង់ទំនប់ដូនទ្រី នៃស្រុករុក្ខគិរី។
លោកអភិបាលខេត្តបាត់ដំបង បានថ្លែងនូវការអរគុណ និងកោតសរសើរដល់កងកម្លាំង និងអាជ្ញាធរគ្រប់ជាន់ថ្នាក់ ដែលបានសស្រាក់សស្រាំជួយជម្លៀសបងប្អូនប្រជាពលរដ្ឋទៅកាន់ទីទួលមានសុវត្ថិភាពបានទាន់ពេលវេលា។
លោកក៏បានជំរុញណែនាំដល់អាជ្ញាធរគ្រប់លំដាប់ថ្នាក់ និងកងកម្លាំងពាក់ព័ន្ធនៅក្នុងមូលដ្ឋានទាំងអស់ ជាពិសេសក្នុងស្រុកខាងលើត្រូវបន្តតាមដានស្ថានភាពទូទៅនៃជំនន់ទឹកភ្លៀង ដែលកំពុងកើតមានក្នុងមូលដ្ឋានខ្លួនធ្វើយ៉ាងណាយកចិត្តទុកដាក់ការជួយបងប្អូនដែលរងផលប៉ះពាល់ និងត្រូវជម្លៀសពួកគាត់ឱ្យទៅកាន់ទីទួលសុវត្ថិភាពឱ្យបានលឿនបានឆាប់កាន់តែល្អ ចៀសវាងការបង្កកើតឡើងដោយគ្រោះថ្នាក់ផ្សេងៗ និងត្រូវរាយការណ៍ពីសភាពប្រែប្រួលក្នុងករណីកើតឡើងជាយថាហេតុនៃផលប៉ះពាល់ពីជំនន់ទឹកភ្លៀង នៅក្នុងមូលដ្ឋានរបស់ខ្លួន៕