កំពង់ស្ពឺៈ មានករណីគ្រោះអគ្គិភ័យមួយបានឆាបឆេះរោងចក្រ លីវតាន នៅចំណុចភូមិព្រៃកេះ ឃុំព្រៃវិហារ ស្រុកគងពិសី ខេត្តកំពង់ស្ពឺ នៅវេលាម៉ោង ៤ និង ២០ នាទី ព្រឹកថ្ងៃទី ៣០ កញ្ញានេះ បណ្តាលឱ្យឆេះខូចខាតអគារ ១ ខ្នង ទំហំ ៩៥ ម x៥៤ ម ធ្វើអំពីដែកប្រក់សង្គ័សី។
ក្រៅពីនេះក៏បានបណ្តាលឱ្យឆេះម៉ាស៊ីនដេរចំនួន ៣០០ គ្រឿង និងឆេះសម្ភារជាច្រើនទៀត ដែលមិនទាន់ដឹងពីចំនួនច្បាស់លាស់ ខណៈសមត្ថកិច្ច កំពុងបន្តសាកសួរម្ចាស់រោងចក្រនេះ និងកំពុងធ្វើការស៊ើបអង្កេតអំពីមូលហេតុនៃការឆេះនេះ។
បើតាមអគ្គស្នងការដ្ឋាននគរបាលជាតិ គ្រោះអគ្គិភ័យនេះ សមត្ថកិច្ចបានប្រើប្រាស់កម្លាំងរួម ៦២ នាក់ រថយន្តពន្លត់អគ្គិភ័យចំនួន ១១ គ្រឿង ក្នុងនោះមានកម្លាំងការិយាល័យនគរបាលបង្ការពន្លត់អគ្គិភ័យនិងសង្គ្រោះចំនួន ៩ នាក់ រថយន្តចំនួន ២ គ្រឿង កម្លាំងកងពលតូចលេខ ៧០ ចំនួន ១៧ នាក់ រថយន្តចំនួន ៥ គ្រឿង។
ក្រៅពីនេះ មានកម្លាំងអធិការដ្ឋាននគរបាលស្រុកគងពិសី ១៨ នាក់ រថយន្តចំនួន ១ គ្រឿង កម្លាំងអធិការដ្ឋាននគរបាលស្រុកបសេដ្ឋ ៦ នាក់ រថយន្តចំនួន ១ គ្រឿង កម្លាំងអធិការដ្ឋាននគរបាលស្រុកត្រាំងកក់ ខេត្តតាកែវ ចំនួន ៦ នាក់រថយន្តចំនួន ១ គ្រឿងនិងកម្លាំងអធិការដ្ឋាននគរបាលស្រុកបាទី ខេត្តតាកែវ ៦ នាក់រថយន្តចំនួន ១ គ្រឿង៕