.jpg)
អាជ្ញាធរកម្ពុជាបានអះអាងពីការត្រៀមបណ្តេញជនជាតិចិនជាង ២០ នាក់ ដែលត្រូវបានជួយសង្គ្រោះពីករណីលិចទូកនៅខេត្តព្រះសីហនុ ចេញពីប្រទេសកម្ពុជា។ ការអះអាងយ៉ាងដូច្នេះ គឺបន្ទាប់ពីអាជ្ញាធរបានសាកសួរជនជាតិចិនទាំងនោះ និងរកឃើញថា ជាករណីឆ្លងដែនខុសច្បាប់ មានបំណងចូលមកបម្រើការងារឆបោក និងជួញដូរមនុស្សនៅខេត្តព្រះសីហនុ។
លោក កែវ វណ្ណថន អគ្គនាយករងនៃអគ្គនាយកដ្ឋានអន្តោប្រវេសន៍ បានឱ្យដឹងថា៖ «ជនជាតិចិនទាំងនោះ ត្រូវបានរកឃើញថាឆ្លងដែនខុសច្បាប់ ចឹងគាត់មករកការងារធ្វើ ចឹងយើងកំពុងរៀបចំនីតិវិធីសុំប្រកាសពីក្រសួងមហាផ្ទៃ បណ្តេញពួកគាត់ចេញពីប្រទេសកម្ពុជា»។
ករណីលិចទូកជនជាតិចិនចំនួន ៤១ នាក់នៅខេត្តព្រះសីហនុ កាលពីថ្ងៃទី ២២ ខែកញ្ញា ត្រូវបានអាជ្ញាធរខេត្តព្រះសីហនុជួយសង្គ្រោះបានចំនួន ២៤ នាក់ ដោយមានស្លាប់ចំនួន ៣ នាក់ ខណៈដែល ១៧ នាក់ផ្សេងទៀត ត្រូវបានអណ្តែតដល់ប្រទេសវៀតណាម ដោយអាជ្ញាធរវៀតណាមជួយសង្គ្រោះបានចំនួន ១៧ នាក់ ស្លាប់ ៨ នាក់។
លោក កែវ វណ្ណថន អគ្គនាយករងនៃអគ្គនាយកដ្ឋានអន្តោប្រវេសន៍ បានបញ្ជាក់បន្ថែមថា៖ «ការរកឃើញជនជាតិចិននៅលើទឹកដីវៀតណាម ជារឿងរបស់វៀតណាម ខាងយើង [កម្ពុជា] សង្គ្រោះបាននេះ ២១ នាក់ ដែលនៅមានជីវិតនេះ យើងអនុវត្តច្បាប់អន្តោប្រវេសន៍ បណ្តេញចេញពីប្រទេសកម្ពុជា តាមប្រកាសរបស់ក្រសួងមហាផ្ទៃ។ ឯខាងវៀតណាម ទាក់ទងជាមួយភាគីចិនយ៉ាងណានោះ ជារឿងរបស់វៀតណាម»។
ជុំវិញករណីលិចទូកជនជាតិចិននេះ លោក ឡុង ឌីម៉ង់ អភិបាលរងខេត្តព្រះសីហនុ បានឱ្យដឹងថា៖ «ករណីនេះបានផុតសមត្ថកិច្ចរបស់រដ្ឋបាលខេត្តព្រះសីហនុហើយ។ ដោយឡែកអ្នកដែលនៅរស់ត្រូវបានបញ្ជូនផុតទៅភ្នំពេញបាត់ហើយ ចឹងផុតសមត្ថភាពរបស់ខេត្តព្រះសីហនុហើយ»។
យ៉ាងណា កាលពីជំហាននៃការជួយសង្គ្រោះជនជាតិបានចំនួន ១៨ នាក់ អាជ្ញាធរខេត្តព្រះសីហនុក៏បានឃាត់ខ្លួនអ្នកទាំងអស់ដើម្បីសាកសួរពីការឆ្លងដែន ថាតើស្របទៅតាមច្បាប់ ឬខុសច្បាប់។ លោក ឡុង ឌី ម៉ង់ អភិបាលរងខេត្តព្រះសីហនុ បញ្ជាក់ថា៖ «យើងឃើញថាជាការឆ្លងដែនខុសច្បាប់ហើយ ហើយអាចថាមានក្នុងចំណោម ២៣ នាក់ដែលយើងសង្គ្រោះបានហ្នឹង ចឹងក្នុងនោះយើងអាចសន្និដ្ឋានបានក្រៅផ្លូវការ គឺអាចមានជាឧក្រិដ្ឋជនខ្លះផង ថែមទាំងជនរងគ្រោះដែលរងការឆបោកនៃការជួញដូរមនុស្សនេះដែរ»។
ជាមួយគ្នានេះ លោក ខៀវ សុភ័គ អ្នកនាំពាក្យក្រសួងមហាផ្ទៃ បានឱ្យដឹងបន្ថែមដែរថា៖ «ក្នុងចំណោមហ្នឹង ការសន្និដ្ឋាន គឺជាការជួញដូរមនុស្សខុសច្បាប់ រត់ពន្ធមនុស្ស ដើម្បីមករកការងារធ្វើ»។ បើតាមលោក ខៀវ សុភ័គ គឺជនដែលត្រូវបានអាជ្ញាធរកម្ពុជាជួយសង្គ្រោះ គឺកម្ពុជាមិនអាចទទួលឱ្យស្នាក់នៅបានឡើយ ព្រោះមិនមានលិខិតស្នាមបញ្ជាក់។
គួរបញ្ជាក់ថា កាលពីថ្ងៃទី ២២ កញ្ញា មានករណីលិចទូកជនជាតិចិនមួយគ្រឿង នៅតំបន់កោះតាងក្នុងខេត្តព្រះសីហនុ។ ទូកមួយគ្រឿងមានជនជាតិចិនសរុបចំនួន ៤១ នាក់ បានឆ្លងដែនពីប្រទេសចិនចូលមកខេត្តព្រះសីហនុប្រទេសកម្ពុជា។ ជនជាតិចិនចំនួន ២៤ នាក់ត្រូវបានរកឃើញក្នុងដែនកម្ពុជា ខណៈជនជាតិចិន ១៧ នាក់ផ្សេងទៀត ត្រូវបានរកឃើញក្នុងភូមិសាស្ត្រកោះត្រល់ ប្រទេសវៀតណាម៕
