The Phnom Penh Post Search

Search form




Logo of Phnom Penh Post newspaper Phnom Penh Post - តុលាការ​កំពូលតម្កល់​ទោស កញ្ញា សេង ច័ន្ទធារី ឱ្យ​ជាប់​ពន្ធនាគារ​ ៦ ​ឆ្នាំ

តុលាការ​កំពូលតម្កល់​ទោស កញ្ញា សេង ច័ន្ទធារី ឱ្យ​ជាប់​ពន្ធនាគារ​ ៦ ​ឆ្នាំ

Content image - Phnom Penh Post
កញ្ញា សេង ច័ន្ទធារី ដែលត្រូវបានតុលាការ​កំពូលតម្កល់​ទោសឱ្យ​ជាប់​ពន្ធនាគារ​ ៦ ​ឆ្នាំ។ រូបថត ហ្វេសប៊ុក

តុលាការ​កំពូលតម្កល់​ទោស កញ្ញា សេង ច័ន្ទធារី ឱ្យ​ជាប់​ពន្ធនាគារ​ ៦ ​ឆ្នាំ

តុលាការ​កំពូល​នៅ​ថ្ងៃ​សុក្រ ទី​ ៣០ កញ្ញា ឆ្នាំ ​២០២២ បាន​សម្រេច​តម្កល់​ទោស​កញ្ញា សេង ច័ន្ទធារី ពលរដ្ឋ​ខ្មែរ​-​អាមេរិកាំង​ឱ្យ​ជាប់​ពន្ធនាគារ​ ៦​ ឆ្នាំ ដើម្បី​ឱ្យ​តុលាការ​ចាត់ការ​តាម​នីតិវិធី និង​រក្សា​សណ្តាប់ធ្នាប់​សង្គម​។ នេះ​បើតាម​ការអះអាង​របស់​លោក ជូង ជូងី មេធាវី​ការពារ​ក្តី​កញ្ញា សេង ច័ន្ទធារី ដែល​បាន​ចូល​ស្តាប់​ការសម្រេច​របស់​តុលាការ​កំពូល​នៅ​ថ្ងៃ​សុក្រ​នេះ​។

លោក ជូង ជូងី ចាត់ទុក​ការសម្រេច​របស់​តុលាការ​កំពូល​ពេល​នេះ ថា​ជា​រឿង​មិន​យុត្តិធម៌​។ លោក​មេធាវី ជូង ជូងី លើកឡើង​ថា​៖ «​ខ្ញុំ​យល់ឃើញ​ថា​មិន​យុត្តិធម៌​ សម្រាប់​កញ្ញា សេង ច័ន្ទធារី ទេ​»​។

ទោះបីជា​ការសម្រេច​របស់​តុលាការ​កំពូល​នៅតែ​តម្កល់​ទោស​ដដែល តែ​លោក ជូង ជូងី បញ្ជាក់​ថា លោក​នឹង​ទៅ​ជួប​កូនក្តី​របស់​ខ្លួន​នៅ​សប្តាហ៍​ក្រោយ ដើម្បី​ប្រាប់​ពី​ការសម្រេច​របស់​តុលាការ​កំពូល និង​ពិភាក្សា​ជា​បន្ត​ជាមួយ​កូនក្តី ដើម្បី​ស្វែងរក​ការការពារ​សិទ្ធិ​ជា​បន្តទៀត​។

សូមជម្រាប​ថា សាលាដំបូង​រាជធានី​ភ្នំពេញ​កាលពី​ថ្ងៃទី​ ១៤​ មិថុនា បាន​កាត់ទោស​ឱ្យ​កញ្ញា សេង ច័ន្ទធារី ជាប់​ពន្ធនាគារ​ព្រៃស​ចំនួន ​៦ ​ឆ្នាំ​ពី​បទ​រួមគំនិត​ក្បត់​ក្នុង​សំណុំ​រឿង​មាតុភូមិនិវត្តន៍​ ៩​ វិច្ឆិកា​ ២០១៩ ​របស់​លោក សម រង្ស៊ី ប្រធាន​ស្តីទី​នៃ​អតីត​គណបក្ស​សង្គ្រោះ​ជាតិ​។ ការសម្រេច​របស់​សាលា​ដំបូង​រាជធានី​ភ្នំពេញ​ត្រូវ​បាន​ប្តឹង​ជំទាស់​ដោយ​មេធាវី​លោក ជូង ជូងី ហើយ​សំណុំរឿង​ក៏​បញ្ជូន​បន្ត​ទៅ​សាលាឧទ្ធរណ៍​។

ក៏ប៉ុន្តែ​ការសម្រេច​របស់​សាលាឧទ្ធរណ៍​ក៏មិន​ខុស​អ្វី​ពី​សាលា​ដំបូង​រាជធានី​ភ្នំពេញ គឺ​តម្កល់​ទោស​កញ្ញា សេង ច័ន្ទ​ធា​រី ឱ្យ​ជាប់ពន្ធនាគារ​ចំនួន​៦​ឆ្នាំ​។ ភាពមិន​សុខចិត្ត​របស់​មេធាវី និង​ជនជាប់ចោទ​បាន​រុញ​រឿងនេះ​ដល់​តុលាការ​កំពូល​បើក​សវនាការ​នៅ​ថ្ងៃទី​ ៣០ ​កញ្ញា តែ​សេចក្តី​សម្រេច​ចុងក្រោយ​គឺ តុលាការ​កំពូល​បន្ត​តម្កល់​ទោស ដើម្បី​បន្ត​នីតិវិធី​តុលាការ​ទៅ​មុខទៀត​៕

អត្ថបទគួរចាប់អារម្មណ៍