.jpg)
ស្លាកសញ្ញាប្រាប់ពីទីតាំងត្រូវឈប់សម្រាកនៅលើផ្លូវល្បឿនលឿន ភ្នំពេញ-ព្រះសីហនុ។ រូបថត ក្រសួងសាធារណការ
ភ្នំពេញៈ ក្រសួងសាធារណការ និងដឹកជញ្ជូន នៅថ្ងៃទី ៣០ កញ្ញានេះ បានប្រកាសប្រាប់ពីលក្ខខណ្ឌគួរយល់ដឹងអំពី «ទីតាំងកន្លែងឈប់សម្រាក និងផ្តល់សេវាកម្ម» លើផ្លូវល្បឿនលឿន ភ្នំពេញ-ព្រះសីហនុ ខណៈផ្លូវរបស់ក្រុមហ៊ុនចិនមួយនេះ នឹងបើកឱ្យប្រើប្រាស់សាកល្បងដោយឥតគិតថ្លៃ ចាប់ពីថ្ងៃទី ១ ខែតុលាឆ្នាំ ២០២២ តទៅ។
ក្រសួងបានឱ្យដឹងថា លើផ្លូវល្បឿនលឿន ភ្នំពេញ-ព្រះសីហនុ មានកន្លែងឈប់សម្រាក និងផ្តល់សេវាកម្ម ចំនួន៤ទីតាំង នៅតាមបណ្តោយផ្លូវ ដែលទីតាំងនីមួយៗមានចំណតយានយន្ត ស្ថានីយប្រេងឥន្ធនៈ បន្ទប់ទឹក អាហារដ្ឋាន និងកន្លែងផ្តល់សេវាកម្មផ្សេងៗ។
ទីតាំងឈប់សម្រាកទាំង ៤ នោះរួមមានទីតាំងកំពង់ស្ពឺ (គ.ម ៤០) ទីតាំងកំពង់ស្ពឺខាងលិច (គ.ម ៦៣) ទីតាំងកំពង់សិលា (គ.ម ១០៩) និងទីតាំងព្រៃនប់ខាងលិច (គ.ម ១៥៦)។
ផ្លូវល្បឿនលឿនភ្នំពេញ-ក្រុងព្រះសីហនុ នឹងបើកឱ្យប្រើប្រាស់សាកល្បងដោយឥតគិតថ្លៃ ចាប់ពីថ្ងៃទី ០១ ដល់ថ្ងៃទី ៣១ ខែតុលា ឆ្នាំ ២០២២។
ជាមួយគ្នានេះ ក្រសួងសាធារណការ និងដឹកជញ្ជូន បានក្រើនរំឭកសូមឱ្យអ្នកប្រើប្រាស់ផ្លូវ «គោរពច្បាប់ចរាចរណ៍ និងបើកបរដោយការទទួលខុសត្រូវ»៕
