មណ្ឌលគិរីៈ រដ្ឋបាលខេត្តមណ្ឌលគិរីបានសម្រេចអនុញ្ញាតឱ្យដំណើរការឡើងវិញនូវច្រកទ្វារព្រំដែនទ្វេភាគីនៅក្នុងភូមិសាស្ត្រខេត្តមណ្ឌលគិរីនៅតាមបណ្តោយខ្សែបន្ទាត់ព្រំដែនជាមួយខេត្តដាក់ឡាក់ ខេត្តដាក់ណុង និងខេត្តប៊ិញភឿក ប្រទេសវៀតណាមចាប់ពីថ្ងៃទី ១ ខែតុលាតទៅ។
លិខិតរបស់លោកថង សាវុន ចុះថ្ងៃទី ៣០ ខែកញ្ញា ដែលបានជម្រាបជូន លោកប្រធានទីស្នាក់ការត្រួតពិនិត្យច្រកទ្វារព្រំដែនទ្វេភាគីឡាប៉ាខេ លោកប្រធានទីស្នាក់ការត្រួតពិនិត្យច្រកទ្វារព្រំដែនខេភាគីដាក់ដាំ និង លោកប្រធានទីស្នាក់ការត្រួតពិនិត្យច្រកទ្វារព្រំដែនទ្វេភាគីណាលៀបានឱ្យដឹងថា ចំពោះការអនុញ្ញាតឱ្យមានដំណើរការបើកច្រកទ្វារឡើងវិញនេះ ក៏ត្រូវអនុវត្តតាមការណែនាំរបស់រាជរដ្ឋាភិបាល និងក្រសួងសុខាភិបាល។
រដ្ឋបាលខេត្តនេះបានឱ្យដឹងទៀតថា ចំពោះអ្នកដំណើរចូលមិនតម្រូវឱ្យធ្វើតេស្ត PCR ៧២ ម៉ោង មុនចូលមកកម្ពុជា និងមិនតម្រូវឱ្យធ្វើតេស្ត រហ័សនៅព្រំដែន ពេលមកដល់កម្ពុជានោះទេ។ ដើម្បីជាការលើកទឹកចិត្តចំពោះអ្នកដំណើរចូល គួរគប្បីធ្វើតេស្តរហ័ស ដោយខ្លួនឯង និងភ្ជាប់មកជាមួយកាតវ៉ាក់សាំង ដើម្បីបង្ហាញជូនអាជ្ញាធរច្រកទ្វារ។ ចំពោះអ្នកដំណើរចេញត្រូវអនុវត្តតាមការណែនាំរបស់ភាគីវៀតណាម និងត្រូវដាក់ជាប់ជាមួយនូវកាតចាក់វ៉ាក់សាំងជំងឺកូវីដ ១៩ ផងដែរ។
លោកអភិបាលខេត្តមណ្ឌលគិរីបញ្ជាក់ក្នុងលិខិតថា៖ «ចំពោះអ្នកដំណើរដែលមិនបានចាក់ នៅពេលចូលមកកម្ពុជា ត្រូវធ្វើចត្តាឡីស័កចំនួន ១៤ ថ្ងៃ តាមការណែនាំរបស់ក្រសួងសុខាភិបាល។ ដោយឡែក សម្រាប់អ្នកដំណើរចេញ ត្រូវអនុវត្តការធ្វើចត្តាឡីស័ក តាមការណែនាំ និងការកំណត់របស់ភាគីវៀតណាម ផងដែរ»។
លោក ថង សាវុន បញ្ជាក់បន្ថែមថា ដើម្បីឱ្យដំណើរការនៃការបើកច្រកទ្វារឡើងវិញមានភាពរលូន និងជាការជួយសម្រួលដល់ការធ្វើដំណើរចេញ-ចូល របស់ប្រជាពលរដ្ឋ និងការធ្វើចរាចរទំនិញឆ្លងកាត់ព្រំដែនទៅវិញទៅមក រដ្ឋបាលខេត្ត សូមស្នើលោកប្រធានទីស្នាក់ការត្រួតពិនិត្យច្រកទ្វារព្រំដែនទ្វេភាគីទាំង ៣ ជួបប្រជុំធ្វើការងារជាមួយច្រកទ្វារភាគីវៀតណាម ធ្វើការផ្សព្វផ្សាយឱ្យបានទូលំទូលាយជូនដល់ប្រជាពលរដ្ឋ ក្រុមហ៊ុន សហគ្រាស បានជ្រាប និងសហការជាមួយកងកម្លាំងមានសមត្ថកិច្ចពាក់ព័ន្ធទាំងអស់ក្នុងការគ្រប់គ្រង និងសម្របសម្រួលសកម្មភាពនៅតាមបណ្តាច្រកទ្វារព្រំដែន ទ្វេភាគីទាំងអស់ ដើម្បីធានាបាននូវការធ្វើដំណើរ និងការដោះដូរទំនិញឆ្លងកាត់ព្រំដែនមានភាពល្អប្រសើរ ៕