ព្រះសីហនុៈ លោក សុខ ផល រដ្ឋលេខាធិការក្រសួងមហាផ្ទៃ គូសបញ្ជាក់ថា នឹងបន្តបោសសម្អាតកន្លែងល្បែងខុសច្បាប់នៅខេត្តព្រះសីហនុ និងខេត្តផ្សេងៗទៀតឱ្យអស់ខណៈរយៈពេល ៨ ថ្ងៃកន្លងមកនេះ មានទីតាំងល្បែងខុសច្បាប់ជាច្រើនបានយល់ព្រមឈប់ដោយខ្លួនឯង។
លោក សុខ ផល រដ្ឋលេខាធិការក្រសួងមហាផ្ទៃ និង ជាប្រធានក្រុមការងារបង្ក្រាបការលេងល្បែងស៊ីសងខុសច្បាប់គ្រប់ប្រភេទ បានលើកឡើងបែបនេះក្នុងកិច្ចប្រជុំគណៈបញ្ជាការឯកភាពខេត្តព្រះសីហនុ ស្តីពី បង្ក្រាបការលេងល្បែងស៊ីសងខុសច្បាប់គ្រប់ប្រភេទនៅក្នុងខេត្តនេះ។
លោកថ្លែងថា៖«ទីតាំងនៅមូលដ្ឋានភូមិ ឃុំ ស្រុក តាមពិតអាជ្ញាធរមូលដ្ឋានបានបោសសម្អាតច្រើនហើយ បើនៅសេសសល់ គឺតិចតួច។ អាជ្ញាធរបែងចែកភារកិច្ចរបស់ក្រសួងមហាផ្ទៃ បន្តបោសសម្អាតនៅក្នុងភូមិសាស្ត្រខេត្តព្រះសីហនុ ក៏ដូចបណ្តាខេត្តផ្សេងៗទៀតផងដែរ»។
លោកបញ្ជាក់ទៀតថា៖ «ចំពោះទីតាំងផ្សេងទៀតដែលមានការសង្ស័យមានការបើកល្បែងខុសច្បាប់ ស្ថិតនៅលើអាជ្ញាបណ្ណរបស់ក្រសួងហិរញ្ញវត្ថុ យើងនឹងទុកពេលពិនិត្យជាក្រោយ សំដៅពិនិត្យលើអាជ្ញាប័ណ្ណដែលមានប្រសិទ្ធភាព ឬអស់សុពលភាពអាជ្ញាប័ណ្ណ យើងអត់ទាន់ចុះត្រួតពិនិត្យទុកពេលក្រោយ»។
ក្នុងកិច្ចប្រជុំនោះ លោក សុខ ផល បានរំឭកពីបទបញ្ជាលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងការចុះអនុវត្តកិច្ចការបញ្ឈប់សកម្មភាពល្បែងស៊ីសងអត់មានច្បាប់ និងស្វែងរកបទល្មើសបើសិនជាមាននៅទីតាំងក្នុងភូមិសាស្ត្រខេត្តព្រះសីហនុនេះមានដូចជា បទល្មើសជួញដូរមនុស្ស បទល្មើសសម្អាតប្រាក់ ល្បែងស៊ីសងខុសច្បាប់ជាដើម។
រដ្ឋបាលខេត្តព្រះសីហនុបានឱ្យដឹងថា ក្រោយទទួលបានបទបញ្ជាពីប្រមុខរាជរដ្ឋាភិបាល និង រដ្ឋមន្ត្រីក្រសួងមហាផ្ទៃ ក្រុមការងារក្រសួងមហាផ្ទៃ សហការជាមួយអាជ្ញាធរខេត្តព្រះសីហនុ ចុះបង្ក្រាបទីតាំងល្បែងខុសច្បាប់ចំនួន ៥ កន្លែង នៅក្នុងក្រុងព្រះសីហនុ និងបានរកឃើញជនបរទេសចម្រុះជាតិសាសន៍ផងដែរ៕