.jpg)
មន្ត្រីក្រសួងការងារចូលរួមកិច្ចប្រជុំគណៈកម្មាធិការសម្របសម្រួលនៃបណ្ដាញសុវត្ថិភាព និងសុខភាពការងារអាស៊ានតាមប្រព័ន្ធអនឡាញ។ រូបថត ក្រសួងការងារ
ភ្នំពេញៈ កិច្ចប្រជុំគណៈកម្មាធិការសម្របសម្រួលនៃបណ្ដាញសុវត្ថិភាព និងសុខភាពការងារអាស៊ានលើកទី២៣ សន្និសីទអាស៊ានអូស្ហណេតលើកទី៩ និងពិធីផ្ដល់ពានរង្វាន់អាស៊ានលើកទី៤ ដោយមានការចូលរួមពីតំណាង ASEAN-OSHNET នៃប្រទេសដែលជាសមាជិកអាស៊ានទាំង ១០ អគ្គលេខាធិការអាស៊ាន និងអគ្គលេខាធិការ ASEAN-OSHNET ប្រចាំប្រទេសថៃ បានឯកភាពគ្នា លើគម្រោងដែលកំពុងរៀបចំពាក់ព័ន្ធនឹងសុវត្ថិភាព និងសុខភាពការងារ។
កិច្ចប្រជុំដែលរៀបចំដោយប្រទេសមីយ៉ាន់ម៉ា ធ្វើឡើងតាមរយៈប្រព័ន្ធអនឡាញចាប់ពីថ្ងៃទី ២៩-៣០ កញ្ញានេះ មានគោលបំណងចែករំលែក បទពិសោធ ព័ត៌មាន សមិទ្ធផលសម្រេចបាន និងបញ្ហាប្រឈមនានាក្នុងការអនុវត្តការងារផ្នែកសុវត្ថិភាព និងសុខភាពការងារនៅកន្លែងធ្វើការនាពេលកន្លងមក នៅក្នុងបណ្ដាប្រទេសអាស៊ាន។
លោក ឡេង តុង ទីប្រឹក្សាអមក្រសួង និងជាប្រធាននាយកដ្ឋានពេទ្យការងារ បានដឹកនាំថ្នាក់ដឹកនាំ និងមន្ត្រីរាជការនៃនាយកដ្ឋានពេទ្យការងារ ចូលរួមកិច្ចប្រជុំនេះ។
អង្គប្រជុំនេះ បានសម្រេចឯកភាពលើគម្រោងសកម្មភាពដែលបណ្ដាប្រទេសជាសមាជិកនៃ ASEAN-OSHNET កំពុងរៀបចំពាក់ព័ន្ធនឹងសុវត្ថិភាព និងសុខភាពការងារ។
បើតាមក្រសួងការងារ ចំពោះប្រទេសកម្ពុជា នឹងត្រូវធ្វើជាម្ចាស់ផ្ទះក្នុងការរៀបចំសិក្ខាសាលា និងចងក្រងឯកសារស្ដីពីការអនុវត្តល្អផ្នែកសុវត្ថិភាព និងសុខភាពការងារ នៅសហគ្រាសធុនតូចនិងមធ្យម និងកន្លែងធ្វើការក្នុងសេដ្ឋកិច្ចក្រៅប្រព័ន្ធ នៅក្នុងបណ្ដាប្រទេសអាស៊ាន ដែលនឹងប្រព្រឹត្តទៅនៅថ្ងៃទី ១៧-១៨ ខែតុលា ឆ្នាំ ២០២២ នៅខេត្តសៀមរាប និងកិច្ចប្រជុំអធិការការងារផ្នែកសុវត្ថិភាព និងសុខភាពការងារនៅកន្លែងធ្វើការ ដែលនឹងប្រព្រឹត្តទៅនាថ្ងៃទី ០៧ ខែធ្នូ ឆ្នាំ ២០២២។
ក្នុងនោះដែរ ប្រទេសកម្ពុជា បានទទួលពានរង្វាន់អាស៊ានអូស្ហណេត (ASEAN-OSHNET Awards) ចំនួន ២ សហគ្រាស រោងចក្រ គឺក្រុមហ៊ុនអូលីវអឹបភឺរៀល Olive Apparel (Cambodia) Co.,Ltd និងក្រុមហ៊ុនរោងចក្រកាត់ដេរម៉ាវែល Marvel Garment C., Ltd៕
