.jpg)
របាយការណ៍សិក្សាស្រាវជ្រាវមួយបានរកឃើញថា ១១% នៃកុមារដែលប្រើអ៊ីនធឺណិត មអាយុចន្លោះពី ១២-១៧ ឆ្នាំ ត្រូវបានរាយការណ៍ថា ជួបប្រទះដោយសារការកេងប្រវ័ញ្ចផ្លូវភេទតាមរយៈអនឡាញ។
យោងតាមសេចក្ដីប្រកាសព័ត៌មានចុះថ្ងៃទី ៣០ ខែកញ្ញា ឆ្នាំ ២០២២ របស់ក្រុមប្រឹក្សាជាតិកម្ពុជាដើម្បីកុមារ បង្ហាញពីការផ្សព្វផ្សាយរបាយការណ៍សិក្សាស្រាវជ្រាវ ស្ដីពីការបញ្ឈប់គ្រោះថ្នាក់នៅកម្ពុជា ដោយបង្ហាញភ័ស្តុតាងអំពីការកេងប្រវ័ញ្ច និងរំលោភបំពានផ្លូវភេទកុមារតាមរយៈអនឡាញ។
ជុំវិញរឿងនេះ លោកស្រី ស៊ន សាបោន អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ បានលើកឡើងថា ការកេងប្រវ័ញ្ចផ្លូវភេទលើកុមារតាមរយៈអនឡាញ គឺជាបញ្ហាសកលដែលកើតឡើងក្នុងទម្រង់ផ្សេងៗគ្នា និងបានក្លាយជាក្ដីបារម្ភមួយទៀត ដែលទាមទារឱ្យភាគីពាក់ព័ន្ធ មានអាណាព្យាបាលកុមារ សង្គមស៊ីវិល និងអាជ្ញាធរ ចាំបាច់ធ្វើការរួមគ្នាដើម្បីទប់ស្កាត់ និងការពារកុមារពីការរំលោភបំពានតាមប្រព័ន្ធអនឡាញ។
លោកស្រី ស៊ន សាបោនថា៖ «កុមាររងគ្រោះពីការកេងប្រវ័ញ្ចផ្លូវភេទ បានបន្សល់នូវផលប៉ះពាល់ធ្ងន់ធ្ងរទាំងផ្លូវកាយ និងផ្លូវចិត្ត។ កុមាររងគ្រោះភាគច្រើន មានអារម្មណ៍ពិបាកទុកចិត្តអ្នកដទៃ អស់សង្ឃឹម ពិបាកចិត្ត ឯកា ច្របូកច្របល់ ខកចិត្ត ស្ដីបន្ទោសខ្លួនឯង និងឆាប់ភ័យខ្លាចជាដើម»។
រីឯ លោកស្រី ខៀវ បូរី រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងថា ប្រទេសកម្ពុជា ជាប្រទេសដែលបោះជំហានទៅមុខ ក្នុងការចូលរួមចំណែកធ្វើឱ្យកាន់តែប្រសើរឡើងសម្រាប់ការលើកកម្ពស់កិច្ចការពារកុមារ និងឧត្តមប្រយោជន៍របស់កុមារ។
លោកស្រី ខៀវ បូរីថ្លែងថា៖ «ការចំណាយពេលតាមប្រព័ន្ធអនឡាញ នាំមកនូវហានិភ័យ និងការគំរាមកំហែងពាក់ព័ន្ធនឹងគ្រោះថ្នាក់ដែលមិនអាចទទួលយកបាន ដោយចៀសមិនផុត ក្នុងនោះក៏មានហានិភ័យ និងការគំរាមកំហែង មួយចំនួនដែលកុមារបាននិងកំពុងជួបប្រទះនៅក្នុងកន្លែងដទៃទៀតផងដែរ ហើយហានិភ័យ និងការគំរាមកំហែងមួយចំនួនមានលក្ខណៈដោយឡែកចំពោះតែបរិបទអនឡាញប៉ុណ្ណោះ»។
ទាក់ទងរឿងនេះ ប្រធានអង្គការយូនីសេហ្វប្រចាំកម្ពុជា គឺលោកស្រី ហ្វ៊ូរូ ហ្វ៊ូយ៉ូហ្សាត បានលើកឡើងថា ការរកឃើញបានបង្ហាញយ៉ាងច្បាស់ពីទំហំនៃហានិភ័យដែលកុមារប្រឈមមុខនៅលើអនឡាញ នៅក្នុងប្រភពឌីជីថលដែលចេះតែកើនឡើង ដោយ១១%នៃកុមារដែលប្រើអ៊ីនធឺណិត មានអាយុចន្លោះពី ១២-១៧ ឆ្នាំ ត្រូវបានរាយការណ៍ថា ជួបប្រទះដោយសារការកេងប្រវ័ញ្ចផ្លូវភេទតាមរយៈអនឡាញ។
សូមបញ្ជាក់ថា ១៦% នៃកុមារ ត្រូវបានទទួលរងការបញ្ចេញមតិទាក់ទងនឹងផ្លូវភេទរបស់ពួកគេ ដែលកើតឡើងជាចម្បង នៅលើប្រព័ន្ធផ្សព្វផ្សាយសង្គម (Social Media) ១៦% ទៀតនៃកុមារត្រូវបានផ្ញើសាររូបភាពផ្លូវភេទ និង ៩% នៃកុមារទទួលបានការស្នើសុំចែករំលែករូបភាពផ្លូវភេទរបស់កុមារទាំងនោះ។ នេះបើតាមការបញ្ជាក់របស់ប្រធានអង្គការយូនីសេហ្វប្រចាំកម្ពុជា៕
