សៀមរាបៈ លោកនាយករដ្ឋមន្ត្រី ហ៊ុន សែន ប្រកាសជំហរមិនគាំទ្រការធ្វើប្រជាមតិរបស់រុស្ស៊ី ដើម្បីកាត់យកទឹកដីអ៊ុយក្រែនបញ្ចូលទៅប្រទេសរុស្ស៊ី។
លោក ហ៊ុន សែន បញ្ជាក់ថា៖ «ខ្ញុំធ្លាប់បានប្រកាសហើយ ថាយើងអត់គាំទ្រទេ ហើយយើងប្រឆាំងជាមួយនឹងការបង្កើតរដ្ឋ ផ្តាច់រដ្ឋ ផ្តាច់ទឹកដី ហើយនឹងការប្រើប្រាស់កម្លាំង ឬគំរាមប្រើប្រាស់កម្លាំង»។
លោកថ្លែងដូច្នេះក្នុងពិធីសំណេះសំណាលជាមួយប្រជាពលរដ្ឋដែលបានចាប់ឆ្នោតស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា ទៅរស់នៅក្នុងភូមិធម្មជាតិរុនតាឯក ស្ថិតក្នុងស្រុកបន្ទាយស្រី ខេត្តសៀមរាប ចំនួនជិត ៣ ០០០ គ្រួសារ នាថ្ងៃទី ១ ខែតុលា។
លោក ហ៊ុន សែន បន្ថែមថា ប្រសិនបើសេចក្តីសម្រេចដែលព្រាងដោយអាមេរិក និងអាល់បានី ដាក់ឆ្លងទៅក្រុមប្រឹក្សាសន្តិសុខអង្គការសហប្រជាជាតិមិនបានទេនោះ គឺវាច្បាស់ជាដាក់ឆ្លងទៅកាន់មហាសន្និបាតអង្គការសហប្រជាជាតិ។
លោកបញ្ជាក់ថា៖ «បើទៅមហាសន្និបាតអង្គការសហប្រជាជាតិ ត្រូវតែកម្ពុជាអត់មានជម្រើសណាផ្សេង ព្រោះយើងគិតមើល បើគេសុខៗ ស្រាប់តែលើកទ័ពមកដាក់ខេត្តសៀមរាប រួចធ្វើប្រជាមតិ ដើម្បីថាសៀមរាបផ្តាច់ខ្លួនទៅជារដ្ឋឯករាជ្យមួយ តើយើងទទួលយកបានអត់? យើងពិតជាទទួលមិនបានទេអាហ្នឹង»។
លោក ហ៊ុន សែន បានលើកឡើងករណីដូចគ្នាថា សូម្បីតែនៅអឺរ៉ុប កូសូវ៉ូ (Kosovo) ដែលបង្កើតឡើងដោយណាតូ និងខាងអឺរ៉ុប ក៏មកដល់ម៉ោងនេះ កម្ពុជាមិនទទួលស្គាល់ផងដែរ៕