មនុស្សវ័យចាស់នៅក្នុងប្រទេសកម្ពុជាបានស្នើសុំឱ្យក្រសួងសង្គមកិច្ចជួយបំពេញតម្រូវការ ៣ ចំណុចដូចជា ការផ្ដល់ប្រាក់ឧបត្ថម្ភ ការផ្ដល់ប័ណ្ណសមធម៌ និងផ្ដល់ប្រាក់មូលនិធិ ជួយគាំទ្រសមាគមមនុស្សចាស់នៅតាមមូលដ្ឋាន។
យោងតាមសេចក្ដីប្រកាសព័ត៌មានរបស់អង្គការមនុស្សចាស់កម្ពុជាចុះថ្ងៃទី ៣០ ខែកញ្ញា ឆ្នាំ ២០២២ ស្ដីពីការប្រារព្ធ និងអបអរទិវាមនុស្សចាស់កម្ពុជា និងទិវាមនុស្សចាស់អន្តរជាតិ ដែលធ្វើឡើងនៅថ្ងៃទី ១ ខែតុលា ឆ្នាំ ២០២២ នេះ ស្របតាមគោលនយោបាយជាតិស្ដីពីមនុស្សចាស់នៃព្រះរាជាណាចក្រកម្ពុជា ២០១៧-២០៣០។
សេចក្ដីប្រកាសព័ត៌មានបន្តថា ទិវាមនុស្សចាស់គឺប្រារព្វឡើងក្នុងគោលបំណងលើកកម្ពស់កិច្ចគាំពារដ៏មានប្រសិទ្ធភាព សំដៅលើកស្ទួយសុខុមាលភាពរបស់មនុស្សចាស់ឱ្យកាន់តែប្រសើរឡើង។
ក្នុងទិវានេះ រាជរដ្ឋាភិបាលកម្ពុជាបានចេញលិខិតអបអរទិវាមនុស្សចាស់ ហើយក៏បានអំពាវនាវដល់ស្ថាប័នពាក់ព័ន្ធ រួមមាន ក្រសួងសង្គមកិច្ច អតីតយុទ្ធជន និងយុវនីតិសម្បទា និងគណៈកម្មាធិការជាតិ ដើម្បីមនុស្សចាស់ បង្កើនការយកចិត្តទុកដាក់ និងគាំទ្រមធ្យោបាយ ដើម្បីលើកស្ទួយសុខុមាលភាពរបស់មនុស្សចាស់។
ជុំវិញរឿងនេះ លោក តូច ចាន់នី អគ្គនាយកនៃអគ្គនាយកដ្ឋានសេវាសង្គមបានប្រាប់ថាការស្នើសុំទាំង ៣ ចំណុច ដែលជាតម្រូវការរបស់មនុស្សចាស់ គឺខាងក្រសួងកំពុងអនុវត្តជាបណ្ដើរៗហើយ។ ក្នុងនោះមនុស្សចាស់បានស្នើសុំប្រាក់ឧបត្ថម្ភ ការផ្ដល់ប័ណ្ណសមធម៌ និងការផ្ដល់មូនិធិគាំទ្រសមាគមមនុស្សចាស់។
លោក តូច ចាន់នី ថា៖ «ឥឡូវនេះ ប្រាក់ឧបត្ថម្ភមនុស្សចាស់ គឺយើងកំពុងធ្វើបណ្ដើរៗ ចឹងមនុស្សវ័យចាស់ចាប់ពី ៦០ ឆ្នាំទៅ ដែលមានជីវភាពក្រីក្រ គឺយើងបានផ្ដល់ប័ណ្ណក្រីក្រជូនគាត់ហើយ។ តាមតែខ្ញុំដឹង មនុស្សចាស់ជាង ៣០ ម៉ឺននាក់ ដែលបានទទួលសាច់ប្រាក់ពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ ហើយយើងកំពុងធ្វើបន្តៗទៀត»។
លោកបន្ថែមថា កន្លងមកនេះ សមាគមមនុស្សចាស់តាមឃុំ-សង្កាត់ មានជាង ៤ ពាន់ឃុំសង្កាត់ ត្រូវបានរដ្ឋាភិបាលផ្ដល់ប្រាក់ឧបត្ថម្ភ និងការគាំទ្ររួចហើយ។
ចំណែកនាយកប្រតិបត្តិអង្គការមនុស្សចាស់កម្ពុជា គឺលោក ទុំ វីរ៉ា បានប្រាប់ថា គោលបំណងក្នុងការប្រារព្ធទិវាមនុស្សចាស់នេះ គឺដើម្បីបង្ហាញពីបញ្ហាប្រឈម តម្រូវការរបស់មនុស្សចាស់ និងឱ្យពិភពលោកបានដឹងពីគុណតម្លៃ ដែលមនុស្សចាស់បានចូលរួមចំណែកយ៉ាងច្រើនក្នុងសង្គម។
លោកលើកឡើងពីតម្រូវការរបស់មនុស្សចាស់ដែលស្នើកន្លងមក ហើយជាក់ស្ដែងនៅក្នុង ៣ ចំណុចនោះ រាជរដ្ឋាភិបាលអាចនឹងធ្វើទៅបានតាមអ្វីដែលជាបទពិសោធនៃការធ្វើកិច្ចសហប្រតិបត្តិការនៅក្នុងរូបភាពទាំងជាបច្ចេកទេស និងទាំងធនធាន។
លោក ទុំ វីរ៉ា ថា៖ «ជារួម អ្វីទាំងអស់ហ្នឹង រាជរដ្ឋាភិបាលគួរតែផ្ដល់ជូន ឬក៏ពិចារណា ហើយយ៉ាងហោចណាស់ចំណុចទាំងអស់នោះ ក៏គួរតែអាចផ្ដល់ជូនណាមួយ ក្នុងចំណោមបីចំណុច ពីព្រោះចំណុចទាំង ៣ នេះ សុទ្ធតែជាតម្រូវការសំខាន់ៗរបស់មនុស្សចាស់»។
លោកបន្តថា៖ «ខ្ញុំសង្ឃឹមថារាជរដ្ឋាភិបាលនឹងមានជាការឆ្លើយតប នៅក្នុងកម្រិតណាមួយ ទោះបីជាតិច ឬច្រើន ឬមួយក៏មិនបានក្ដី ឬបានក្ដី នៅក្នុងទម្រង់មួយដែលមនុស្សចាស់ គាត់អាចយល់ផងដែរ ជៀសជាងខ្លឹមសារដែលបានចែកចាយជាសាធារណៈទៅ គឺវាមិនមានការឆ្លើយតប ជាពិសេសស្ថាប័នដែលទទួលខុសត្រូវនីមួយៗ»។
កន្លងមក មានតំណាងសមាគមមនុស្សចាស់ចំនួនជិត ២០០ នាក់ មកពី ២៥ រាជធានី-ខេត្ត បានមកជួបជុំគ្នានៅក្នុងវេទិកាមនុស្សវ័យចាស់ថ្នាក់ជាតិលើកទី ២ ដែលប្រព្រឹត្តទៅថ្ងៃទី ១៣-១៤ ខែកញ្ញា ឆ្នាំ ២០២២ នៅក្នុងខេត្តបាត់ដំបង ដោយស្នើសុំ ៣ ចំណុច ដែលចំណុចទី ១ នោះគឺ៖ ការផ្ដល់ប្រាក់ឧបត្ថម្ភសម្រាប់មនុស្សចាស់គ្រប់ៗគ្នា ទី ២៖ ការផ្ដល់ប័ណ្ណសមធម៌សម្រាប់មនុស្សចាស់ទូទៅ និងទី ៣៖ ផ្ដល់មូលនិធិឃុំ-សង្កាត់ ដើម្បីជួយគាំទ្រដល់សមាគមមនុស្សចាស់តាមមូលដ្ឋាន។
សូមបញ្ជាក់ថា នៅដើមឆ្នាំ ២០២១ របាយការណ៍ស្រាវជ្រាវរបស់វិទ្យាស្ថានជាតិសង្គមកិច្ចបានឱ្យដឹងថាមនុស្សវ័យចាស់ប្រមាណ ៥៥% បានរងផលប៉ះពាល់ផ្នែកប្រាក់ចំណូល ដោយសារមិនទាន់បំពេញតម្រូវការមូលដ្ឋានរបស់ពួកគាត់ក្នុងការរស់នៅ។ ចំណែកនៅសល់ ៤៥% ទៀត ទទួលបានការឧបត្ថម្ភសាច់ប្រាក់ពីរាជរដ្ឋាភិបាល ក្នុងអំឡុងពេលនៃការរីករាលដាលជំងឺកូវីដ ១៩៕