.jpg)
លោក អ៊ុន ចាន់ដា អភិបាលខេត្តកំពង់ចាម។ រូបភាព មន្ទីរព័ត៌មានខេត្តកំពង់ចាម
កំពង់ចាមៈ ខេត្តកំពង់ចាមនឹងរៀបចំការប្រណាំងទូក ង ទ្រង់ទ្រាយធំ និងតាំងពិព័រណ៍ភូមិមួយផលិតផលមួយ ដើម្បីចូលរួមអបអរពិធីបុណ្យចេញព្រះវស្សា ឬពិធីបុណ្យ អុំទូក អកអំបុក សំពះព្រះខែនាពេលខាងមុខនេះ។
បើតាមរបាយការណ៍បណ្តោះអាសន្នមានទូក ង ចំនួនប្រមាណ ៤០ ទូកគ្រោងនឹងចូលរួមប្រណាំង នៅថ្ងៃទី ១០ ខែតុលា។
គេហទំព័រមន្ទីរព័ត៌មានខេត្តកំពង់ចាមដកស្រង់សម្ដី លោក អ៊ុន ចាន់ដា អភិបាលខេត្តកំពង់ចាម ថ្លែងថា៖ «ពិធីនេះនឹងប្រព្រឹត្តទៅនៅថ្ងៃទី ១០ ខែតុលា នៅមាត់ទន្លេមេគង្គ ក្រុងកំពង់ចាម។ ការរៀបចំពិធីខាងលើនេះ ដើម្បីបង្កលក្ខណៈឱ្យបងប្អូនប្រជាពលរដ្ឋនៅក្នុងខេត្ត និងក្រៅខេត្តបានមកទស្សនាលេងកម្សាន្ត»។
លោកថ្លែងក្នុងកិច្ចប្រជុំគណៈកម្មការរៀបចំប្រារព្ធពិធីប្រណាំងទូក ង ទ្រង់ទ្រាយធំ និងការដាក់តាំងពិព័រណ៍ស្តីពី «ភូមិមួយផលិតផលមួយ» នាថ្ងៃទី ៣០ ខែកញ្ញា ថា ក្រៅពីនោះ ក៏មានការរៀបចំកម្មវិធីប្រគំតន្ត្រីសប្បាយៗជាច្រើនប្រភេទទៀត ដើម្បីបង្កើនភាពសប្បាយជូនដល់ប្រជាពលរដ្ឋ និងបង្កើនការទាក់ទាញភ្ញៀវទេសចរជាតិ និងអន្តរជាតិចូលមកកម្សាន្តផងដែរ។
អភិបាលខេត្តរូបនេះបានស្នើដល់គណៈកម្មការរៀបចំពិធីប្រណាំងទូកខេត្តពង្រឹងការហ្វឹកហាត់ដល់កីឡាករ ដោយត្រូវធានាថា កីឡាករអុំទូកមានគ្រប់ចំនួន គោរពវិន័យបទបញ្ជាផ្ទៃក្នុងក្នុងការប្រកួត និងមានសេចក្តីថ្លៃថ្នូរ។
លោកបានជំរុញឱ្យមានការតុបតែងទូកឱ្យមានសោភ័ណភាព ហើយកីឡាករ កីឡាការិនីក៏ត្រូវមានឯកសណ្ឋានសមរម្យផងដែរ។
លោក អ៊ុន ចាន់ដា បានជំរុញដល់អាជ្ញាធរ និងកងកម្លាំងសមត្ថកិច្ចគ្រប់លំដាប់ថ្នាក់ទាំងអស់ត្រូវបង្កើនការខិតខំយកចិត្តទុកដាក់បន្តទៀតលើការរក្សាសន្តិសុខ សណ្តាប់ធ្នាប់ក្នុងពិធីប្រណាំងទូកក្នុងក្រុងកំពង់ចាម។
លោកបានជំរុញដល់ការសម្អាតអនាម័យបរិស្ថាន និងតុបតែងលម្អឱ្យបានសមរម្យ ដើម្បីធ្វើយ៉ាងណាបង្កើតបរិយាកាសសប្បាយរីករាយជូនប្រជាពលរដ្ឋ។
គេហទំព័រដដែលបញ្ជាក់ថា៖ «បើយោងតាមរបាយការណ៍បណ្ដោះអាសន្នពីគណៈកម្មការបានបញ្ជាក់ថា ក្នុងពិធីនេះ មានទូកចូលរួមប្រណាំង ចំនួន ៤០ ទូក» ៕
