.jpg)
ផ្លូវល្បឿនលឿនភ្នំពេញ-ព្រះសីហនុ ត្រូវបានដាក់ឱ្យប្រជាពលរដ្ឋធ្វើដំណើរសាកល្បងនៅថ្ងៃទី ១ តុលានេះ។ រូបភាព មន្ទីរសាធារណការ និងដឹកជញ្ជូនរាជធានីភ្នំពេញ
ផ្លូវល្បឿនលឿនភ្នំពេញ-ព្រះសីហនុ ត្រូវបានដាក់ឱ្យប្រជាពលរដ្ឋធ្វើដំណើរសាកល្បងនៅថ្ងៃទី ១ តុលានេះ ក្នុងរយៈពេលមួយខែ ដោយមិនគិតថ្លៃ។ ក៏ប៉ុន្តែយ៉ាងណានៅថ្ងៃដំបូង មានបញ្ហាមួយចំនួនដែលក្រសួងសាធារណការ និងដឹកជញ្ជូនបានកត់សម្គាល់នោះ គឺមានអ្នកបើកបរខ្លះបើកហួសល្បឿនកំណត់ ខ្លះបើកបរបញ្ច្រាសទិស និងខ្លះបានប្រើប្រាស់មធ្យោបាយទោចក្រយានយន្តកម្លាំងក្រោម៥០០cc ធ្វើដំណើរ។
លោក ហ៊ាង សុធាយុត្តិ អ្នកនាំពាក្យក្រសួងសាធារណការ និងដឹកជញ្ជូន កត់សម្គាល់ថា នៅមានប្រជាពលរដ្ឋមួយចំនួន បើកបរលើសល្បឿនកំណត់ ព្រោះផ្លូវល្បឿនលឿនភ្នំពេញ-ព្រះសីហនុ មានសភាពល្អ ធំទូលាយ។ លោកថា៖ «មានប្រជាពលរដ្ឋមួយចំនួនតូច គឺមានការថតក្នុងបណ្តាញសង្គម បង្ហាញពីកុងទ័រល្បឿនរបស់ខ្លួន ថាខ្លួនបើកបាននៅប៉ុណ្ណេះៗ។ ក៏ប៉ុន្តែកិច្ចការងារនេះ អ្វីដែលគាត់អនុវត្តខុសពីវិធានការច្បាប់នេះ នឹងត្រូវប្រឈមនឹងនគរបាលជំនាញ ហើយនគរបាលជំនាញ ក៏បានធ្វើការណែនាំខ្លះ គឺការអនុវត្តមានភាពទន់ភ្លន់ ក៏ត្រូវការដែរពីម្ចាស់ខ្លួនឯងជាអ្នកបើកបរ ត្រូវគោរពឱ្យបានច្បាស់ស្តីពីចរាចរណ៍ផ្លូវគោក គោរពនូវក្រមសីលធម៌»។
ក្រៅពីនេះ ក៏មានផងដែរ ករណីម៉ូតូកម្លាំងតូចៗ មិនត្រូវបានអនុញ្ញាតឱ្យបើកនៅលើផ្លូវល្បឿនលឿន។ នេះបើតាមលោក ហ៊ាង សុធាយុត្តិ។
យ៉ាងណាមិញ អ្នកនាំពាក្យក្រសួងសាធារណការ និងដឹកជញ្ជូនរូបនេះបានឱ្យដឹងថា មួយព្រឹកនៃការបើកដំណើរការសាកល្បង មានប្រជាពលរដ្ឋមួយចំនួនធំ បានគោរពទៅតាមការណែនាំក្នុងការប្រើប្រាស់ផ្លូវល្បឿនលឿន ខណៈដែលចរាចរណ៍មានសភាពមមាញឹក តែក៏មិននាំឱ្យការកកស្ទះនោះដែរ។
លោក គឹម បញ្ញា នាយកប្រចាំប្រទេសនៃអង្គការមូលនិធិបង្ការរបួសអាស៊ី យល់ឃើញថា៖ «ការបំពានរបស់អ្នកបើកបរមួយចំនួនអំឡុងពេលធ្វើដំណើរលើផ្លូវល្បឿនលឿននេះ អាចមកពីកត្តាបីយ៉ាង។ ទី ១ គឺដោយសារតែអ្នកបើកបរមិនទាន់យល់ដឹងពីគោលការណ៍ប្រើប្រាស់ផ្លូវល្បឿនលឿន។ ទី ២ គឺអាចមកពីទម្លាប់របស់អ្នកបើកបរ។ និងទី ៣ អាចមកពីអារម្មណ៍រីករាយរបស់អ្នកបើកបរ ដែលចង់ថតរូបនៅតាមដងផ្លូវល្បឿនលឿនជាដើម»។ សម្រាប់លោក គឹម បញ្ញា ទាំងនេះ គឺជាបញ្ហាដែលក្រសួងសាធារណការ និងនគរបាលត្រូវពង្រឹងការផ្សព្វផ្សាយអប់រំ ដើម្បីបញ្ចៀសកុំឱ្យគ្រោះថ្នាក់កើតឡើងនៅលើផ្លូវល្បឿនលឿនភ្នំពេញ-ព្រះសីហនុ។
ជាមួយគ្នានេះ អ្នកជំនាញផ្នែកចរាចរណ៍រូបនេះ ផ្ដល់ជាយោបល់ខ្លះ ដើម្បីបញ្ចៀសកុំឱ្យគ្រោះថ្នាក់ជាយថាហេតុកើតឡើង ដោយក្នុងនោះ រួមមាន ការក្រើនរំឭកនៅតាមបញ្ជរបង់លុយ មុននឹងឱ្យអ្នកបើកបរផ្លូវល្បឿនលឿនធ្វើដំណើរលើដងផ្លូវ ដោយក្រសួងសាធារណការគួររៀបចំឱ្យកម្មវិធីតាមប្រព័ន្ធទូរសព្ទ ដែលអាចឱ្យសញ្ញាដល់អ្នកបើកបរ ពេលធ្វើដំណើរដល់តំបន់ដែលអាចប្រឈមខ្ពស់នឹងគ្រោះថ្នាក់។ ការពង្រឹងច្បាប់ពេលបើកបរ ក៏ជាកត្តាមួយដែលលោក គឹម បញ្ញា យល់ថា រដ្ឋគួរតែបំពាក់កាំមេរ៉ាសុវត្ថិភាពចាប់ល្បឿនឱ្យដូចទៅនឹងផ្លូវជាតិលេខ ៣។
បើតាមលោក គឹម បញ្ញា ក៏មានកត្តាផ្សេងៗទៀត ដែលក្រសួងសាធារណការត្រូវយកចិត្តទុកដាក់ដែរ នោះគឺ ការកំណត់លក្ខខណ្ឌសុវត្ថិភាពនៃដងផ្លូវ ការរៀបចំឱ្យមានរថយន្តសង្គ្រោះបឋមជាប្រចាំ នៅពេលមានគ្រោះថ្នាក់កើតឡើង ការផ្សព្វផ្សាយដល់ពលរដ្ឋមូលដ្ឋានកុំឱ្យកាត់របងបន្លាលួស ដើម្បីឆ្លងចូលមកផ្លូវល្បឿនលឿន។
ជាពិសេសទៀតនោះ លោក គឹម បញ្ញា លើកឡើងថា រដ្ឋគួរតែប្រើយន្តការក្នុងការពិន័យដល់អ្នកបើកបរណា ដែលធ្លាប់បង្កគ្រោះថ្នាក់លើផ្លូវល្បឿនលឿននេះជាញឹកញយ។ បើតាម អ្នកជំនាញផ្នែកចរាចរណ៍ រដ្ឋគួរតែពិន័យបុគ្គលដែលបង្កគ្រោះថ្នាក់ កុំឱ្យប្រើប្រាស់ផ្លូវមួយនេះ ក្នុងរយៈពេលមួយ ដើម្បីធានាថា មិនមានគ្រោះថ្នាក់ណាផ្សេងទៀត ដែលអាចបង្កឡើង៕
