ភ្នំពេញៈ រាជរដ្ឋាភិបាលអនុញ្ញាតឱ្យប្រើប្រាស់ថវិការដ្ឋចំនួនប្រមាណ ៦ លានដុល្លារ អាមេរិកដើម្បីដំណើរការគម្រោងសាងសង់ប្រព័ន្ធបញ្ជូនទឹកស្អាតទៅតំបន់អភិវឌ្ឍន៍ពាក់ស្នែង ស្ថិតក្នុងឃុំពាក់ស្នែង ស្រុកអង្គរធំ ខេត្តសៀមរាប ឱ្យបានទាន់ពេលវេលា។
លិខិតទីស្តីការគណៈរដ្ឋមន្ត្រីដែលចុះហត្ថលេខាដោយលោក ហ៊ីង ថូរ៉ាក់ស៊ី រដ្ឋលេខាធិការប្រចាំការនៃទីស្តីការគណៈរដ្ឋមន្ត្រី នាថ្ងៃទី ១ ខែតុលា បញ្ជាក់ថា៖ «អនុញ្ញាតឱ្យប្រើប្រាស់ថវិការដ្ឋចំនួនប្រមាណ ៦ លានដុល្លារអាមេរិក ដើម្បីដំណើរការគម្រោងសាងសង់ប្រព័ន្ធបញ្ជូនទឹកស្អាតទៅតំបន់អភិវឌ្ឍន៍ពាក់ស្នែង ស្ថិតក្នុងឃុំពាក់ស្នែង ស្រុកអង្គរធំ ខេត្តសៀមរាប ឱ្យបានទាន់ពេលវេលា»។
លិខិតដដែលបញ្ជាក់ថា ចំនួនទឹកប្រាក់សរុបនេះមានរួមបញ្ចូលទាំងប្រព័ន្ធបញ្ជូនទឹកស្អាត ស្ថានីយបូមជំរុញសម្ពាធទឹក ១ កន្លែង និងអាងស្តុកទឹកចំណុះ ៥០០ ម៉ែត្រគុបចំនួន ១។
តំបន់អភិវឌ្ឍន៍ពាក់ស្នែងបែងចែកជា ៤ ៧៦៥ ឡូត៍ ដោយធ្វើផ្លូវចូល និងសាងសង់វិទ្យាល័យ និងមណ្ឌលសុខភាព។
នៅក្នុងលិខិតនេះ រាជរដ្ឋាភិបាលបានអនុញ្ញាតឱ្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដឹកនាំផ្ទាល់លើការអនុវត្តគម្រោងសាងសង់ប្រព័ន្ធបញ្ជូនទឹកស្អាតទៅតំបន់អភិវឌ្ឍន៍ពាក់ស្នែង។
លិខិតដដែលបន្តថា ក្រសួងនេះត្រូវរៀបចំនូវយន្តការការងាររបស់ខ្លួនដោយប្រគល់ភារកិច្ចឱ្យអង្គភាពជំនាញនៅក្រោមឱវាទបំពេញការងារទៅតាមមុខសញ្ញា ហើយក្រសួងនេះក៏ជាអ្នកធ្វើសេចក្តីសម្រេច និងគ្រប់គ្រងផ្ទាល់លើកិច្ចការទាំងនោះ សំដៅធានាប្រសិទ្ធភាពការងារ គុណភាពល្អប្រសើរ និងការអនុវត្តគម្រោងបានទាន់ពេលវេលា៕