.jpg)
នគរបាលបានបង្ហាញពីរូបភាពបង្ក្រាបល្បែងកន្ទុយលេខនាពេលកន្លងមក។ រូបថត នគរបាល
ភ្នំពេញៈ ម្ចាស់អាជីវកម្មខុសច្បាប់ជាង៩០ភាគរយ បានបញ្ឈប់សកម្មភាព ក្រោយពីនគរបាលបានបើកយុទ្ធនាការបង្ក្រាបនៅទូទាំងប្រទេសរយៈពេល៨ថ្ងៃ ហើយបានកំពុងតែបន្តសកម្មភាពបង្ក្រាប និងអប់រំឱ្យបញ្ឈប់ការលេងល្បែង។
លោក សុខ ផល រដ្ឋលេខាធិការក្រសួងមហាផ្ទៃ និងជាប្រធានក្រុមការងារបង្ក្រាបការលេងល្បែងស៊ីសងខុសច្បាប់គ្រប់ប្រភេទ បានថ្លែងនៅក្នុងកិច្ចប្រជុំ ស្តីពីបង្ក្រាបការលេងល្បែងស៊ីសងខុសច្បាប់គ្រប់ប្រភេទនៅក្នុងខេត្តព្រះសីហនុ កាលពីថ្ងៃទី៣០ខែកញ្ញាជាមួយលោកគួច ចំរើន អភិបាលខេត្តព្រះសីហនុថា ក្រសួងមហាផ្ទៃនឹងបន្តបោសសម្អាតទីតាំងល្បែងខុសច្បាប់បន្តទៀត។
លោក សុខ ផល ថ្លែងថា៖« យើងដឹងហើយ ១ថ្ងៃៗបង្ក្រាបរាប់រយកន្លែង តែឥឡូវស្ងាត់ ហើយក្នុងរយៈពេល៨ថ្ងៃយើងឃើញថានៅទីតាំងខ្លះឈប់ដោយខ្លួនឯង អាចនិយាយថាដល់ ៩០ ភាគរយផង។ ប៉ុន្តែនៅទីតាំងតិចតួចមិនទាន់ឈប់ដោយមូលហេតុយ៉ាងម៉េចយើងក៏មិនទាន់ដឹង ដូច្នេះយើងនឹងសហការជាមួយអាជ្ញាធរខេត្តព្រះសីហនុ និងខេត្តផ្សេងៗទៀតដែរ ដើម្បីបោសសម្អាតនិងបញ្ឈប់ទីតាំងល្បែងខុសច្បាប់»។
លោកបានគូសបញ្ជាក់ថា ចំពោះទីតាំងល្បែងខុសច្បាប់គ្រប់ប្រភេទនៅតាមមូលដ្ឋានភូមិ ឃុំ ស្រុក គឺអាជ្ញាធរមូលដ្ឋានបោសសម្អាតបានច្រើនហើយ គឺនៅសល់តិចតួច និងកំពុងបន្តបង្ក្រាប។
រដ្ឋបាលខេត្តព្រះសីហនុ បានឱ្យដឹងថា ក្រោយទទួលបានបទបញ្ជាពីប្រមុខរាជរដ្ឋាភិបាល និងរដ្ឋមន្ត្រីក្រសួងមហាផ្ទៃ ក្រុមការងារក្រសួងមហាផ្ទៃ សហការជាមួយអាជ្ញាធរខេត្តព្រះសីហនុ ចុះបង្ក្រាបទីតាំងល្បែងខុសច្បាប់ចំនួន៥កន្លែង នៅក្នុងក្រុងព្រះសីហនុ និងបានរកឃើញជនបរទេសចម្រុះជាតិសាសន៍។ ក្នុងចំណោម ៥ទីតាំងនោះ រកឃើញជនបរទេសសរុបជាង ១ពាន់នាក់ ដែលមាន ១០សញ្ជាតិ ពាក់ព័ន្ធករណីសង្ស័យ ជួញដូរមនុស្ស សញ្ចារកម្ម ល្បែងអនឡាញនិងការស្នាក់នៅរបស់ជនអន្តោប្រវេសន៍ខុសច្បាប់ជាដើម។
រដ្ឋបាលខេត្តបានឱ្យដឹងថា៖«ក្រុមការងារនឹងបន្តធ្វើការត្រួតពិនិត្យរដ្ឋបាលដូចភ្លៀងរលឹមនៅតាមបណ្តាទីតាំងអាជីវកម្មដែលសង្ស័យមិនមានច្បាប់អនុញ្ញាត ព្រមទាំងចាត់វិធានការផ្លូវច្បាប់យ៉ាងម៉ឺងម៉ាត់ចំពោះម្ចាស់អាជីវកម្ម ក្នុងករណីរកឃើញបទល្មើស»។
ពាក់ព័ន្ធការបង្ក្រាបល្បែងនេះដែរ លោក ម៉ែន អេង អភិបាលរងខេត្តស្វាយរៀង កាលពីថ្ងៃទី១ ខែតុលា បានដឹកនាំក្រុមការងារ បានចុះត្រួតពិនិត្យទីតាំងលេងល្បែងឈ្មោះ បក្សីកីឡា ស្ថិតនៅខាងក្នុងបរិវេណកាស៊ីណូ New World ស្ថិតក្នុងក្រុងបាវិត បន្ទាប់ពីទទួលដំណឹងថា កាស៊ីណូនេះ មានបង្កប់ល្បែងជល់មាន់ ល្បែងអនឡាញ បៀរអាប៉ោង ដែលអនុញ្ញាតឱ្យពលរដ្ឋខ្មែរចូលលេងយ៉ាងអនាធិបតេយ្យ។
លោក ម៉ែន អេង ឱ្យដឹងថា ក្រោយចុះត្រួតពិនិត្យរកឃើញថា ក្រុមហ៊ុនកាស៊ីណូ New World មានអាជ្ញាប័ណ្ណកាស៊ីណូត្រឹមត្រូវ ដែលមានសុពលភាពរហូតដល់ឆ្នាំ២០២៦ ចេញដោយអគ្គលេខាធិការដ្ឋាន គណៈកម្មការគ្រប់គ្រងល្បែងពាណិជ្ជកម្មកម្ពុជា។
លោកថា៖« ទីតាំងល្បែងបក្សីកីឡា ពុំមានពលរដ្ឋខ្មែរចូលលេង ដូចការចុះផ្សាយទេ ហើយអ្នកគ្រប់គ្រងទីតាំងល្បែងបក្សីកីឡា បានបញ្ជាក់ថាពុំបានអនុញ្ញាតឱ្យជនជាតិខ្មែរចូលលេងទេ ប៉ុន្តែមានបុគ្គលិកខ្មែរនៅទីនោះ»។
អភិបាលរងរាជធានីភ្នំពេញ លោក ឃ្លាំង ហួត ថ្លែងថា សម្រាប់បេសកកម្មបង្ក្រាបល្បែងស៊ីសងខុសច្បាប់ និងកុងស៊ីបញ្ចាំខុសច្បាប់ ជាភារកិច្ចអាជ្ញាធរមានសមត្ថកិច្ច និងអ្នកពាក់ព័ន្ធត្រូវអនុវត្តដោយការទទួលខុសត្រូវខ្ពស់។
លោកថា៖« បញ្ហាកុងស៊ីបញ្ចាំខុសច្បាប់ជាប្រភពនាំឱ្យមានបទល្មើស ការលេងល្បែង និងប៉ះពាល់ដល់ជីវភាពប្រជាជនមានចំណូលទាប»។
លោកបានរំឭកថា ការមិនចូលរួមមិនអើពើរបស់មន្ត្រី កងកម្លាំងមានសមត្ថកិច្ចដែលពាក់ព័ន្ធ គឺស្មើនឹងមើលងាយបទបញ្ជាថ្នាក់ដឹកនាំ មើលងាយប្រជាជនស្លូតត្រង់។
ជាមួយគ្នានេះលោកគូសបញ្ជាក់ថា សម្រាប់រាជធានីភ្នំពេញ ទីតាំងឃ្លាំងរំសេវ ស្ថិតនៅខណ្ឌទួលគោក និងទីតាំងដទៃទៀតត្រូវតែបំបាត់ការទទួលបញ្ចាំរបស់ចោរ និងរបស់គ្មានឯកសារគ្រប់គ្រាន់៕
វីដេអូ៖
