.jpg)
សកម្មភាពជួយសង្ក្រោះពលរដ្ឋដែលត្រូវពស់ចឹកនៅខេត្តបន្ទាយមានជ័យកាលពីឆ្នាំ២០២០ ។ រូបថត ប៉ូលិស
បន្ទាយមានជ័យៈ មន្ទីរសុខាភិបាលខេត្តបន្ទាយមានជ័យបន្តអំពាវនាវដល់ប្រជាពលរដ្ឋដែលរស់នៅក្នុងមូលដ្ឋាននៃតំបន់រងគ្រោះដោយទឹកជំនន់ឱ្យបង្កើនការប្រុងប្រយ័ត្នបន្ថែមទៀតអំពីបញ្ហាសុខភាព និងសុវត្ថិភាពនៃការរស់នៅបន្ទាប់ពីមានករណីពស់ចឹកអ្នកភូមិ ៤៤ នាក់ ក្នុងរយៈពេល ១ ខែកន្លងមក ។
លោក ឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទាយមានជ័យបានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ២ ខែតុលាថា ក្នុងរដូវទឹកជំនន់អត្រាគ្រោះថ្នាក់ដោយពស់ចឹកមានការកើនឡើងគួរឱ្យព្រួយបារម្ភ។ ចាប់ពីខែមករាដល់ដំណាច់ខែកញ្ញា កន្លងមកនេះ មន្ទីរពេទ្យបង្អែកទាំង ៩ ក្រុងស្រុកទូទាំងខេត្តបន្ទាយមានជ័យបានទទួលព្យាបាលជនរងគ្រោះជាង ៤០០ នាក់ ដែលត្រូវបានពស់ចឹក។ក្នុងនោះជនរងគ្រោះប្រមាណ ១០ ភាគរយ ត្រូវបានដឹកបញ្ជូនពីខេត្តឧត្តរមានជ័យ។
លោកថ្លែងថា៖ «ករណីពស់ចឹក នៅតែជាក្ដីព្រួយកង្វល់ បើទោះជានៅពេលនេះយើងមានថ្នាំសម្រាប់ព្យាបាលករណីពស់ចឹកគ្រប់គ្រាន់ក៏ដោយ»។
បើតាមលោក ច័ន្ទសង្វាត ក្នុងរយៈពេល ១ ខែពេញកន្លងមកនេះ [ក្នុងខែកញ្ញា ឆ្នាំ ២០២២] នៅខេត្តបន្ទាយមានជ័យមានពលរដ្ឋ ៤៤ នាក់ ដែលរស់នៅតំបន់រងគ្រោះដោយទឹកជំនន់ត្រូវបានពស់ចឹក ប៉ុន្តែគ្មានអ្នកស្លាប់ដោយករណីពស់ចឹកនោះឡើយ ព្រោះក្រុមគ្រូពេទ្យបានប្រឹងប្រែងព្យាបាលពួកគេទាន់ពេលវេលា។ ក្នុងស្ថានភាពនេះខាងមន្ទីរមួយចំនួនត្រូវការថ្នាំព្យាបាលពស់ចឹកបន្ថែម ដើម្បីព្យាបាលជនរងគ្រោះ។
លោកបានបញ្ជាក់ថា៖ «ជនរងរគ្រោះម្នាក់ ត្រូវប្រើថ្នាំព្យាបាលពស់ចឹកយ៉ាងតិច ២ ដប។ ក្នុងករណីធ្ងន់ធ្ងរអាចប្រើរហូតដល់ ៩-១១ ដប ដែលក្នុង ១ ដប ថ្លៃជិត ៥០០ ដុល្លារ»។
លោក ច័ន្ទសង្វាត បានបញ្ជាក់ថា នៅពេលទឹកជំនន់ ទីជម្រកសត្វពស់ក៏ត្រូវលិចអស់ផងដែរ ហើយពួកវាត្រូវភៀសខ្លួនទៅរកទីកន្លែងដែលមានសុវត្ថិភាពដូចជា នៅតាមទីដំបូកដែលមិនលិចទឹក តាមផ្ទះអ្នកភូមិ ជង្រុកស្រូវ ឬនៅតាមដើមឈើធំៗដែលវាអាចលាក់ខ្លួនបាន។
យ៉ាងណាក៏ដោយ កាលពីថ្ងៃសុក្រសប្ដាហ៍មុន ក្រសួងសុខាភិបាលបានផ្ដល់ថ្នាំព្យាបាលពស់ចឹកចំនួន ១៥០ ដបបន្ថែមទៀត ដល់មន្ទីរសុខាភិបាលខេត្តបន្ទាយមានជ័យ ដើម្បីយកទៅចែកជូនដល់មន្ទីរពេទ្យ
បង្អែកនានា ដើម្បីបង្ការទុកព្យាបាលពលរដ្ឋរងគ្រោះដោយករណីពស់ចឹកឱ្យបានទាន់ពេលវេលា៕
