ភ្នំពេញៈ លោក ម៉ានូអែល ម៉ារ៉េរ៉ូគ្រុស នាយករដ្ឋមន្ត្រីនៃសាធារណរដ្ឋគុយបា នឹងដឹកនាំគណៈប្រតិភូជាន់ខ្ពស់មកបំពេញទស្សនកិច្ចផ្លូវការនៅកម្ពុជារយៈពេល ២ ថ្ងៃ ចាប់ពីថ្ងៃទី ៤ ដល់ថ្ងៃទី ៦ ខែតុលា ឆ្នាំ ២០២២។ នេះបើតាមសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ។
សេចក្ដីប្រកាសបានឱ្យដឹងថា ដំណើរទស្សនកិច្ចនេះធ្វើឡើងតបតាមការអញ្ជើញរបស់លោកនាយករដ្ឋមន្ត្រី ហ៊ុន សែន។ ក្នុងអំឡុងពេលទស្សនកិច្ចនេះ លោក ម៉ានូអែល ម៉ារ៉េរ៉ូគ្រុស នឹងចូលគាល់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា នៅព្រះបរមរាជវាំង ហើយនឹងចូលជួបលោកសាយ ឈុំ ប្រធានព្រឹទ្ធសភា និងលោក ហេង សំរិន ប្រធានរដ្ឋសភាផងដែរ។
ប្រភពដដែលបានបញ្ជាក់ថា លោកនាយករដ្ឋមន្រ្តីគុយបា នឹងជួបពិភាក្សាទ្វេភាគីជាមួយលោក ហ៊ុន សែន ហើយនាយករដ្ឋមន្ត្រីទាំង ២ នឹងធ្វើជាអធិបតីក្នុងពិធីចុះហត្ថលេខាលើឯកសារមួយចំនួនដែលនឹងបង្កើនកិច្ចសហប្រតិបត្តិការទ្វេភាគីបន្ថែមទៀត ក្នុងវិស័យ កីឡា អប់រំ និងវប្បធម៌ ក៏ដូចជាវិស័យផ្សេងៗទៀត។ធា
អ្នកស្រាវជ្រាវផ្នែកភូមិសាស្ត្រនយោបាយលោក វណ្ណ ប៊ុនណា បានលើកឡើងថា កម្ពុជាអាចនឹងរៀនសូត្រពីការធ្វើឱ្យមានទំនាក់ទំនងល្អឡើងវិញរវាងគុយបាជាមួយអាមេរិក ព្រោះប្រទេសគុយបាពីមុនក៏ធ្លាប់មានបញ្ហារកាំរកូសជាមួយអាមេរិកខ្លាំង រហូតដល់ទទួលរងទណ្ឌកម្មពីសំណាក់អាមេរិក ប៉ុន្តែប្រទេសដែលមានប្រជាជនប្រមាណជាង ១១ លាននាក់នេះ អាចស្ដារស្ថានភាពបានធូរស្រាលឡើងវិញ ។
លោកបានថ្លែងថា៖ «ដំណើរទស្សកិច្ចរវាងនាយករដ្ឋមន្ត្រីទាំង ២ អាចឆ្លុះបញ្ចាំងអំពីគោលនយោបាយចំហជើងមេឃ (Open Sky Policy) របស់កម្ពុជា ក្នុងការបង្កើតមិត្តឱ្យបានច្រើនតាមដែលអាចធ្វើទៅបាន មិនថាមិត្តនោះជាកុម្មុយនីស្ដ ឬប្រជាធិបតេយ្យនោះទេ»។
អ្នកស្រាវជ្រាវរូបនេះក៏បានរំលេចពីចំណុចអវិជ្ជមាននិងវិជ្ជមានជុំវិញដំណើរទស្សនកិច្ចរបស់លោកនាយករដ្ឋមន្ត្រីគុយបាផងដែរ។ លោកបានថ្លែងថា៖ «ចំណុចវិជ្ជមាននោះ គឺការរឹតចំណងមិត្តភាពរវាងប្រទេសទាំង ២ ហើយកម្ពុជាអាចអនុវត្តគោលនយោបាយការបរទេសចម្រុះពណ៌ អាចត្រូវបានអនុវត្តឱ្យកាន់តែមានប្រសិទ្ធភាពផងដែរ។ ម្យ៉ាងទៀតដោយសារកម្ពុជាជាប្រធានអាស៊ានឆ្នាំ ២០២២ នេះ ប្រទេសគុយបា អាចរៀនសូត្រពីការផ្សារភ្ជាប់ទំនាក់ទំនងជាមួយអាស៊ានទៅថ្ងៃអនាគតផងដែរ»។
យ៉ាងណាក្ដី លោកក៏មានការព្រួយបារម្ភផងដែរថា ដំណើរទស្សនកិច្ចនេះអាចនឹងលេចចេញជាសេណារីយោអវិជ្ជមាន ដោយសារតែទំនាក់ទំនងរបស់គុយបា និងកម្ពុជាជាមួយសហរដ្ឋអាមេរិកហាក់បីដូចជាស្ថិតក្នុងភាពមិនសូវល្អប្រសើរទេ ដូច្នេះវាហាក់បីដូចជាបានបង្ហាញថាកម្ពុជាចង់ពង្រឹងរបបរបស់ខ្លួនឱ្យស្របទៅតាមប្រទេសគុយបាដែរ។
គួររំឭកផងដែរថា កាលពីថ្ងៃទី ២៣ ខែកញ្ញា ឆ្នាំ ២០២២ លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូជាន់ខ្ពស់កម្ពុជាទៅ ប្រទេសគុយបាដើម្បីបំពេញទស្សនកិច្ចផ្លូវការ។ថ្នាក់ដឹកនាំជាន់ខ្ពស់នៃប្រទេសទាំង ២ ក៏បានធ្វើជាអធិបតីក្នុងពិធីចុះហត្ថលេខាលើឯកសារសំខាន់ៗចំនួន ៥ រួមមាន កម្មវិធីនៃកិច្ចសហប្រតិបត្តិការនិងការផ្លាស់ប្តូរវប្បធម៌, អនុស្សរណៈយោគយល់គ្នា ស្តីពីកិច្ចសហប្រតិបត្តិការរវាងវិទ្យាស្ថានការទូតនៃប្រទេសទាំង ២, អនុស្សរណៈយោគយល់គ្នាស្តីពីកិច្ចសហប្រតិបត្តិការលើការអភិវឌ្ឍកីឡា, គម្រោងកិច្ចសហប្រតិបត្តិការរវាងក្រសួងការបរទេសនៃប្រទេសទាំង ២ និងអនុស្សរណៈយោគយល់គ្នារវាងក្រសួងសុខាភិបាលកម្ពុជា-គុយបា៕