.jpg)
ផ្លូវល្បឿនលឿនភ្នំពេញ-ព្រះសីហនុ ដែលត្រូវបានបើកឱ្យប្រើសាកល្បងចាប់ពីថ្ងៃទី ១ ខែតុលា ឆ្នាំ ២០២២។ រូបថត សហការី
ភ្នំពេញៈ គិតចាប់ពីម៉ោង ៦ ព្រឹកដល់ ៦ ល្ងាចនាថ្ងៃទី ១ ខែតុលា មានយានយន្តប្រមាណ ៩ ០០០ គ្រឿង បានប្រើប្រាស់ផ្លូវល្បឿនលឿនក្នុងថ្ងៃដាក់ឱ្យសាកល្បងជាលើកដំបូង ខណៈសមត្ថកិច្ចបានអប់រំណែនាំដល់អ្នកធ្វើដំណើរប្រមាណ ៣០ ករណី និងទទួលបានការហៅសង្គ្រោះតាមទូរស័ព្ទជាង ៣០ ករណី។ នេះបើតាមលោក ហ៊ាង សុធាយុត្តិ អ្នកនាំពាក្យក្រសួងសាធារណការ និងដឹកជញ្ជូន។
ផ្លូវល្បឿនលឿនភ្នំពេញ-ព្រះសីហនុ ត្រូវបានក្រសួងសាធារណការ និងដឹកជញ្ជូនប្រកាសបើកដំណើរការសាកល្បងដោយឥតគិតថ្លៃចាប់ពីថ្ងៃទី ១ ដល់ថ្ងៃទី ៣១ ខែតុលា ដែលមានចម្ងាយផ្លូវសរុប ១៨៧,០៥ គីឡូម៉ែត្រ ហើយអ្នកប្រើប្រាស់អាចចំណាយពេលប្រមាណ ២ ម៉ោងប៉ុណ្ណោះពីរាជធានីភ្នំពេញទៅក្រុងព្រះសីហនុដែលកន្លងមកត្រូវចំណាយពេលពី ៥ ទៅ ៦ ម៉ោងតាមផ្លូវជាតិលេខ ៤។
លោក ហ៊ាង សុធាយុត្តិ អ្នកនាំពាក្យក្រសួងសាធារណការ និងដឹកជញ្ជូនបានប្រាប់ភ្នំពេញ-ប៉ុស្តិ៍នៅថ្ងៃទី ២ តុលា ថា គិតចាប់ពីម៉ោង ៦ ព្រឹកដល់ម៉ោង ៦ ល្ងាចថ្ងៃទី ១ តុលា មានយានយន្ត ៩ ០០០ គ្រឿងបានធ្វើដំណើរទាំងទៅទាំងមកលើផ្លូវ ១ ខ្សែនេះ។
លោក សុធាយុត្តិ បានឱ្យដឹងបន្តថា ក្នុងថ្ងៃដំបូងនោះ ក៏ឃើញមានបាតុភាពមួយចំនួនបានកើតឡើងលើផ្លូវល្បឿនលឿន ដូចជា ការបើកលើសល្បឿនកំណត់, មានម៉ូតូកម្លាំងតូចៗដែលមិនត្រូវបានអនុញ្ញាតបានបើកឆ្លងកាត់ មានយានយន្តមួយចំនួនខូចនៅលើដងផ្លូវ ការបើកបរខុសគន្លងផ្លូវ និងមានសកម្មភាពល្មើសមួយចំនួនទៀតផងដែរ។
លោកបានបញ្ជាក់ថា៖ «ម្សិលមិញ (ថ្ងៃទី ១ តុលា) យើងជួបបញ្ហាជាក់ស្តែង។ អ្នកបើកបរគាត់មានបញ្ហា គាត់បានទំនាក់ទំនងមកកាន់លេខ ១ ៣៩៩ ដើម្បីសុំជំនួយជាលក្ខណៈក្រុមសង្គ្រោះ ក្រុមសណ្តោងយានយន្ត ក៏ដូចជា ក្រុមកងកម្លាំងនគរបាលប្រចាំការនៅទីនោះ»។
បើទោះជាមានបញ្ហាខ្លះក្ដី ក៏លោក សុធាយុត្តិ បានអះអាងថា រយៈពេលសាកល្បងពេញ ១ ថ្ងៃទី ១ តុលា គឺមិនមានករណីគ្រោះថ្នាក់ចរាចរណ៍កើតឡើងបង្កគ្រោះថ្នាក់ដល់អ្នកធ្វើដំណើរឡើយ ដោយសមត្ថកិច្ចគ្រាន់តែបានចុះអប់រំណែនាំដោយផ្ទាល់ដល់អ្នកធ្វើដំណើរប្រមាណ ៣០ ករណី និងទទួលបានការហៅសង្គ្រោះតាមបណ្តាញទូរស័ព្ទជាង ៣០ ករណីប៉ុណ្ណោះ។
បន្ថែមពីនេះ លោក ហ៊ាង សុធាយុត្តិ នៅតែទទូចឱ្យអ្នកប្រើប្រាស់ផ្លូវ គួរពិនិត្យយានយន្តរបស់ខ្លួនឱ្យបានត្រឹមត្រូវ មុនធ្វើដំណើរលើផ្លូវល្បឿនលឿននេះ ចៀសវាងមានបញ្ហានៅពេលធ្វើដំណើរ បើទោះជាផ្លូវនេះមានចម្ងាយជិត ប៉ុន្តែផ្លូវនេះមានច្រកចេញ ឬកន្លែងឈប់សម្រាកចំនួនតែ ៤ ទីតាំងប៉ុណ្ណោះ។
លោកបានបញ្ជាក់ថា៖ «យើងសូមបញ្ជាក់ថា គ្រោះថ្នាក់ចរាចរណ៍កាលពីម្សិលមិញ (ថ្ងៃទី ១ តុលា) គឺមិនមានទេ។ ទាំងនេះគឺជាសញ្ញាមួយល្អបង្ហាញថា បងប្អូនយើងគាត់ចូលរួម និងមានស្មារតីប្រុងប្រយ័ត្ន។ គ្រាន់តែឃើញមានការបើកលើសល្បឿន ហើយថតបង្ហាញជាវីដេអូក្តី ជារូបភាពក្តីក្នុងការសម្ញែងអួតគ្នា។ ទាំងនេះ គឺជារូបភាពមួយមិនល្អ យើងសុំអំពាវនាវឱ្យបញ្ឈប់ជាបន្ទាន់ ដើម្បីសុវត្ថិភាព និងជាគំរូល្អក្នុងសង្គម»។
ក្រៅពីនេះ លោក ហ៊ាង សុធាយុត្តិ លើកទឹកចិត្តមន្ត្រីអនុវត្តច្បាប់នៅគ្រប់គោលដៅត្រូវបន្តខិតខំពង្រឹងអនុវត្តច្បាប់ និងត្រូវមានភាពអត់ធ្មត់ក្នុងការបម្រើសេវាដល់ពលរដ្ឋលើផ្លូវល្បឿនលឿននេះ ក៏ប៉ុន្តែលោកបានណែនាំដល់អាជ្ញាធរដែនដីឱ្យចាត់វិធានការច្បាប់ចំពោះសកម្មភាពល្មើសដដែលៗដូចជា ករណីកាត់របងលួស ការលែងសត្វពាហនៈ និងបើកម៉ូតូមិនមានការអនុញ្ញាតក្រោយការអប់រំណែនាំមិនស្តាប់។
ផ្លូវល្បឿនលឿននេះបានបើកការដ្ឋានសាងសង់ពីថ្ងៃទី ២២ ខែមីនា ឆ្នាំ ២០១៩ ដែលតួផ្លូវមានទទឹង ២៤ ម៉ែត្រមាន ៤ គន្លង (២ ទៅ ២ មក) និងគន្លងឈប់បន្ទាន់ (១ ទៅ ១ មក) តភ្ជាប់ពីភ្នំពេញដល់សង្កាត់លេខ ៣ ក្រុងព្រះសីហនុ ដោយឆ្លងកាត់ខេត្តកណ្តាល កំពង់ស្ពឺ និងខេត្តកោះកុង។ ផ្លូវនេះមានសួនច្បារខណ្ឌកណ្តាល មានផ្លូវបំបែកប្តូរទិស (Inter-Change) ភ្ជាប់មកផ្លូវជាតិលេខ ៤ ចំនួន ៦ កន្លែង មានកន្លែងឈប់សម្រាក ៣ កន្លែង និងចំណតរថយន្ត ១ កន្លែងផងដែរ។ នេះបើតាមក្រសួងសាធារណការ និងដឹកជញ្ជូន។
លោក គឹម បញ្ញា នាយកអង្គការមូលនិធិបង្ការរបួសអាស៊ី បានប្រាប់ ភ្នំពេញ ប៉ុស្តិ៍ថា ការបំពានរបស់អ្នកបើកបរមួយចំនួនអំឡុងពេលធ្វើដំណើរលើផ្លូវល្បឿនលឿននេះអាចមកពីកត្តាមួយចំនួន ព្រោះតែអ្នកបើកបរមិនទាន់យល់ដឹងពីគោលការណ៍ប្រើប្រាស់ផ្លូវនេះ និងបណ្តាលមកពីទម្លាប់របស់អ្នកបើកបរ។
លោកថា បញ្ហានេះអាចដោះស្រាយបានតាមរយៈក្រសួងសាធារណការ និងដឹកជញ្ជូន រួមទាំងមន្ត្រីនគរបាលពាក់ព័ន្ធត្រូវពង្រឹងការអប់រំផ្សព្វផ្សាយ ដើម្បីបញ្ចៀសកុំឱ្យមានបទល្មើសនានា និងគ្រោះថ្នាក់ចរាចរណ៍ដែលអាចនឹងកើតមានឡើងនៅលើផ្លូវល្បឿនលឿននេះ៕
វីដេអូ៖
