ភ្នំពេញៈ អ្នកជំនាញក្នុងគម្រោងយុទ្ធនាការសៀវភៅ ១ សហគមន៍ ១ ប្រកាសជ្រើសរើសយុវជនស្ម័គ្រចិត្តចំនួន ១០០ នាក់ ដើម្បីចូលរួមផ្សព្វផ្សាយយុទ្ធនាការរបស់ខ្លួនក្នុងការលើកកម្ពស់វិស័យអំណានទៅដល់យុវជននៅក្នុងប្រទេសកម្ពុជា ខណៈយុវជនស្ម័គ្រចិត្ត នឹងទទួលបានអត្ថប្រយោជន៍មួយចំនួនសម្រាប់ពង្រឹងសមត្ថភាព។
យុទ្ធនាការសៀវភៅ១សហគមន៍១ គឺជាគម្រោងដែលបង្កើតឡើងដើម្បីលើកកម្ពស់វិស័យអំណានទៅដល់យុវជននៅក្នុងប្រទេសកម្ពុជា តាមរយៈព្រឹត្តិការណ៍សំខាន់ៗចំនួន៥ គឺការប្រកួតប្រជែងការអាន, ការចែកសៀវភៅ, បណ្ណាល័យចល័ត, ការអភិវឌ្ឍបណ្ណាល័យ និងផ្សារណាត់។
គម្រោងនេះ នឹងដាក់ឱ្យដំណើរការរយៈពេល ២៥ ខែ ចាប់ផ្តើមពីខែកុម្ភៈ ឆ្នាំ ២០២៣ ដល់ខែមករា ឆ្នាំ ២០២៥ ក្រោមកិច្ចសហប្រតិបត្តិការរវាងក្រុមហ៊ុន Riel Tiger Solutions, Business Record, Scholar Library and Diamond Elephant Travel។ នេះបើតាមលិខិតប្រកាសរបស់គម្រោងយុទ្ធនាការសៀវភៅ ១ សហគមន៍ ១។
លោក សុខ ឡាក់ សហស្ថាបនិកបណ្ណាល័យបញ្ញវន្ត និងជាសហស្ថាបនិកយុទ្ធនាការសៀវភៅ ១ សហគមន៍ ១ បានប្រាប់ ភ្នំពេញ ប៉ុស្តិ៍ នៅថ្ងៃទី ៣ ខែតុលាថា ដើម្បីឱ្យកម្មវិធីនេះដំណើរការទៅបានយ៉ាងរលូន ក្រុមការងារត្រូវការការចូលរួមពីយុវជនស្ម័គ្រចិត្តប្រកបដោយសក្ដានុពលចំនួន ១០០ នាក់ ក្នុងដំណាក់កាលទី១។
លោកបានឱ្យដឹងបន្តថា យុវជនស្ម័គ្រចិត្ត នឹងទទួលបានអត្តប្រយោជន៍មួយចំនួន ដូចជាទទួលបទពិសោធ ទំនាក់ទំនង ទទួលបទពិសោធធ្វើការជាក្រុម ទទួលបានឱកាសចូលរួម ឬកាន់គម្រោងនានារបស់គម្រោង រួមទាំងទទួលបានលិខិតបញ្ជាក់សម្រាប់អ្នកចូលរួមស្ម័គ្រចិត្តផ្លូវការ។
លោក សុខ ឡាក់ បានបញ្ជាក់ថា៖ «ជាផែនការអ្នកស្ម័គ្រចិត្តដែលយើងជ្រើសរើស ១០០ នាក់ដំបូង យើងនឹងព្យាយាមរៀបចំវគ្គបណ្តុះបណ្តាលមួយចំនួនដល់ពួកគាត់ ដើម្បីរៀបចំឱ្យពួកគាត់អភិវឌ្ឍខ្លួនក្លាយជាអ្នកដឹកនាំ។ នៅពេលជោគជ័យជំហានទី១ យើងនឹងឈានទៅជ្រើសរើសអ្នកស្ម័គ្រចិត្តបន្ថែមទៀត»។
បើតាមលោក សុខ ឡាក់ ចំពោះយុវជនស្ម័គ្រចិត្តទាំង ១០០ នាក់ នឹងអាចចូលរួមសកម្មភាពនានាដែលរៀបចំដោយគម្រោងយុទ្ធនាការសៀវភៅ ១ សហគមន៍ ១ ក្នុងពេលអនាគត តាមរយៈសកម្មភាពផ្សព្វផ្សាយរបស់គម្រោងទូទាំង ២៥ រាជធានី-ខេត្ត និងតាមបណ្តាញសង្គម។ លោក បន្ថែមថា ពួកគេនឹងអាចចូលរួមជាចំណែកមួយក្នុងការសិក្សាស្រាវជ្រាវពីការអាន និងតម្រូវការសៀវភៅនៅតាមមូលដ្ឋានទូទាំងប្រទេស។
យោងតាមការស្ទង់មតិសេដ្ឋកិច្ចសង្គមកម្ពុជាឆ្នាំ ២០១៤ ប្រទេសកម្ពុជា មានអត្រាអក្ខរកម្មទាបបំផុតទី២ នៅក្នុងបណ្តាប្រទេសអាស៊ាន បន្ទាប់ពីប្រទេសឡាវ និងប្រហែល២៩ ភាគរយ នៃប្រជាជនសរុប គឺខ្វះជំនាញអាន និងសរសេរជាមូលដ្ឋាន។ ចំណែកការរកឃើញរបស់ក្រុមប្រឹក្សាអភិវឌ្ឍន៍យុវជនជាតិ (NYDC 2021) នៅកម្ពុជាបានបង្ហាញថា កម្ពុជាជាប្រទេសដែលមានយុវជន ៣២ ភាគរយដែលមានអាយុពី ១០ ដល់ ២៤ ឆ្នាំ និង ៧១ ភាគរយនៃយុវជនមិនបានសិក្សាជាផ្លូវការ។
កញ្ញា ហ៊ាង វត្ថី ម្ចាស់អាជីវកម្ម Riel Tiger Solutions Co.,LTD ដែលជាសហស្ថាបនិកម្នាក់ក្នុងគម្រោងសៀវភៅ ១ សហគមន៍ ១ បានលើកឡើងថា ដោយសារតែមើលឃើញពីកង្វះខាតនូវជំនាញអាន និងសរសេរជាមូលដ្ឋានរបស់ប្រជាពលរដ្ឋខ្មែរ ដូច្នេះគម្រោងយុទ្ធនាការសៀវភៅ ១ សហគមន៍ ១ នឹងក្លាយទៅជាផ្នែក ១ ដើម្បីជំរុញការអាន និងលើកកម្ពស់ការអាននៅតាមសហគមន៍ តាមរយៈព្រឹត្តិការសំខាន់ៗរបស់ខ្លួន។
កញ្ញាបាននិយាយថា៖ «ការបង្កើនបច្ចេកវិទ្យា និងឧបករណ៍ឆ្លាតវៃ បានជះឥទ្ធិពលយ៉ាងខ្លាំងទៅលើកុមារ និងយុវជន។ ការចំណាយពេលវេលាច្រើនពេក លើឧបករណ៍ឆ្លាតវៃ និងអ៊ីនធឺណិតដែលពួកគេចូលប្រើ គឺបង្កបញ្ហាជាពិសេសការអភិវឌ្ឍរបស់កុមារ រួមទាំងបញ្ហាដំណេក ឬការគេងមិនលក់ សុខភាពរាងកាយជាដើម។ គម្រោងនេះ គឺជាសកម្មភាពមួយជួយដល់សង្គម និងចូលរួមចំណែកកាត់បន្ថយបញ្ហាទាំងនេះ នៅក្នុងសង្គមកម្ពុជា»។
តាមឯកសារគម្រោងសៀវភៅ ១ សហគមន៍ ១ ដែល ភ្នំពេញ ប៉ុស្តិ៍ទទួលបាន កាលពីថ្ងៃទី ១៩ ខែកញ្ញា បានអះអាងថា គម្រោងរបស់ខ្លួន នឹងចូលរួមជំរុញឱ្យស្ថាប័នមួយចំនួនទទួលយកវប្បធម៌អាន និងចំណេះដឹងក្នុងប្រតិបត្តិការរបស់ពួកគេ ខណៈសៀវភៅ ២៥ ០០០ ក្បាល និងបណ្ណាល័យចំនួន ២៥ ត្រូវបានរំពឹងទុកថា នឹងផ្តល់ទៅដល់អ្នកអានចន្លោះពី៥ ម៉ឺន ទៅ៧ ម៉ឺននាក់នៅទូទាំង ២៥ រាជធានី-ខេត្ត៕