.jpg)
រថយន្តអ្នកដំណើរតម្រង់ជួរចូលបើកបរលើផ្លូវល្បឿនលឿនភ្នំពេញ-ព្រះសីហនុ នាថ្ងៃទី ១ តុលា។ រូបថត ក្រសួងសាធារណការ
ភ្នំពេញៈ អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងថា ក្នុងថ្ងៃទី ២ ខែតុលា នៃការដាក់ឱ្យសាកល្បងប្រើប្រាស់ផ្លូវល្បឿនលឿន មានយានយន្តជាង ១ ម៉ឺនគ្រឿង បានធ្វើដំណើរលើផ្លូវនេះ ប៉ុន្តែមិនមានគ្រោះចរាចរណ៍កើតឡើងឡើយ បើទោះជាចំនួនយាយន្តមានការកើនឡើងប្រមាណ ៦០ ភាគរយ បើធៀបនឹងថ្ងៃទី ១ ក៏ដោយ។
កាលពីថ្ងៃទី ១ ខែតុលា ដែលជាថ្ងៃដាក់ឱ្យសាកល្បងជាលើកដំបូងក្នុងការធ្វើដំណើរ ដោយឥតគិតថ្លៃ លើផ្លូវល្បឿនលឿនពីរាជធានីភ្នំពេញទៅខេត្តព្រះសីហនុ ដែលមានចម្ងាយផ្លូវសរុប ១៨៧,០៥ គីឡូម៉ែត្រ គឺមានយានយន្តប្រមាណ ៩ ០០០ គ្រឿង បានធ្វើចរាចរណ៍លើផ្លូវនេះទាំងទៅ និងមក។
លោក ហ៊ាង សុធាយុត្តិ អ្នកនាំពាក្យក្រសួងសាធារណការ និងដឹកជញ្ជូនប្រាប់ ភ្នំពេញ ប៉ុស្តិ៍ នៅថ្ងៃទី ៣ តុលាថា សម្រាប់ថ្ងៃទី ២ តុលា គឺមានយានយន្តជាង ១៤ ០០០ គ្រឿង បានចូលប្រើប្រាស់លើផ្លូវល្បឿនលឿន ហើយចំនួននេះបើប្រៀបធៀបនឹងថ្ងៃទី ១ តុលា គឺមានការកើនឡើងប្រមាណ ៦០ ភាគរយ។
បើទោះជាបែបនេះក្តី លោកអះអាងថា ការធ្វើដំណើររបស់អ្នកបើកបរក្នុងថ្ងៃទី ២ គឺមិនមានគ្រោះថ្នាក់ចរាចរណ៍បង្កឱ្យមានគ្រោះថ្នាក់ដល់អាយុជីវិតមនុស្សទេ ដោយគ្រាន់តែមានបាតុភាពបន្តិចបន្តួចនៅលើដងផ្លូវ ដែលទាំងនេះបង្ហាញឱ្យឃើញពីការយល់ដឹងរបស់ប្រជាពលរដ្ឋមានភាពល្អប្រសើរក្នុងការប្រើប្រាស់ផ្លូវល្បឿនលឿន។
លោកប្រាប់ថា៖ «នៅថ្ងៃទី ២ តុលានេះ គឺមិនមានឃើញអ្វីជាទីកត់សម្គាល់ខ្លាំងនោះទេ។ យើងឃើញមានករណីរលត់យានយន្តតាមផ្លូវ ករណីធូរកង់ និងបែកកង់ឡានតាមផ្លូវ ដែលមន្ត្រីនគរបាល ឬខាងក្រុមហ៊ុនបានជួយសង្គ្រោះបានយ៉ាងល្អ។ ចំពោះគ្រោះថ្នាក់វិញនៅថ្ងៃទី២នេះ នៅតែមិនមានគ្រោះថ្នាក់ចរាចរណ៍ទេ»។
ទោះយ៉ាងណា លោក ហ៊ាង សុធាយុត្តិ នៅតែទទូចឱ្យអ្នកប្រើប្រាស់ផ្លូវ គួរពិនិត្យយានយន្តរបស់ខ្លួនឱ្យបានត្រឹមត្រូវ មុនធ្វើដំណើរលើផ្លូវល្បឿនលឿននេះ ចៀសវាងមានបញ្ហានៅពេលធ្វើដំណើរ បើទោះជាផ្លូវនេះមានចម្ងាយជិត ប៉ុន្តែផ្លូវនេះមានច្រកចេញ ឬកន្លែងឈប់សម្រាកចំនួនតែ ៤ ទីតាំងប៉ុណ្ណោះ។
លោកបញ្ជាក់ថា៖ «ខ្ញុំក៏សូមអំពាវនាវឱ្យបងប្អូនប្រជាពលរដ្ឋ មានការត្រួតពិនិត្យនូវប្រព័ន្ធសុវត្ថិភាពយានយន្ត មុនពេលធ្វើដំណើរ ព្រោះតាមផ្លូវនេះយើងអាចបើកល្បឿនរាងលឿន ហើយក៏មានចម្ងាយឆ្ងាយគួរសម។ ដើម្បីបង្ការនូវហានិភ័យសូមឱ្យត្រួតពិនិត្យឱ្យបានសព្វជ្រុងជ្រោយ»។
កាលពីថ្ងៃទី ១ តុលា សមត្ថកិច្ចបានចុះអប់រំណែនាំដោយផ្ទាល់ដល់អ្នកធ្វើដំណើរប្រមាណ ៣០ ករណី និងទទួលបានការហៅសង្គ្រោះតាមបណ្តាញទូរស័ព្ទជាង ៣០ ករណី ក្នុងចំណោមអ្នកធ្វើដំណើរទាំង ៩ ០០០ គ្រឿង ហើយក៏ឃើញមានបាតុភាពមួយចំនួន ដូចជាការបើកលើសល្បឿនកំណត់ មានម៉ូតូកម្លាំងតូចៗ ដែលមិនត្រូវបានអនុញ្ញាត បានបើកឆ្លងកាត់ មានយានយន្តមួយចំនួនខូចនៅលើដងផ្លូវ និងការបើកបរខុសគន្លងផ្លូវជាដើម។
ផ្លូវល្បឿនលឿនភ្នំពេញ-ព្រះសីហនុ ត្រូវបានក្រសួងសាធារណការ និងដឹកជញ្ជូន ប្រកាសបើកដំណើរការសាកល្បងដោយឥតគិតថ្លៃចាប់ពីថ្ងៃទី ១ ដល់ថ្ងៃទី ៣១ ខែតុលា ដោយអ្នកប្រើប្រាស់អាចចំណាយពេលប្រមាណ ២ ម៉ោងប៉ុណ្ណោះពីរាជធានីភ្នំពេញទៅក្រុងព្រះសីហនុ ដែលកន្លងមកត្រូវចំណាយពេលពី ៥ ទៅ ៦ ម៉ោង តាមផ្លូវជាតិលេខ ៤។
លោក គឹម បញ្ញា នាយកអង្គការមូលនិធិបង្ការរបួសអាស៊ី បានលើកឡើងជាអនុសាសន៍ចំនួន ៥ ចំណុច ដើម្បីធ្វើការកែលម្អ និងលើកកម្ពស់សុវត្ថិភាពលើផ្លូវល្បឿនលឿន ដោយជំរុញឱ្យមានការផ្សព្វផ្សាយអប់រំ ក្រើនរំឭកដល់អ្នកបើកបរ និងប្រជាពលរដ្ឋរស់នៅក្បែរផ្លូវល្បឿនលឿន ការកែលម្អលក្ខខណ្ឌសុវត្ថិភាពចរាចរណ៍នៅលើផ្លូវល្បឿនលឿន។
លោកបន្តថា ត្រូវពង្រឹងការអនុវត្តច្បាប់ស្តីពីចរាចរណ៍ផ្លូវគោក និងការបង្កើនការត្រួតពិនិត្យសុវត្ថិភាពយានយន្ត ព្រមទាំងត្រៀមផ្តល់ជំនួយសង្គ្រោះបឋមបន្ទាន់។
ការលើកឡើងនេះ ដោយលោកអះអាងថា ច្បាប់កំណត់ល្បឿនអតិបរមាត្រឹម ៩០ គ.ម/ម៉ នៅក្រៅទីប្រជុំជន សម្រាប់រថយន្តធុនស្រាល និងរថយន្តដឹកអ្នកដំណើរបើកបរនៅលើផ្លូវដែលមានខឿនបែងចែកទិសចរាចរណ៍ជា ២ ហើយមានគន្លងផ្លូវចាប់ពី ៤ ឡើងទៅ។ ប៉ុន្តែលោកបញ្ជាក់ថា អ្នកបើកបរមួយចំនួន ប្រើប្រាស់ល្បឿនលើសពី ១២០ គ.ម/ម៉ ខ្លះដល់ទៅ ១៤០ គ.ម/ម៉ ឬលើសពីនេះទៀតក៏មាន។
លោកបញ្ជាក់ថា៖ «សម្រាប់ផ្លូវល្បឿនលឿននេះ ដែលកន្លែងខ្លះអាចបើកបរដល់ល្បឿនអតិបរមា ១២០ គ.ម/ម៉ ខ្ញុំយល់ឃើញថា អ្នកបើកបរ នឹងអាចប្រើប្រាស់ល្បឿនលើសពីនេះខ្លាំង ដែលនឹងនាំឱ្យមានហានិភ័យគ្រោះថ្នាក់ចរាចរណ៍ដល់អ្នកបើកបរខ្លួនឯងផ្ទាល់ និង/ឬអ្នកបើកបរយានយន្តផ្សេងទៀត»។
លោកបន្តថា៖ «ដូច្នេះ ទន្ទឹមនឹងការចូលរួមអបអរសាទរ ចំពោះសមិទ្ធផលថ្មីមួយនេះ ក៏ដូចជាលើកទឹកចិត្តឱ្យមានផ្លូវល្បឿនលឿនបែបនេះបន្ថែមទៀត ទៅកាន់បណ្តាខេត្តផ្សេងទៀត ខ្ញុំសូមជំរុញឱ្យមានការយកចិត្តទុកដាក់ឱ្យបានខ្លាំងលើចំណុចមួយចំនួនដូចខាងក្រោម ដើម្បីបង្ការគ្រោះថ្នាក់ចរាចរណ៍ឱ្យបានជាអតិបរមានៅលើផ្លូវល្បឿនលឿន»។
លោក វ៉ី សំណាង អភិបាលខេត្តកំពង់ស្ពឺ បានប្រាប់ ភ្នំពេញ ប៉ុស្តិ៍ នៅថ្ងៃទី ៣ តុលាថា បន្ទាប់ពីមានការដាក់ឱ្យដំណើរការផ្លូវល្បឿនលឿនក្នុងរយៈពេល២ថ្ងៃនេះ ការធ្វើចរាចរណ៍លើកផ្លូវជាតិលេខ ៤ ដែលឆ្លងកាត់តាមខេត្តកំពង់ស្ពឺ គឺមិនសូវមានភាពមមាញឹកខ្លាំងនោះទេ។ លោកបន្តថា ការចរាចររបស់ប្រជាពលរដ្ឋក្នុងខេត្ត គឺមានស្ថានភាពដដែល គ្រាន់តែការធ្វើចរាចរណ៍ឆ្លងកាត់ហាក់មានការធ្លាក់ចុះប្រមាណ ៥០ ភាគរយ។
លោកថ្លែងថា៖ «ខ្ញុំឃើញថា បងប្អូនយើងបានប្រើប្រាស់ផ្លូវល្បឿនលឿនប្រកបដោយការទទួលខុសត្រូវ ហើយគាត់បើកបរប្រុងប្រយ័ត្នដែរ។ គ្រាន់តែអ្វីយើងបានឃើញថ្ងៃទី ១ គឺមានភាពរអាក់រអួលបន្តិច ដោយមានរថយន្តខូច ហើយក្រុមរបស់យើងបានជួយសង្គ្រោះគាត់តាមលក្ខណៈបច្ចេកទេស។ សម្រាប់ផ្លូវនេះ បើអ្នកបើកបរអនុវត្តតាមការណែនាំ ខ្ញុំជឿថា យើងអាចចំណេញពេលច្រើន និងចំណេញថវិកា»៕
